ភ្នំពេញ ៖ ផ្ទះ និងហាង នៅជុំវិញផ្សារទំនើបរតនាផ្លាហ្សា ត្រូវបានបិទទ្វារភ្លាមៗ នាវេលាម៉ោង ៩ ព្រឹក ថ្ងៃទី០៤ ខែមីនា ឆ្នាំ២០២១ នេះ ក្រោយមន្ត្រីក្រសួងសុខាភិបាល បានចុះយកសំណាកអ្នកពាក់ព័ន្ធដែលជាជនជាតិចិន នៅតាមផ្ទះ និងហាងជុំវិញផ្សារទំនើបខាងលើ ទៅពិនិត្យ ក្រោយពីរកឃើញជនជាតិចិន២នាក់វិជ្ជមានកូវីដ១៩ ដែលបានមកព្យាបាលនៅបន្ទប់ពិគ្រោះ និងព្យាបាលជំងឺទូទៅ ក្នុងឱសថស្ថានរងក «ជិនប៉ោឆេង» នៅផ្ទះលេខ២៧ និង២៩ ផ្លូវ TV បុរីកាណាឌីយ៉ា ស្ថិតក្នុងភូមិចុងថ្លង់ខាងកើត សង្កាត់ទឹកថ្លា ខណ្ឌសែនសុខ រាជធានីភ្នំពេញ កាលពីវេលាយប់ថ្ងៃទី០៣ ខែមីនា ឆ្នាំ២០២១។
តែទោះយ៉ាងណា សម្រាប់ផ្សារទំនើបរតនាផ្លាហ្សា គឺពុំត្រូវបានបិទនៅឡើយទេ ដោយបិទតែផ្ទះ និងហាងជនជាតិចិន ដែលកំពុងបើកលក់ដូររកស៊ី នៅជុំវិញផ្សារទំនើបនោះប៉ុណ្ណោះ។ ចំណែកជនជាតិចិនដែលពាក់ព័ន្ធ ត្រូវបានមន្ត្រីសុខាភិបាល និងអាជ្ញាធរ បានធ្វើការណែនាំឲ្យធ្វើចត្ថាឡីស័ក និងព្រមទាំងយកសំណាកទៅធ្វើការពិនិត្យផងដែរ។
សូមបញ្ជាក់ថា កាលពីវេលាម៉ោងប្រមាណជាង ៨ យប់ ថ្ងៃទី០៣ ខែមីនា ឆ្នាំ២០២១ មានជនជាតិចិន២នាក់ បានមកព្យាបាលនៅចំណុចទីតាំងឱសស្ថានខាងលើ ហើយក៏ត្រូវបានរកឃើញវិជ្ជមានកូវីដ១៩ តែម្តង។ ក្រោយករណីនេះបានកើតឡើង នៅព្រឹកឡើង ថ្ងៃទី០៤ ខែមីនា ឆ្នាំ២០២១ នេះ អាជ្ញាធរមូលដ្ឋាន បានសហការជាមួយមន្ត្រីសុខាភិបាល បានចុះមកប្រមូលជនជាតិចិនចំនួនប្រមាណ ១០០ នាក់ កំពុងស្នាក់និងរស់នៅតាមផ្ទះ និងហាងជុំវិញផ្សារទំនើបរតនាផ្លាហ្សា ដើម្បីត្រួតពិនិត្យ និងយកសំណាកទៅពិនិត្យផងដែរ៕ រក្សាសិទ្ធិដោយ៖ លឹម ហុង
