នេះជាហេតុការណ៍ដ៏ស្លុតរន្ធត់មួយ ខណៈដែលក្មេងប្រុសអាយុ ៨ ឆ្នាំ ម្នាក់ ត្រូវបានសត្វក្រពើមួយក្បាល លេបយកទៅបាត់ ខណៈក្មេងនោះបានទៅហែលទឹកទន្លេ នៅក្នុងប្រទេសឥណ្ឌូនេស៊ី។
យោងតាមការចុះផ្សាយរបស់សារព័ត៌មាន 7News បានឲ្យដឹងថា ក្មេងប្រុសរងគ្រោះ បានទៅហែលទឹក នៅកោះ Borneo ជាមួយប្អូនប្រុសម្នាក់ទៀត ខណៈពុករបស់ពួកគេកំពុងឈរមើលនៅក្បែរផ្ទះ នៅពេលនោះ ក្មេងប្រុសនោះ ក៏ស្រាប់តែត្រូវសត្វក្រពើមួយក្បាលត្របាក់យកទៅបាត់តែម្តង។
ក្រោយឃើញបែបនេះ ឪពុករបស់ក្មេងប្រុសរងគ្រោះ ក៏បានលោតចូល ដើម្បីជួយសង្គ្រោះកូនរបស់ខ្លួន ប៉ុន្តែ ជាអកុសល សត្វក្រពើនោះបានគេចខ្លួនបាត់ទៅហើយ។
មន្ត្រីភ្នាក់ស្វែងរក និងជួយសង្គ្រោះបន្ទាន់ក្នុងតំបន់ ដែលគេស្គាល់ឈ្មោះថា Oktavianto បាននិយាយថា «គាត់បានដេញតាមក្រពើ និងវាយវាដោយដៃទទេរបស់គាត់ ប៉ុន្តែ គាត់មិនអាចយកឈ្នះវាបានឡើយ»។
នៅថ្ងៃបន្ទាប់មក អ្នកភូមិក្នុងតំបន់នោះ បានចាប់ផ្តើមស្វែងរក និងចាប់បានក្រពើដ៏ធំ ប្រវែង ៦ ម៉ែត្រ ហើយក៏បានសម្លាប់វាចោលផងដែរ។ ក្រោយវះពោះវាបើកមើល ពួកគេបានទាញសាកសពក្មេងប្រុសអាយុ ៨ ឆ្នាំ នៅចំពោះក្រុមគ្រួសារ ដែលបានស្រែកទ្រហ៊ោយំយ៉ាងខ្លាំង។
លោក Oktavianto បាននិយាយថា ទន្លេនេះត្រូវបានគេដឹងថា ជាជម្រករបស់សត្វក្រពើ ប៉ុន្តែ អ្នកស្រុកតែងតែទៅទីនោះ ដើម្បីងូតទឹក និងយកទឹកសម្រាប់ចម្អិនអាហារ៕ រក្សាសិទ្ធិដោយ៖ លឹម ហុង
