ភ្នំពេញ ៖ ស្ត្រីអ្នកលក់កាហ្វេម្នាក់និងបុរសអ្នករត់កង់បីម្នាក់ទៀត និយាយថ្លៃកាហ្វេគ្នាមិនត្រូវ ឈ្លោះគ្នាផ្អើលសួនច្បារខាងមុខសាលាជាតិគ្រប់គ្រង (សាលានីម) បង្កការភ្ញាក់ផ្អើលដល់សមត្ថកិច្ចប៉ុស្តិ៍វត្តភ្នំ ជួយអន្តរាគមន៍។
ហេតុការណ៍នេះ បានកើតឡើងកាលពីវេលាម៉ោង១១ព្រឹកថ្ងៃទី៥ខែមីនា ឆ្នាំ ២០២១ តាមបណ្តោយផ្លូវ៩២ ក្បែរសាកលវិទ្យាល័យជាតិគ្រប់គ្រង ក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ។
តាមប្រភពព័ត៌មានពីកន្លែង កន្លែងកើតហេតុបានឱ្យដឹងថា បុរសម្នាក់ខាងលើបានជិះម៉ូតូកង់បីទៅទិញកាហ្វេពីស្ត្រីម្នាក់ ដែលកំពុងលក់តាមរទះរុញនៅចំណុចខាងលើ នៅពេលទិញមិនបាននិយាយពីថ្លៃកាហ្វេនោះទេ លុះដល់ពេលស្ត្រីជាអ្នកលក់កាហ្វេវេចខ្ចប់រួច ហើយបុរសខាងលើក៏សួរទៅស្ត្រីនោះថា កាហ្វេតម្លៃមួយកែវប៉ុន្មាន ពេលនោះស្ត្រីខាងលើឆ្លើយថាខ្ញុំលក់មួយកែ ២៥០០រៀល ម្ចាស់កង់បីតបថាថ្លៃម៉េស ១៥០០រៀល បានហើយ
ស្ត្រីអ្នកលក់និយាយតបថាបើមិនទិញទេខ្ញុំទុក លក់ឱ្យអ្នកផ្សេងទៀត ហើយភ្លាមហ្នឹងអ្នករត់កង់បីក៏បានដើរចេញ មកអង្គុយលើកង់បីនៅផ្លូវម្ខាងទៀត ហើយមានស្ត្រីអ្នកលក់កាហ្វេក៏គប់កាហ្វេទឹកកក ទៅបុរសរត់កង់បី បន្ទាប់មកពួកគេក៏ឈ្លោះគ្នាដោយពាក្យសំដី បន្ទាប់មកក៏ឈានដល់ប្រតាយប្រតប់គ្នា បណ្តាលឱ្យដាច់រលាត់ដៃជើងតិចតួចទាំងសងខាង។
ក្រោយកើតហេតុនិងសមត្ថកិច្ចប៉ុស្តិ៍ បានមកដល់រួចហៅទៅធ្វើការសាកសួរ នៅប៉ុស្តិ៍ ក្រោយមកពួកគេក៏ផ្សះផ្សាគ្នា ដោះស្រាយបញ្ចប់រឿង៕ រក្សាសិទ្ធិដោយ៖សារឿន
