ខេត្តព្រះសីហនុ ៖ ដើម្បីពន្លឿនប្រសិទ្ធភាពនៃការចាក់វ៉ាក់សាំងរបស់ក្រុមគ្រូពេទ្យ និងចៀសវាងការមកច្រើនកកកុញ ដែលមានហានិភ័យក្នុងការឆ្លងរាលដាលនៃជំងឺកូវីដ-១៩ នៅក្នុងបរិវេណទីតាំងចាក់វ៉ាក់សាំងការពារជំងឺកូវីដ-១៩នោះ រដ្ឋបាលខេត្តព្រះសីហនុ តម្រូវឲ្យប្រជាពលរដ្ឋចុះឈ្មោះឱ្យបានត្រឹមត្រូវនៅតាមមូលដ្ឋានឃុំ-សង្កាត់ ដើម្បីឱ្យការចាក់វ៉ាក់សាំងប្រព្រឹត្តទៅមានរបៀបរៀបរយ មានគម្លាតសុវត្ថិភាព។
ការរៀបចំរបៀបរៀបរយនៃការចាក់សាំងដោយតម្រូវឲ្យប្រជាពលរដ្ឋចុះឈ្មោះបែបនេះ របស់ រដ្ឋបាលខេត្តព្រះសីហនុ បានធ្វើឡើងនៅថ្ងៃទី០៧ ខែមីនា ឆ្នាំ២០២១ ក្នុងសេចក្ដីជូនដំណឹងមួយ បានកំណត់ឱ្យប្រជាពលរដ្ឋដែលស្ម័គ្រចិត្តចាក់វ៉ាក់សាំងការពារជំងឺកូវីដ-១៩ ត្រូវទៅចុះឈ្មោះនៅតាមសាលាឃុំ-សង្កាត់ ដើម្បីបង្កភាពងាយស្រួលដល់ប្រជាពលរដ្ឋ ក្នុងការទទួលបានការចាក់វ៉ាក់សាំងប្រកបដោយភាពច្បាស់លាស់ រក្សាបានសណ្ដាប់ធ្នាប់ និងគម្លាតសុវត្ថិភាព តាមការណែនាំរបស់ក្រសួងសុខាភិបាល។
រដ្ឋបាលខេត្តព្រះសីហនុ បានឲ្យដឹងទៀតថា ក្នុងរយៈពេល២ថ្ងៃមកនេះ មានប្រជាពលរដ្ឋមួយចំនួន បានស្ម័គ្រចិត្តទៅចាក់វ៉ាក់សាំងការពារជំងឺកូវីដ-១៩ នៅមន្ទីរពេទ្យបង្អែកខេត្តព្រះសីហនុ ក៏ដូចជានៅសាលាបឋម-អនុវិទ្យាល័យតេជោសែនកម្មករផងដែរ តែមិនទាន់ទទួលបានការចាក់វ៉ាក់សាំងនៅឡើយ ដោយសារពួកគាត់មិនទាន់បានចុះឈ្មោះ និងទទួលបានការអញ្ជើញពីអាជ្ញាធរមូលដ្ឋានឃុំ-សង្កាត់ ដូច្នេះសូមបងប្អូនប្រជាពលរដ្ឋអញ្ជើញទៅចុះឈ្មោះ ដើម្បីបានចាក់វ៉ាក់សាំងការពារកូវីដ-១៩ នៅតាមមូលដ្ឋានឃុំ-សង្កាត់។
ជាមួយគ្នានេះដែរ រដ្ឋបាលខេត្តព្រះសីហនុ បានអំពាវនាវឱ្យប្រជាពលរដ្ឋស្នាក់នៅក្នុងផ្ទះមួយរយៈពេល ដើម្បីឱ្យរដ្ឋបាលខេត្តគ្រប់គ្រងស្ថានការណ៍ជំងឺកូវីដ-១៩ ដែលកំពុងផ្ទុះក្នុងសហគមន៍ បានល្អប្រសើរសិន នឹងរៀបចំការចាក់វ៉ាកសាំងនេះ ជូនប្រជាពលរដ្ឋតាមក្រោយទៀត៕ រក្សាសិទ្ធិដោយ ពិសិដ្ឋ CEN
