កាលពីវេលាម៉ោងប្រមាណជាជាង ៩ យប់ ថ្ងៃទី០២ ខែមីនា ឆ្នាំ២០២១ មានករណីឃាតកម្មមួយបានកើតឡើង ដោយនារីរូបស្រស់ស្អាតម្នាក់ ត្រូវបានគេអារ.កសម្លាប់ទាំងកាយអាក្រាតយ៉ាងសាហាវព្រៃផ្សៃ នៅក្នុងបន្ទប់ជួលមួយកន្លែង ស្ថិតក្នុងក្រុងប៉ោយប៉ែត (ម្តុំគ្លីនិកនគររាជ្យ) បង្កឲ្យមានការភ្ញាក់ផ្អើល និងក្តីស្លុតរន្ធត់ជាខ្លាំង។
នារីរងគ្រោះមានឈ្មោះ ហួន ស្រី អាយុ ២២ ឆ្នាំ មានគណនីហ្វេសប៊ុកឈ្មោះ Ah Srey និងជាបុគ្គលិកបម្រើការងារខាងផ្នែក Slot Super Machine នៅក្នុងកាស៊ីណូមួយកន្លែង ក្បែរនាគទិព្វ២។
បើតាមប្រភពពីប្រជាពលរដ្ឋ នៅកន្លែងកើតហេតុបានឲ្យដឹងថា ការស្លាប់របស់នារីរងគ្រោះ គឺសង្ស័យបានកើតឡើងតាំងពីព្រឹកថ្ងៃទី០២ ខែមីនា ឆ្នាំ២០២១ មកម្ល៉េះ ព្រោះយប់ហើយទើបដឹង ខណៈមិត្តភក្តិរបស់នាងចេញមកពីធ្វើការវិញគោះទ្វារ។
ជុំវិញករណីនេះផងដែរ បើតាមលោកវរសេនីយ៍ ព្រំ ពិសិដ្ឋ អធិការរងស្តីទី នៃអធិការដ្ឋាននគរបាលក្រុងប៉ោយប៉ែត បានប្រាប់ឲ្យដឹងថា ករណីខាងលើនេះ នៅពេលនេះ កម្លាំងជំនាញរបស់លោកបានកំណត់មុខសញ្ញាជនដៃដល់ជាឃាតកររួចហើយ និងកំពុងតាមប្រមាញ់ចាប់ខ្លួនមកផ្តន្ទាទោសទៅតាមផ្លូវច្បាប់។
យ៉ាងណាមិញ បើតាមលោកវរសេនីយ៍ត្រី នួន នីណារ៉ូ មេបញ្ជាការកងរាជអាវុធហត្ថ ក្រុងប៉ោយប៉ែត ក៏បានបញ្ចាក់ប្រាប់ឲ្យដឹងផងដែរថា តាមរយៈការធ្វើកោសល្យវិច្ច័យរបស់ក្រុមគ្រូពេទ្យជំនាញ ទៅលើសាកសព នោះនារីរងគ្រោះ គឺពុំត្រូវបានជនដៃដល់រំលោភនៅឡើយទេ ព្រោះថា នារីរងគ្រោះបានរងរបួសហើមមុខ និងដេកទាំងកាយអាក្រាត ដោយសង្ស័យថា អាចនាងបដិសេធព្រមធ្វើតាម ទើបជនដៃដល់ចាក់សម្លាប់ និងប្លន់យកអស់គ្រឿងអលង្ការនៅជាប់នឹងខ្លួននាង រួចគេចខ្លួនតែម្តង៕ រក្សាសិទ្ធិដោយ៖ លឹម ហុង
