ភ្នំពេញ ៖ បុរសម្នាក់និងរួមដំណើរជាមួយម្នាក់ទៀត បានបើករថយន្តកូរ៉េដឹកត្រីមួយគ្រឿង ក្នុងល្បឿនលឿនខ្វះការប្រុងប្រយ័ត្នជ្រុលចង្កូតទៅបុកពីក្រោយរថយន្តធុនធំមួយគ្រឿងទៀត នៅពីមុខបណ្តាលឲ្យរថយន្តបង្កខ្ទេចផ្នែកខាងមុខទាំងស្រុង ចំណែកតៃកុងគៀបជាប់នៅក្នុងកាប៊ីនមុខ។ តែសំណាងបានប្រជាពលរដ្ឋជួយគាស់ចេញ បញ្ជូនយកទៅសង្គ្រោះបន្ទាន់ភ្លាៗ។ ចំណែកតៃកុងរថយន្តធុនធំ បានបើកទ្វារចុះរត់គេចខ្លួនបាត់ស្រមោល។
ហេតុការណ៍គ្រោះថ្នាក់ចរាចរណ៍នេះដែរ កើតឡើងនៅវេលាម៉ោង ៩ និង៣០ នាទីយប់ថ្ងៃសុក្រទី៥ ខែមីនាឆ្នាំ ២០២១ ស្ថិតនៅតាមបណ្ដោយផ្លូវវិមានឈ្នះ ឈ្នះក្នុងសង្កាត់គោករកា ខណ្ឌព្រែកព្នៅ រាជធានីភ្នំពេញ។
ប្រភពព័ត៌មានពីប្រជាពលរដ្ឋនៅកន្លែងកើតហេតុ បានឲ្យដឹងថា មុនពេលកើតហេតុគាត់បានឃើញរថយន្តធុនធំមួយគ្រឿងម៉ាកFUSO ក្បាលពណ៌សពាក់ផ្លាកលេខកំពង់ចាម 3-A2784 បើកបដោយបុរសម្នាក់ធ្វើដំណើរតាមបណ្តោយផ្លូវមហាវិថីឈ្នះ ឈ្នះ ក្នុងទិសដៅពីលិច ទៅកើតក្នុងល្បឿនមធ្យម ខណៈមកដល់ចំណុចកើតហេតុខាងលើ ស្រាប់តែត្រូវរថយន្តកូរ៉េដឹកត្រីមួយគ្រឿងទៀត ក្បាលពណ៌សពាក់ផ្លាកលេខភ្នំពេញ2-AJ 9751បើកបដោយបុរម្នាក់និងរួមដំណើជាមួយម្នាក់ទៀតធ្វើដំណើរស្របគ្នាពីក្រោយ ក្នុងទិសដៅពីលិចទៅកើតក្នុងល្បឿនលឿនជ្រុលទៅបុកចំពីក្រោយរថយន្តធុនធំពេញទំហឹងបណ្តាលឲ្យក្បាលរថយន្តបង្ក ចូលក្រោមគូទរថយន្តធុនធំនៅខាងមុខ និងគៀបជាប់តៃកុងនៅក្នុងកាប៊ីន សំណាងល្អបានប្រជាពលរដ្ឋរស់នៅជិតខាង ជួយគាស់ចេញរួចដឹកយកទៅសង្គ្រោះបន្ទាន់នៅឯមន្ទីរពេទ្យផងដែរ។
ក្រោយពេលកើតហេតុសមត្ថកិច្ចមូលដ្ឋាន សហការជាមួយនឹងជំនាញចរាចរណ៍ ចុះមកដល់រួចបានទំនាក់ទំនងទៅខាងជំនាញក្រុងឲ្យចុះមកវាស់វែងយករថយន្តទាំ២គ្រឿង ទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញរង់ចាំដោះស្រាយនៅពេលក្រោយ៕ រក្សាសិទ្ធិដោយ៖ សាមេត
