បាត់ដំបង ៖ ឯកឧត្តម ងួន រតនៈ អភិបាលខេត្តបាត់ដំបង បានមានប្រសាសន៍ថា កងកម្លាំងព្រំដែនទាំងអស់ ត្រូវបន្តសហការជាមួយអាជ្ញាធរថៃ ក្នុងការផ្ដល់ព័ត៌មានគ្នាទៅវិញទៅមក ពីការវិលត្រឡប់របស់ពលករខ្មែរ ងាយស្រួលក្នុងការគ្រប់គ្រងនិងនាំពួកគេមកអនុវត្តតាមវិធានការសុខាភិបាល ដើម្បីទប់ស្កាត់កុំឲ្យមានការឆ្លងរីករាលដាលនៃជំងឺកូវីដ១៩ កាន់តែខ្លាំងនៅក្នុងសហគមន៍។ពិសេសទៀតនោះគឺត្រូវតាមចាប់ឲ្យបានពួកមេខ្យល់ដែលកំពុងនាំពលករលួចឆ្លងដែនខុសច្បាប់នេះ។
អាជ្ញាធរខេត្តបាត់ដំបង បានបង្ហាញនូវការព្រួយបារម្ភពីការបន្តលួចឆ្លងដែនដោយខុសច្បាប់របស់ពលករខ្មែរ ដែលត្រឡប់មកពីប្រទេសថៃ តាមរយៈការអូសទាញពីសំណាក់ពួកមេខ្យល់ ពិសេសនៅរដូវចូលឆ្នាំប្រពៃណីជាតិនៅពេលខាងមុខ អាចមានករណីគេចវេសពីការធ្វើចត្តាឡីស័ក។
ការលើកឡើងបែបនេះ ក្នុងពិធីជួបសំណេះសំណាលនិងនាំយកសម្ភារប្រើប្រាស់ ស្បៀងអាហារទៅចែកជូនកងកម្លាំងការពារព្រំដែនតាមបណ្ដាស្រុកជាប់ព្រំដែន មានស្រុកកំរៀង ភ្នំព្រឹកនិងសំពៅលូន កាលពីរសៀលថ្ងៃទី០៥ខែមិនាឆ្នាំ២០២១។
ឯកឧត្តម ងួន រតនៈ អភិបាលខេត្តបាត់ដំបង បានមានប្រសាសន៍ថាទោះបីបច្ចុប្បន្នលំហូររបស់ពលករខ្មែរ ត្រឡប់មកពីប្រទេសថៃ បានថយចុះក៏ពិតមែន ប៉ុន្តែពួកគេអាចនឹងមានបុកមកច្រើននៅពេលរដូវចូលឆ្នាំ។
យោងតាមរបាយការណ៍រដ្ឋបាលខេត្តបាត់ដំបង បានបង្ហាញថាចាប់ពីមានការឆ្លងរីករាលដាលជំងឺកូវីដ១៩ ក្នុងសហគមន៍នៅខេត្តសាមុទសាខនប្រទេសថៃ មានពលករឆ្លងដែនតាមច្រកនានាជាប់ខេត្តបាត់ដំបងចំនួនជាង ១០០០០នាក់(មួយម៉ឺននាក់)បញ្ចប់ ចត្តាឡីស័កអនុញ្ញាតឱ្យត្រឡប់ទៅផ្ទះវិញជិត ៧០០០នាក់ នៅកំពុងធ្វើចត្តាឡីស័កជិត ៣០០០នាក់និងពលករមួយចំនួនទៀត ត្រូវបានដឹកតាមរថយន្តរបស់កងទ័ព ទៅកាន់រាជធានីខេត្តសាមីខ្លួន ដើម្បីធ្វើចត្តាឡីស័កបន្តទៀត។សម្រាប់មណ្ឌលចត្តាឡីស័កនៅខេត្តបាត់ដំបង នាពេលបច្ចុប្បន្នមានចំនួន១១កន្លែង ដែលស្ថិតនៅក្នុងនៅមាននៅស្រុកកំរៀង សំពៅលូន ភ្នំព្រឹក បវេល ថ្មគោល សំឡូត បាណន់ ឯកភ្នំ រតនមណ្ឌល មោងឫស្សីនិងមន្ទីរពេទ្យបង្អែកខេត្តបាត់ដំបង៕ រក្សាសិទ្ធិដោយៈអ៊ុងសារុំ
