ភ្នំពេញ : ក្រសួងសុខាភិបាល និងសាលារាជធានីភ្នំពេញ អំពាវនាវសូមឲ្យអ្នកចូលក្លិប N8 ពីចាប់ថ្ងៃទី៤ ដល់ ១៩ ខែកុម្ភៈ និងអ្នកពាក់ព័ន្ធ ព្រឹត្តិការណ៍សហគមន៍២០កុម្ភៈ ធ្វើចត្តាឡីស័ក និងធ្វើតេស្តកូវីដ១៩ នៅមណ្ឌលសុខភាពចាក់អង្រែ
អនុវត្តតាមប្រសាសន៍របស់សម្តេចនាយករដ្ឋមន្ដ្រី ហ៊ុន សែន ក្នុងឱកាសថ្លែងសារជូនជនរួមជាតិនៅថ្ងៃទី២០ ខែកុម្ភៈ ឆ្នាំ២០២១នេះ ក្រសួងសុខាភិបាល និងរដ្ឋបាលរាជធានីភ្នំពេញ នៅថ្ងៃទី២០ ខែកុម្ភៈ ឆ្នាំ២០២១នេះ សូមអំពាវនាវដល់បងប្អូនប្រជាពលរដ្ឋ ដែលបានចូលកម្សាន្តនៅក្លិប N8 ចាប់ពីថ្ងៃទី០៤ ដល់ ថ្ងៃទី១៩ ខែកុម្ភៈ ឆ្នាំ២០២១ និងអ្នកដែលពាក់ព័ន្ធករណីវិជ្ជមានក្នុង ព្រឹត្តិការណ៍សហគមន៍ ២០កុម្ភៈ ធ្វើចត្តាឡីស័កឲ្យបានត្រឹមត្រូវ និងធ្វើតេស្តរកកូវីដ១៩ ជាចាំបាច់ នៅមណ្ឌលសុខភាពចាក់អង្រែ។
ការអំពាវនាវនេះ ធ្វើឡើងដើម្បីឲ្យប្រជាពលរដ្ឋ និងបងប្អូនដែលបានចូលក្លិប N8 នៅម្តុំស្តាតអូឡាំពិក និងអ្នកជាប់ពាក់ព័ន្ធ ព្រឹត្តិការណ៍សហគមន៍ ២០កុម្ភៈ ចូលរួមសហការក្នុងការឈានទៅបិទបញ្ចប់ ព្រឹត្តិការណ៍សហគមន៍ ២០កុម្ភៈ ឲ្យបានឆាប់។
លោកស្រី យក់ សម្បត្តិ រដ្ឋលេខាធិការក្រសួងសុខាភិបាល បានបញ្ជាក់ថា សូមប្រជាពលរដ្ឋគ្រប់លំដាប់ថ្នាក់ដែលមានពាក់ព័ន្ធនឹង ព្រឹត្តិការណ៍សហគមន៍ ២០កុម្ភៈ ក៏ដូចជាពាក់ព័ន្ធនឹងក្លិប N8 ឬពាក់ព័ន្ធជាមួយករណីវិជ្ជមាន កូវីដ១៩ នៃព្រឹត្តិការសហគមន៍ ២០កុម្ភៈ សូមមេត្តារួសរាន់ទៅពិនិត្យសុខភាព និងយកសំណាក នៅមណ្ឌលសុខភាពចាក់អង្រែ ហើយធ្វើចត្តាឡីស័ករយៈពេល ១៤ថ្ងៃ ជាកំហិត ធ្វើដូច្នេះដើម្បីចូលរួមទប់ស្កាត់ នៃការរីករាលដាលនៃជំងឺកូវីដ១៩ ឆ្លងចូលសហគមន៍ក្នុងរាជធានីភ្នំពេញ។
សូមជម្រាបថា សម្តេចនាយករដ្ឋមន្ដ្រី ហ៊ុន សែន នៅថ្ងៃទី២០ ខែកុម្ភៈ ឆ្នាំ២០២១នេះ បានប្រកាសពីការឆ្លងជំងឺកូវីដ១៩ ចូលសហគមន៍ ជាលើកទី៣ ដោយលោកបានប្រសិទ្ធនាមព្រឹត្តិការណ៍នេះថាជា ព្រឹត្តិការណ៍សហគមន៍ ២០ កុម្ភៈ ហើយចំណុចចាប់ផ្តើម នៃការរីករាល់ដាលឆ្លងសហគមន៍នេះ ផ្តើមឡើងនៅក្លិប N8 ដែលមានទីតាំងស្ថិតនៅម្តុំស្តាតអូឡាំពិក។
សម្តេចនាយករដ្ឋមន្ដ្រី ហ៊ុន សែន បានបញ្ជាក់ថា ត្រឹមតែជាង១០ម៉ោងប៉ុណ្ណោះ ក្រសួងសុខាភិបាលបានរកឃើញការឆ្លងកូវីដ១៩ ចូលសហគមន៍ក្នុងទ្រង់ទ្រាយធំ រហូតដល់៣២ករណី ដែលជាករណីមិនធ្លាប់មាន នៅក្នុងប្រទេសកម្ពុជា។ សម្តេចនាយករដ្ឋមន្ដ្រី បានអំពាវនាឲ្យបងប្អូនប្រជាពលរដ្ឋ អនុវត្តន៍នូវវិធានការការពាកូវីដ១៩ ៣ការពារ និង៣កុំ ដើម្បីឈានដល់បិទបញ្ចប់ព្រឹត្តិការណ៍សហគមន៍ ២០កុម្ភៈ ឲ្យបានឆាប់ ៕ រក្សាសិទ្ធិដោយ៖បញ្ញាស័ក្តិ
