ភ្នំពេញ ៖ ប្រិយមិត្ត ជាពិសេសអ្នកមានវ័យជាង ៣០ ឡើង ប្រាកដណាស់ជាបានស្គាល់ច្បាស់ហើយ ពីតារាប្រុសជើងចាស់ដ៏ល្បីឈ្មោះមួយរូប គឺលោក លាន សូនី ដែលជាបងប្រុសបង្កើតរបស់លោក លាន អាហ្វ្រីគីនីន ផងដែរ។
ពិតណាស់ តារាប្រុសរូបនេះ ពុំត្រឹមតែសាងកេរ្តិ៍ឈ្មោះលើវិស័យចម្រៀងតែម្យ៉ាងនោះទេ តែលោក លាន សូនី ក៏បានជាពិធីករមានវោហាស័ព្ទ ទទួលការគាំទ្រយ៉ាងខ្លាំងពីសំណាក់មហាជនផងដែរ ជាពិសេស គឺពេលឡើងឆាកច្រៀងម្តងៗ លោក លាន សូនី មិនភ្លេចទេ ធ្វើឲ្យទស្សនិកជនពេញចិត្ត ជាមួយក្បាច់រាំតាមចង្វាក់ជើងដ៏ល្វត់ល្វន់របស់លោក ដែលលោកតែងនិយមធ្វើតាមស្ទីលរបស់ស្តេចចម្រៀងប៉ុប Michael Jackson។
តែទោះយ៉ាងណា ក្នុងរយៈពេលជាង ១០ ឆ្នាំ ចុងក្រោយនេះ លោក លាន សូនី ហាក់បាត់ស្ងាត់ពីសិល្បៈឈឹងតែម្តង ដោយមិនដឹងថាជាលោកកំពុងសម្ងំរស់នៅសោយសុខនៅឯនាយសមុទ្រ ឬយ៉ាងនោះទេ។
ដោយឡែក កាលពីពេលថ្មីៗនេះ គេក៏បានប្រទះឃើញផេក Movie Star Research របស់អ្នកនាង ស៊ិន ឧត្តមផល្លា ស្រាប់តែបានបង្ហោះពីដំណឹងរបស់លោក លាន សូនី ដែលធ្វើឲ្យអ្នកលេងបណ្តាញសង្គមភ្ញាក់ផ្អើល និងរន្ធត់ចិត្តជាខ្លាំង នោះគឺដោយសារតែលោកបានជួបគ្រោះថ្នាក់ចរាចរណ៍ កាលពីអំឡុងពេលចូលឆ្នាំចិនកន្លងមកនេះ។
អ្នកនាង ស៊ិនឧត្តមផល្លា បានឲ្យដឹងថា លោក លាន សូនី ដែលត្រូវជាម្ចាស់បទ (ឥន្ធនូបីពណ៌) ជាបទចម្រៀងដែលល្បីល្បាញខ្លាំងក្នុងទសវត្សរ៍ ៩០-២០០០ ផលិតឡើងក្នុងផលិតកម្ម រស្មីហង្សមាស បានជួបគ្រោះថ្នាក់ចរាចរណ៍ នាថ្ងៃទី១១ ខែកុម្ភៈ ឆ្នាំ២០២១ ត្រូវនឹងថ្ងៃសែនចូលឆ្នាំចិន ប៉ុន្តែព័ត៌មាននេះ មិនសូវមាននរណាដឹងឡើយ ក្រៅពីក្រុមគ្រួសារ និង មិត្តភ័ក្ដិជិតស្និទ្ធរបស់លោកប៉ុណ្ណោះដែលដឹង។
ក្នុងនោះ អ្នកនាង ស៊ិន ឧត្តមផល្លា បានបញ្ជាក់ឲ្យថា លោក លាន សូនី បន្ទាប់ពីលោករៀបចំសែនឲ្យជីដូនជីតានៅផ្ទះរបស់លោករួច លោកក៏បានជិះម៉ូតូ ដើម្បីទៅសែនបន្តនៅផ្ទះប្អូនប្រុសរបស់លោកទៀត គឺលោក លាន អាហ្វ្រីលគីនីន ដោយធ្វេសប្រហែសមិនបានពាក់មួកសុវត្ថិភាព ទើបបណ្តាលឲ្យគ្រោះថ្នាក់ម៉ូតូបុកនិងម៉ូតូ ធ្វើឲ្យថ្ងាសលើចិញ្ចើមខាងស្ដាំរបស់លោក រងរបួសធ្ងន់ធ្ងរដេរជាង១០ថ្នេរ នេះដោយសារតែលោកគិតថាមិនអីទេ លោកលាន សូនី បានផ្តាំទៀតថា សូមបងប្អូនទាំងអស់គ្នាកុំធ្វេសប្រហែស គ្រោះថ្នាក់អាចកើតឡើងគ្រប់ពេលបើយើងមិនប្រយ័ត្ន។
តែទោះយ៉ាងណា បើតាមការបង្ហោះនៅលើគណនីហ្វេសប៊ុករបស់ខ្លួន លោក លាន សូនី គឺមកទល់ពេលនេះអាការៈរបួសរបស់លោក ហាក់បានប្រសើរល្អឡើងវិញហើយៗ ទន្ទឹមនោះផងដែរ គេក៏បានឃើញមានជាពិសេសសិល្បៈករមួយចំនួន បានចូលខមិនសួរសុខទុក្ខ និងជូនពរឲ្យរៀមច្បងឆាប់ជាសះរបួស និងជួបតែសំណាងល្អ៕ រក្សាសិទ្ធិដោយ៖ លឹម ហុង
