ភ្នំពេញ ៖ លោកស្រី យក់ សម្បត្តិ រដ្ឋលេខាធិការក្រសួងសុខាភិបាល នៅព្រឹកថ្ងៃទី០៨ ខែមីនា ឆ្នាំ២០២១ បានឲ្យដឹងថា ថវិកា ២០០លានរៀលទៀត ផ្ដល់ដោយសម្ដេចតេជោ ហ៊ុន សែន នាយករដ្ឋមន្ត្រី ឧបត្ថម្ភជូនខេត្តបន្ទាយមានជ័យ និងផ្ដល់សម្ភារៈប្រើប្រាស់ គ្រឿងឧបភោគបរិភោគ ជាច្រើនទៀត ដល់ខេត្តទាំង ៧ជាប់ព្រំដែនថៃ ដើម្បីដោះស្រាយការហូបចុករបស់ពលករខ្មែរដែលត្រឡប់មកពីប្រទេសថៃ។
ការផ្តល់ជំនួយដល់បណ្តាខេត្តកម្ពុជា ដែលនៅជាប់ព្រំដែនថៃ បានធ្វើឡើងជាបន្តបន្ទាប់ ដើម្បីរៀបចំការធ្វើចត្តាឡីស័កសម្រាប់ពលករខ្មែរ ដែលត្រឡប់ពីប្រទេសថៃ ក្រោយពេលប្រទេសថៃ បានផ្ទុះឡើងនូវការឆ្លងជំងឺកូវីដ-១៩ ក្នុងសហគមន៍យ៉ាងខ្លាំងក្លា ដែលផ្តើមចេញពីខេត្តសាមុតសាខន ប្រទេសថៃ។
លោកស្រី យក់ សម្បត្តិ រដ្ឋលេខាធិការក្រសួងសុខាភិបាល ឲ្យដឹងទៀតថា គិតចាប់ពីថ្ងៃទី០៨ ដល់ថ្ងៃទី១៦ ខែមីនា សម្តេចតេជោ ហ៊ុន សែន បានផ្តល់ជំនួយឃីត សរុប ៥៦,១០០ ទឹកបរិសុទ្ធ ៦៨,០០០កេស និងមីកញ្ចប់ ២៩,២០០កេស និងថវិកាជាច្រើនពាន់លានរៀល។ ដោយឡែកចំនួនពលករវិញ បើគិតត្រឹមថ្ងៃទី១៤ ខែកុម្ភៈ ឆ្នាំ២០២១ កន្លងទៅនេះ មានពលករខ្មែរជាង ៣.៥ម៉ឺននាក់ហើយបានត្រឡប់មកប្រទេសកម្ពុជាវិញ។
នាពេលកន្លងមក ធ្លាប់មានការភាន់ច្រឡំថា សម្ដេចតេជោសម្រេចលើកលែងការធ្វើចត្តាឡីស័ក ចំពោះពលករដែលវិលត្រឡប់មកពីថៃចូលកម្ពុជា នៅតាមខេត្តជាប់ព្រំដែន ប៉ុន្តែធាតុពិត សម្ដេចគ្រាន់តែចង់ឲ្យពួកគេផ្លាស់ប្ដូរកន្លែងធ្វើចត្តាឡីស័កនៅឯស្រុកកំណើតរបស់ពួកគេតែប៉ុណ្ណោះ ដោយចាត់ចែងកងទាហានជាអ្នកដឹកជញ្ជូន ព្រោះវាមានភាពងាយស្រួលក្នុងការចាំបាច់ណាមួយ និងដើម្បីបន្ធូរបន្ថយភាពចង្អៀតណែនណាន់អ្នកធ្វើចត្តាឡឺស័កនៅតាមបណ្ដាខេត្តផងដែរ។
សម្ដេចតេជោ បានបញ្ជាក់ហើយបញ្ជាក់ទៀតថា មិនអាចមិនធ្វើចត្តាឡីស័កនោះទេ ហើយក៏មិនដូចការយល់ខុសនោះដែរ ពោលគឺ សម្ដេចតេជោ មិនបានអនុញ្ញាតដូច្នេះឡើយ គឺមានតែអំពាវនាវទៅកាន់បុគ្គលសាមី ឱ្យចូលរួមធ្វើចត្តាឡីស័ក កុំមានការគេចវេះ និងបានបញ្ជាទៅកាន់អាជ្ញាធរ-សមត្ថកិច្ចពាក់ព័ន្ធ ឱ្យពង្រឹងការត្រួតពិនិត្យការធ្វើចត្តាឡីស័ក ឱ្យបានតឹងរ៉ឹងថែមទៀត។ ដូច្នេះសូមកុំមានការយល់ច្រឡំតទៅទៀតឱ្យសោះ៕ រក្សាសិទ្ធិដោយ ពិសិដ្ឋCEN
