ភ្នំពេញ ៖ ព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការ:ដ៏ខ្ពង់ខ្ពស់បំផុត ព្រះអង្គសព្វព្រះរាជហឫទ័យប្រោសព្រះរាជទានព្រះរាជសារអបអរសារទរ ជូនឯកឧត្តមប្រធានាធិបតី NANA ADDO DANKWA AKUFO-ADDO ក្នុងឱកាសទិវាបុណ្យឯករាជ្យជាតិ នៃសាធារណរដ្ឋហ្គាណា និងក្នុងឱកាសដែលសាធារណរដ្ឋហ្គាណា បាន ក្លាយ ជា ប្រទេស ដំបូង គេ ក្នុង ពិភព លោក ដែល ទទួល បាន វ៉ាក់សាំង បង្ការ ជំងឺ កូវីដ១៩ តាមរយៈ កម្មវិធី COVAX របស់ អង្គការ សុខភាព ពិភព លោក (WHO)។
តាមរយៈព្រះរាជសារ ចុះថ្ងៃទី០៣ ខែមីនា ឆ្នាំ២០២១ ចេញពីទីក្រុងប៉េកាំង ប្រទេសចិន ជាកន្លែងដែលព្រះអង្គ និងសម្តេចព្រះមហាក្សត្រី គង់ប្រថាប់ដើម្បីពិនិត្យតាមដានព្រះរាជសុខភាព អង្គព្រះមហាក្សត្រមានព្រះរាជបន្ទូល ៖ «ខ្ញុំសូមសម្តែងនូវការអបអរសាទរដ៏កក់ក្តៅ ជូនឯកឧត្តម និងប្រជាជនហ្កាណា ក្នុងឱកាសខួបលើកទី៦៤ នៃទិវាឯករាជ្យជាតិ នៃសាធារណរដ្ឋហ្គាណា »។
ព្រះករុណាព្រះមហាក្សត្រ ទ្រង់មានព្រះរាជបន្ទូលបន្ត៖ «ខ្ញុំសូមកោតសរសើរ ចំពោះការខិតខំប្រឹងប្រែងឥតឈប់ឈររបស់រដ្ឋាភិបាលឯកឧត្តម ក្នុងការទប់ស្កាត់ការរីករាលនៃជំងឺកូវីដ-១៩។ ហើយខ្ញុំក៏មានសេចក្តីរីករាយ ដែលប្រទេសហ្កាណាបានក្លាយជាប្រទេសដំបូងគេ ក្នុងការទទួលវ៉ាក់សាំងការពារជំងឺកូវីដ-១៩ តាមរយៈយន្តការ COVAX របស់អង្គការសុខភាពពិភពលោក»។
ព្រះអង្គ ក៏បានសម្តែងនូវជំនឿមុតមាំថា ចំណងមិត្តភាព និងកិច្ចសហប្រតិបត្តិការរវាង ព្រះរាជាណាចក្រកម្ពុជា និងសាធារណរដ្ឋហ្កាណា នឹងត្រូវបានពង្រឹងបន្ថែមទៀតនាឆ្នាំខាងមុខ៕ រក្សាសិទ្ធិដោយ៖បញ្ញាស័ក្តិ
