ភ្នំពេញ ៖ ការសម្រេចនេះបានធ្វើឡើងតាមរយៈសេចក្តីជូនដំណឹង របស់លេខាធិការដ្ឋាននៃសាលាដំបូងរាជធានីភ្នំពេញ និងអយ្យការចុះថ្ងៃទី២៣ខែកុម្ភៈឆ្នាំ២០២១ ដែលសារព័ត៌មានទទួលបានឲ្យដឹងថា សាលាដំបូងរាជធានីភ្នំពេញនិងអយ្យការអមសាលាដំបូងរាជធានីភ្នំពេញ បញ្ជាក់ជូនមេធាវីនិងភាពីពាក់ព័ន្ធ ពីការពីការលើកពេលសវនាការ។
សាលាដំបូងរាជធានីភ្នំពេញបានលើកឡើងថា ដោយសារស្ថានភាពនៃការឆ្លងជំងឺកូវីដ១៩ ក្នុងព្រឹត្តិការណ៍សហគមន៍២០កុម្ភៈ មានការរីករាលដាលឆាប់រហ័សស្មុគស្មាញជាងព្រឹត្តិការណ៍សហគមន៍មុនៗ ក្នុងការចូលរួមទប់ស្កាត់ការរាលដាលចូលសហគមន៍បន្តទៀត សាលាដំបូងរាជធានីភ្នំពេញ សម្រេចលើកពេលសវនាការដែលបានគ្រោងទុកចម្លោះពីថ្ងៃទី២៤ខែកុម្ភៈ ដល់ថ្ងៃទី១២ខែមីនាឆ្នាំ២០២១ទៅពេលក្រោយវិញ។
សាលាដំបូងនិងអយ្យការអមសាលាដំបូងរាជធានីភ្នំពេញ នឹងកំណត់កម្មវិធីសវនាកាឡើងវិញ ក្រោយពីស្ថានភាពកូវីដ១៩ព្រឹត្តិការណ៍សហគមន៍២០កុម្ភៈបានធូរស្រាល។ ដោយឡែកសម្រាប់សំណុំរឿងចាំបាច់មួយចំនួនលោក លោកស្រីចៅក្រមពិនិត្យនិងចាត់ការតាមការជាក់ស្តែងយោងតាមករណីនីមួយៗ ដោយគោរពតាមការណែនាំរបស់ក្រសួងសុខាភិបាលនិងកាត់បន្ថយការប្រមូលផ្តុំ។
លេខាធិការដ្ឋានៃសាលាដំបូងរាជធានីភ្នំពេញ សូមជម្រាបថា ចំពោះការបំពេញការងាររដ្ឋបាលប្រចាំថ្ងៃ និងការផ្តល់សេវុត្តិធម៌ជូនប្រជាពលរដ្ឋនៅដំណើរការជាធម្មតា ប៉ុន្តែមន្ត្រីទាំងអស់ត្រូវបំពេញភារកិច្ចរបស់ខ្លួន ដោយប្រកាន់ខ្ជាប់នូវវិធានការអនាម័យ ពាក់ម៉ាស់ លាងដៃនឹងអាល់កុល រក្សាគម្លាត ចៀសវាងការប្រមូលផ្តុំនិងតាមដានសុខភាពជាប្រចាំ៕ រក្សាសិទ្ធិដោយ៖CEN
