តាកែវ ៖ មន្ត្រីជំនាញសាខាការពារអ្នកប្រើប្រាស់កិច្ចការប្រកួតប្រជែង និងបង្ក្រាបការ ក្លែងបន្លំ ហៅកាត់ ក.ប.ប ខេត្តតាកែវ បានពិនិត្យរកឃើញអំបិលមួយចំនួនដែលក្រុមអាជីវករក្នុងផ្សារតាកែវ ដាក់លក់មិនមានសាធាតុអ៊ីយ៉ូត និងទំនិញជាប្រភេទប័រកំប៉ុងហួសកាលបរិច្ឆេទប្រើប្រាស់ ព្រមទាំងបានដកហូតមកបំផ្លាញចោលផងដែរ ។
លោក លី សេរីសម្បត្តិ ប្រធានជំនាញសាខាការពារអ្នកប្រើប្រាស់កិច្ចការប្រកួតប្រជែង និងបង្ក្រាបការ ក្លែងបន្លំ ហៅកាត់ ក.ប.ប ខេត្តតាកែវ ដែលបានដឹកនាំមន្ត្រីជំនាញ សហការជាមួយមន្ទីរពាណិជ្ជកម្មខេត្តនិងគណៈកម្មការផ្សារតាកែវ នៅព្រឹកថ្ងៃសុក្រ ទី០៥ ខែមីនា ឆ្នាំ២០២១នេះ បានចុះត្រួតពិនិត្យទំនិញជាប្រភេទគ្រឿងកំប៉ុង បន្លែ ផ្លែឈើ នឹងបានធ្វើតេស្តរកសាធាតុគីមីទៅលើចំណីអាហារ បានថ្លែងឲ្យដឹងថា នៅក្នុងការចុះពិនិត្យមុខទំនិញដែលដាក់លក់នៅលើផ្សារតាកែវនេះ មន្ត្រីជំនាញក.ប.ប បានរកឃើញអំបិលដែលផលិតដោយក្រុមហ៊ុនទាគឹមហ៊ួ និងសិប្បកម្មកែច្នៃអំបិលអ៊ីយ៉ូត តាំង ប៊ុនគ្រុយ មិនមានដាក់សាធាតុអ៊ីយ៉ូតនៅក្នុងអំបិលនោះទេ ដូច្នោះមន្ត្រីជំនាញបានធ្វើការណែនាំ ដល់បងប្អូនអាជីវករឱ្យទាក់ទងទៅក្រុមហ៊ុនខាងលើ ឲ្យនាំយកអំបិលដែលមានដាក់សាធាតុអ៊ីយ៉ូត មកចែកចាយលក់លើទីផ្សារឡើងវិញ។
លោកប្រធានសាខាក.ប.បខេត្ត បានបន្តធ្វើការអំពាវនាវដល់បងប្អូនអាជីវករ ដែលដាក់លក់ទំនិញនៅលើទីផ្សារទាំងអស់ ត្រូវតែដាក់លក់ទំនិញដែលគ្មានដាក់សារធាតុគីមី ដែលនាំឲ្យប៉ះពាល់សុខភាពបងប្អូនប្រជាពលរដ្ឋ ជាពិសេសការដាក់អំបិលត្រូវតែអំបិលដែលមានសាធាតុអ៊ីយ៉ូត ព្រោះការប្រើប្រាស់អំបិលដែលគ្មានជាតិអ៊ីយ៉ូត វានិងធ្វើឲ្យអ្នកប្រើប្រាស់ពកករ និងមិនមានការរីកលូតលាស់ដល់បញ្ញាស្មារតីរបស់មនុស្ស ជាពិសេសរូបរាងកាយរបស់កុមារ ៕ រក្សាសិទ្ធិដោយ៖តាកែវ
