ភ្នំពេញៈ បុរសសន្តិសុខដែលជាប់ពាក់ព័ន្ធរឿងជម្លៀសជនជាតិចិនចំនួនពីរនាក់គេចចេញពីកន្លែងធ្វើចត្តាឡីស័ក្ត នៅសណ្ឋាគារសុខា ភ្នំពេញ ដែលជាដើមចមនាំឲ្យមានព្រឹត្តិការណ៍សហគមន៍ ២០កុម្ភៈ គឺកំពុងស្ថិតនៅក្រោមការសាកសួររបស់មន្ត្រីជំនាញ នៃអនុគណៈកម្មការស្រាវជ្រាវ និងតាមដានបុគ្គលសង្ស័យថាមានផ្ទុកជំងឺកូវីដ១៩ នៅអគ្គស្នងការដ្ឋាននគរបាលជាតិ។ ប៉ុន្តែចំពោះចំណាត់ការផ្លូវច្បាប់យ៉ាងណានៅមិនទាន់ដឹងនៅឡើយទេ។
នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានមានប្រសាសន៍ប្រាប់ CEN នៅរសៀលថ្ងៃទី៥ ខែមីនា នេះថា សន្តិសុខសណ្ឋាគារសុខាភ្នំពេញកំពុងតែស្ថិតក្រោមការសាកសួរនៅអគ្គស្នងការដ្ឋាននគរបាលជាតិ នៅពេលដែលសាកសួររួចហើយ ទើបបានដឹងថា ត្រូវចាត់ការយ៉ាងណា។
នាយឧត្តមសេនីយ៍ សន្តិបណ្ឌិត នេត សាវឿន បានបញ្ជាក់យ៉ាងដូច្នេះថា “ឥឡូវនេះ នៅក្នុងដំណាក់កាលមួយដែលយើងកំពុងតែសួរ សួរចប់សព្វគ្រប់ហើយបានយើងដឹងថា ត្រូវចាត់ការយ៉ាងម៉េច”។
កម្លាំងកងរាជអាវុធហត្ថបានបញ្ជូនខ្លួនសន្តិសុខសណ្ឋាគារសុខា ភ្នំពេញ ទៅកាន់អគ្គស្នងការដ្ឋាននគរបាលជាតិនៅថ្ងៃទី៥ ខែមីនា ឆ្នាំ២០២១ នេះ បន្ទាប់ពីសន្តិសុខរូបនេះ បានធ្វើចត្តាឡីស័កនៅមណ្ឌលសុខភាពចាក់អង្រែក្រោម រយៈពេល ១៤ថ្ងៃ ដោយលទ្ធផលអវិជ្ជមានកូវីដ១៩។
សន្តិសុខដែលឃាត់ខ្លួនឈ្មោះ រ៉ែន សុធារ៉ា អាយុ៣៨ ឆ្នាំ មុខរបរ សន្តិសុខសណ្ឋាគារសុខា ភ្នំពេញ បានជួយរំដោះជនជាតិចិន ចំនួន៤នាក់ ដែលកំពុងធ្វើចត្តាឡីស័កក្នុងសណ្ឋាគារ ដែលក្នុងនោះរួមមានទាំងស្ត្រីចិនម្នាក់ ដែលគេរកឃើញមានជម្ងឺឆ្លងកូវីដ១៩ផងដែរកាលពីខែកុម្ភៈកន្លងមកនេះ៕ រក្សាសិទ្ធិដោយៈ ចេស្តារ
