ភ្នំពេញ ៖ យុវជន២នាក់ស្រវឹងធ្លាក់ភ្នែក បានជិះម៉ូតូក្នុងល្បឿនលឿនបានរេចង្កូតជ្រុលទៅបុករថយន្តLexus570 ចតនៅលើចិញ្ចើមផ្លូវចំពីមុខពេញទំហឹងបណ្តាលឲ្យរថយន្តរងការខូចខាត ចំណែឯម្ចាស់ម៉ូតូបង្កត្រូវសមត្ថកិច្ចឃាត់បានឲ្យនៅដោះស្រាយកន្លែងកើតហេតុ។
ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង ១ និង ៤០ នាទីយប់ឈានចូលថ្ងៃសៅរ៍ទី ៦ ខែមីនាឆ្នាំ ២០២១ ស្ថិតនៅតាមបណ្ដោយផ្លូវ ២០០៤ ក្នុងសង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។
ប្រភពព័ត៌មានពីជនរងគ្រោះបានរៀបរាប់ឲ្យដឹងថា មុនពេលកើតហេតុខ្លួនបានជិះម៉ូតូមួយគ្រឿងម៉ាកហុងដាឌ្រីមសង់សេ១២៥ពណ៌ខ្មៅពាក់ផ្លាកលេខកណ្តាល1-AI 7141 ជិះឌុបគ្នា២នាក់ធ្វើដំណើរតាមបណ្តោយផ្លូវ២០០៤ ក្នុងទិសដៅពីជើងមកត្បូងគោលបំណង ចេញពីធ្វើការត្រឡប់ទៅផ្ទះវិញនៅម្តុំច្បាអំពៅ ខណៈមកដល់ចំណុចកើតហេតុខាងលើ ស្រាប់តែរាងងិតមុខឈឹងបានរេចង្កូតម៉ូតូជ្រុលទៅបុករថយន្ត Lexus 570 ពណ៌សពាក់ផ្លាកលេខ ភ្នំពេញ2-AP 7399 ចតចោលនៅលើចិញ្ចើមផ្លូវចំពីមុខពេញទំហឹង បណ្តាលឲ្យរថយន្តរងការខូចខាតផ្នែកខាងមុខ។ ចំណែកឯអ្នកបង្កជាម្ចាស់ម៉ូតូរងរបួសស្រាលបែកមាត់តិចតួច។
ក្រោយពេលកើតហេតុសមត្ថកិច្ចមូលដ្ឋាន សហការជាមួយនឹងខាងជំនាញចរាចរណ៍ខណ្ឌពោធិ៍សែនជ័យ ចុះមកដល់ ដោយម្ចាស់រថយន្តគាត់ទាមទារជាសំណង ៥០០$ តែជនរងគ្រោះជាម្ចាស់ម៉ូតូសុំសងត្រឹម២៥០$ ដោយម្ចាស់រថយន្តមិនចង់វែងឆ្ងាយ ក៏ព្រមទទួលយកលុយតែ២៥០$ បញ្ចប់រឿង នៅកន្លែងកើតហេតុតែម្តងទៅ ៕ រក្សាសិទ្ធិដោយ៖សា មេត
