ភ្នំពេញ ៖ បុរសម្នាក់និងអ្នករួមដំណើរ៣នាក់ទៀត បានបើករថយន្តចុះពីលើស្ពានលីយ៉ុងផាត់ ក្នុងល្បឿនលឿនមិនប្រយ័ត្នបានរេចង្កូតឡើងលើខឿនផ្លូវ ទៅបុកបង្គោលថ្មបាក់១កង់ ចំណែករថយន្តក្រឡាប់ផ្ងារជើង។ សំណាងល្អមិនមានគ្រោះថ្នាក់ទៅដល់មនុស្ស។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង ៨ និង៥០នាទីយប់ថ្ងៃអាទិត្យទី៧ ខែកុម្ភៈ ឆ្នាំ ២០២១ ត្រង់ចំណុចគល់ស្ពានលីយ៉ុងផាត់ តាមបណ្តោយផ្លូវវិមានឈ្នះឈ្នះ ក្នុងសង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។
បើយោងតាមប្រភពព័ត៌មានពីបងប្រុសម្នាក់ នៅកន្លែងកើតហេតុបានឲ្យដឹងថា មុនពេលកើតហេតុគាត់បានឃើញរថយន្តម៉ាកហាយឡិនឌ័រមួយគ្រឿង ពណ៌ទឹកប្រាក់ពាក់ផ្លាកលេខភ្នំពេញ2-AN 9748 បើកបដោយបុរសម្នាក់ និងរួមដំណើ៣នាក់ទៀត ធ្វើដំណើរតាមបណ្តោយផ្លូវវិមានឈ្នះឈ្នះ ចុះពីលើស្ពានលីយ៉ុងផាត់ ក្នុងទិសដៅពីកើតមកលិចក្នុងល្បឿនយ៉ាងលឿន ខណៈមកដល់ចំណុចកើតហេតុ បានរេចង្កូតឡើងលើខឿនផ្លូវទៅបុកបង្គោលថ្មក្រឡាប់ផ្ងារជើង។
សំណាងល្អក្នុងហេតុការណ៍គ្រោះថ្នាក់ចរាចរណ៍មួយនេះ មិនបង្កឱ្យមានប៉ះពាល់ទៅលើភាគីដទៃនោះទេ និងមិនមានរងរបួសស្នាមទៅដល់ម្ចាស់រថយន្ត និងអ្នករួមដំណើររងការខូចខាតតែរថយន្ដតែប៉ុណ្ណោះ។
ក្រោយពេលកើតហេតុសមត្ថកិច្ចមូលដ្ឋាន សហការជាមួយនឹងខាងជំនាញចរាចរណ៍ ចុះមកដល់រួចធ្វើការវាស់វែងហៅរថយន្តស្ទូច មកស្ទូចយករថយន្តបង្កខាងលើទៅរក្សាទុកនៅ អធិការរដ្ឋានខណ្ឌព្រែកព្នៅ រង់ចាំដោះស្រាយនៅពេលក្រោយ៕ រក្សាសិទ្ធិដោយ៖ សា មេត