ភ្នំពេញ ៖ នៅរសៀលថ្ងៃទី៤ខែកុម្ភៈឆ្នាំ២០២១ ម្សិលមិញនេះ អង្គភាពCEN រួមអ្នកសារព័ត៌មានជាច្រើនអង្គភាពផ្សេងទៀត បានចុះទៅធ្វើការLiveផ្ទាល់ ករណីឃាតកម្មរំលោភសម្លាប់នារីម្នាក់យ៉ាងឃោរឃៅ ដោយសម្លាប់រួចដឹកសាកសពមកទម្លាក់ចោលក្នុងដីឡូត៍មួយកន្លែង ស្ថិតនៅផ្លូវបេតុង ភូមិទ្រា៤ សង្កាត់ស្ទឹងមានជ័យទី៣ ខណ្ឌមានជ័យ។
លុះនៅព្រឹកមិញនេះ លោកអ៊ួន ឡេង និងអ្នកស្រីរស់ ស៊ីណា ដែលត្រូវជាឪពុកម្តាយរបស់នារីម្នាក់ឈ្មោះសុខ ផានិត អាយុ២៦ឆ្នាំ មុខរបរជាកម្មការិនីរោងចក្រ ស្នាក់នៅបន្ទប់ជួលម្តុំលូ៥ ក្បែរកន្លែងកើតហេតុដែរនោះ បានបាត់កូនស្រីរបស់គាត់រយៈពេលមួយអាទិត្យទៅហើយ ចាប់តាំងពីថ្ងៃទី២៦ខែកុម្ភៈឆ្នាំ២០២១ ដោយផ្តាច់ការទំនាក់ទំនងគ្នា សូម្បីតែទូរស័ព្ទនិងឆាតក៏តេមិនចូលដែរ ទើបគាត់សន្និដ្ឋានថា សពនារីដែលឃាតករសម្លាប់ទាំងអាក្រាតកាយ ហើយមានសភាពស្អុយ និងមានដង្កូវចោះ ហើយសាកសពនោះ ស្លាប់ប្រហែលមួយអាទិត្យដូចគ្នា ដោយមិនអសមចិត្តដេកមិនលក់បក់មិនល្ហើយ ទើបគាត់មកកាន់ប៉ុស្តិ៍នគរបាលស្ទឹងមានជ័យទី៣ ដើម្បីសុំឲ្យសមត្ថកិច្ចជំនាញជួយបញ្ជក់បន្ថែមថា ក្រោយពេលពិនិត្យសាកសពរួចសមត្ថកិច្ច មានបានទទួលភិនភាគ និងអាយុជនរងគ្រោះបានដែរឬទេ។
ក្រោយមកក្រុមការងារCENបានធ្វើការLiveផ្ទាល់ តាមសំណូមពរឪពុកម្តាយរបស់នារីឈ្មោះសុខ ផានិត ថា បើសិនជាស្លាប់មកពន្យល់សប្តិឲ្យម្តាយឪពុក និងក្រុមគ្រួសារបានដឹងផង តែបើនៅរស់ផ្តល់ដំណឹងមកក្រុមគ្រួសារផង កុំឲ្យពួកគាត់បារម្ភ។
បន្ទាប់ពីក្រុមការងារអង្គភាពCEN បានធ្វើការLIveចប់ រយៈពេលជិត២ម៉ោង ស្រាប់តែកូនស្រីរបស់គាត់ បានត្រឡប់មកផ្ទះវិញហើយ។
ក្នុងនាមគាត់ជាឪពុកម្តាយ គ្មានពាក្យពេចន៍អ្វីនោះទេ មានតែសម្តែងការអរគុណ និងជូនពរដល់ក្រុមការងាររបស់អង្គភាពCEN ដែលបានធ្វើការLiveផ្ទាល់ ឲ្យមានសុខភាពភាពល្អនិងសូម ឲ្យការងារកាន់តែជោគជ័យឆ្ពោះទៅមុខជានិច្ច៕ រក្សាសិទ្ធិដោយ៖សួង សាម
