បាត់ដំបង ៖ សម្តេចពិជ័យសេនា ទៀ បាញ់ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានគ្រោងរៀបចំអតីតទីតាំងមេបញ្ជាការយោធានៃរបបខ្មែរក្រហម ឲ្យប្រែក្លាយជា តំបន់ប្រវត្តិសាស្ត្រយោធា តេជោភ្នំ៣២ស្ថិតក្នុងស្រុកសំពៅលូន។
សម្តេចពិជ័យសេនា ទៀ បាញ់ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានមានប្រសាសន៍ថាតំបន់សមរភូមិប្រយុទ្ធដ៏ក្តៅគគុករវាងខ្មែរនិងខ្មែរហើយជាទីតាំងដ៏រឹងមាំរបស់អតីតក្រុមទាហានខ្មែរក្រហមនិងជាទីតាំងបញ្ជាការដ្ឋានយោធាជាន់ខ្ពស់សមរភូមិមុខក្នុងអំឡុងសង្គ្រាមមុនពេលធ្វើការផ្តាច់ខ្លួនធ្វើសមាហរណកម្មជាមួយរាជរដ្ឋាភិបាលកម្ពុជាដំបូងបង្អស់ក្នុងអំឡុងឆ្នាំ១៩៩៦។ទីតាំងអតីតសាលានយោបាយរណសិរ្ស២៥០និងផ្ទះស្នាក់នៅរបស់កម្មាភិបាលរណសិរ្ស២៥០(ហៅ កូនភ្នំ៣២)។
ក្នុងដំណើរចុះពិនិត្យមើលទីតាំងសំខាន់ៗមួយចំនួនដែលបន្សល់ទុកនូវស្លាកស្នាមដានប្រវត្តិសាស្ត្រពីអតីតរបបខ្មែរក្រហមក្នុងអំឡុងមុនពេលបញ្ចប់សង្គ្រាមនិងការធ្វើសមាហរណកម្មរបស់បងប្អូនកងទ័ពខ្មែរក្រហមនិងដំណើរទស្សនកិច្ចការងាររបស់ថ្នាក់ដឹកនាំជាន់ខ្ពស់នៃក្រសួងការពារជាតិ ដែលដឹកនាំដោយសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ កាលពីថ្ងៃទី០៥ខែមីនាឆ្នាំ២០២១។
ក្នុងអំឡុងឆ្នាំ១៩៩៦ ក្រោមគោលនយោឈ្នះ ឈ្នះ របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាបន្តបន្ទាប់កន្លងមករហូតទាល់តែបញ្ចប់សង្គ្រាមទាំងស្រុង ដោយគ្មានការបង្ហូរឈាមរវាងខ្មែរនិងខ្មែរបន្តទៀតនិងធ្វើឲ្យរបបយោធាខ្មែរក្រហមរលំរលាយទាំងស្រុង ដើម្បីវិលមករួមរស់ក្នុងសង្គមជាតិតែមួយក្រោមម្លប់នៃសុខសន្តិភាព ដោយគ្មានអ្នកចាញ់និងគ្មានអ្នកឈ្នះ។
សម្តេចពិជ័យសេនា ទៀ បាញ់ បានធ្វើការណែនាំនិងជម្រុញដល់អាជ្ញាធរខេត្តបាត់ដំបងនិងបណ្តាអង្គភាពនៃកងកម្លាំងពាក់ព័ន្ធ ដើម្បីពិនិត្យឡើងវិញនិងរួមគ្នាធ្វើការសិក្សាលម្អិតបន្ថែមនូវទិដ្ឋភាពរួមទាំងផ្នែកច្បាប់ ទាំងការកំណត់ទីតាំងជាក់ស្តែង ការកំណត់ប្លង់មេជាក់លាក់ ព្រមទាំងទីកន្លែងផ្សេងៗមួយចំនួនទៀត។ពិសេស ត្រូវដំណោះស្រាយផលប៉ះពាល់ ដើម្បីធ្វើការពិចារណាក្នុងការរៀបចំទីតាំងទាំងនោះឲ្យប្រែក្លាយទៅជា តំបន់ប្រវត្តិសាស្ត្រយោធា តេជោភ្នំ៣២ ដែលស្ថិតក្នុងស្រុកសំពៅលូនរបស់ខេត្តបាត់ដំបង ឲ្យលេចចេញជារូបរាងនៅពេលខាងមុខនេះ។
ការរៀបចំតំបន់ប្រវត្តិសាស្ត្រយោធា តេជោភ្នំ៣២ ក្នុងគោលបំណង ដើម្បីទុកជាចំណងដៃនៃប្រវត្តិសាស្ត្រក្នុងការដាក់ចេញនូវគោលនយោបាយឈ្នះឈ្នះរបស់សម្តេចតេជោប្រមុខរាជរដ្ឋាភិបាលកម្ពុជាក្រោយបញ្ចប់សង្គ្រាមទាំងស្រុងក្នុងប្រវត្តិសាស្ត្រនៃប្រជាជាតិខ្មែរទាំងមូលក្នុងរយៈពេលជាង២០ឆ្នាំមកនេះនិងដើម្បីតបស្នងគុណូបក្ការៈរបស់សម្តេចតេជា ហ៊ុនសែន ដែលធ្វើឲ្យប្រទេសជាតិមានសុខសន្តិភាពពេញលេញបរិបូរណ៍។ប្រជាជនកម្ពុជាយើងរស់នៅក្រោមម្លប់សុខសន្តិភាពរហូតមកដល់សព្វថ្ងៃនេះ។
សម្តេចពិជ័យសេនា ទៀ បាញ់ បានអំពាវនាវដល់សប្បុរសជននៅទីនេះនិងខាងក្រៅ សូមឲ្យមានការចូលរួមនិងគាំទ្រដល់ក្រុមការងារប្រវត្តិសាស្ត្រឲ្យទទួលបានជោគជ័យផ្លៃផ្កានៅពេលខាងមុខនេះ៕ រក្សាសិទ្ធិដោយៈអ៊ុងសារុំ
