ភ្នំពេញ ៖ កម្លាំងនគរបាលជាតិទូទាំងប្រទេស ប្រមាណជាង៦ ម៉ឺននាក់ បានត្រៀមខ្លួនជាស្រេច ក្នុងការទទួលយកការចាក់វ៉ាក់សាំង ប្រឆាំងកូវីដ១៩ ដើម្បីបង្ការទប់ស្កាត់ការឆ្លងជំងឺកូវីដ១៩ ពីនគរបាលទៅពលរដ្ឋ ខណៈកងកម្លាំងនគរបាលជាតិក៏ជាផ្នែកដ៏សំខាន់មួយ ក្នុងយុទ្ធនាការប្រយុទ្ធប្រឆាំងជំងឺកូវីដ១៩ ជាពិសេសកម្លាំងការពារព្រំដែន។
លោកនាយឧត្តមសេនីយ៍ ឆៃ ស៊ីណារិទ្ធ អគ្គស្នងការរងនគរបាលជាតិ បានមានប្រសាសន៍ថា កម្លាំងនគរបាលជាតិ គ្រប់ផ្នែក និង គ្រប់អង្គភាពពាក់ព័ន្ធទាំងអស់ មានជំនឿរជឿជាក់ លើវ៉ាក់សាំង ស៊ីណូហ្វាម របស់រដ្ឋាភិបាលនៃសាធារណរដ្ឋប្រជាមានិតចិន និងបានត្រៀមខ្លួនរួចរាល់ហើយ សម្រាប់ការទទួលយកការចាក់វ៉ាក់សាំងនេះ ដើម្បីការពារខ្លួនជៀសផុតពីជំងឺឆ្លងកូវីដ១៩ ក្នុងប្រតិបត្តិការការពារ សន្តិសុខ សណ្ដាប់ សាធារណៈបងប្អូនប្រជាពលរដ្ឋ និងប្រយុទ្ធប្រឆាំងជំងឺកូវីដ១៩ ចូលក្នុងសហគមនាពេលបច្ចុប្បន្នផងដែរ។
ការថ្លែងបញ្ជាក់ប្រាប់ក្រុមអ្នកសារព័ត៌មានក្រោយពីលោកនាយកឧត្តមសេនីយ៍ ដឹកនាំថ្នាក់ដឹកនាំមន្ត្រីនៃអគ្គស្នងការដ្ឋាននគរបាលជាតិ ចាក់វ៉ាក់សាំងការពារជំងឺកូវីដ-១៩ នៅមន្ទីរពេទ្យមិត្តភាពខ្មែរ-សូវៀត នាព្រឹកថ្ងៃទី ២៣ កុម្ភៈនេះ។
លោកក៍បានថ្លែងអំណរគុណប្រមុខដឹកនាំរាជរដ្ឋាភិបាលកម្ពុជា សម្ដេចតេជោនាយករដ្ឋមន្ត្រី ហ៊ុន សែន និងសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដែលបានអនុញ្ញាតឲ្យកម្លាំងនគរបាលជាតិ ទទួលបានការចាក់វ៉ាក់សាំងនេះ ខណៈបច្ចុប្បន្ននេះ កម្លាំងនគរបាលជាតិ ដែលចូលរួមសកម្មភាពប្រយុទ្ធប្រឆាំងកូវីដ១៩នៅក្នុងប្រទេសកម្ពុជា មានចំនួនប្រមាណជាត ៥០រូបហើយ កំពុងធ្វើចត្ថាឡីស័ក្ក ដោយសង្ស័យថាមានជាប់ពាក់ព័ន្ធអ្នកឆ្លងជំងឺកូវីដ១៩។ ប៉ុន្តែមកទល់នឹងពេលនេះ មិនទាន់មានមន្ត្រីនគរបាលណាម្នាក់ ឆ្លងជំងឺកូវីដ១៩នៅឡើងនោះទេ។
នាឱកាសនោះដែរលោកក៍បានអំពាវនាវទៅដល់បងប្អូនប្រជាពលរដ្ឋកម្ពុជា ត្រូវជឿជាក់លើការសម្រេចចិត្តដ៏ត្រឹមត្រូវ និងខ្ពង់ខ្ពស់បំផុត របស់សម្ដេចតេជោនាយករដ្ឋមន្ត្រី ហ៊ុន សែន ដែលទទួលយកវ៉ាក់សាំងស៊ីណូហ្វាមនេះ មកចាក់ជូនប្រជាពលរដ្ឋកម្ពុជាដោយឥតគិតថ្លៃ ពីសំណាក់សាធារណៈរដ្ឋប្រជាមានិតចិន និងកុំចាញ់បោកការញុះញង់ពីជនមួយក្ដាប់តូច ដែលបំភ្លៃព័ត៌មានទាក់ទងទៅនឹង វ៉ាក់សាំងស៊ីណូហ្វាមនេះ ។
សូមជម្រាបថាការចាក់វ៉ាក់សាំង ប្រឆាំងកូវីដ១៩ ជូនទៅដល់កម្លាំងនគរបាលជាតិទូទាំងប្រទេស និងចាប់ផ្ដើមចាប់ពីថ្ងៃទី ២៣ កុម្ភៈនេះតទៅ ដោយអង្គភាពនីមួយៗ ត្រូវដឹកនាំកងកម្លាំងរបស់ខ្លួន មកទទួលវ៉ាក់សាំង ស្របតាមការសម្របសម្រួលរបស់ក្រុមគ្រូពេទ្យនៃក្រសួងសុខាភិបាល៕ រក្សាសិទ្ធិដោយ៖CEN
