ភ្នំពេញ៖ បើតាមសម្តេចហ៊ុន សែន ក្នុងស្ថានភាពបែបនេះ សម្ដេចបានចេញបញ្ជាឱ្យស្ថាប័នរបស់រាជរដ្ឋាភិបាល និងស្ថាប័ននីតិប្បញ្ញត្តិ កាត់បន្ថយធ្វើការនៅក្នុងកន្លែង ហើយមកធ្វើការតាមផ្ទះ ដោយតម្រូវឱ្យមនុស្សនៅប្រចាំការបានហើយ ។ ស្ថានភាពបែបនេះ ពិតជាអាក្រក់ដោយសារការឆ្លងបានដល់នគរបាល សិល្បករ សិល្បការិនីផងដែរ។
នៅក្នុងប្រទេសកម្ពុជានាថ្ងៃទី ៨ មីនា ឆ្នាំ ២០២១នេះ បានបញ្ជាក់ពីការរកឃើញអ្នកឆ្លងជំងឺកូវីដ- ១៩ ថ្មីចំនួន៤៩នាក់បន្ថែមទៀត ដែលជាករណីវិជ្ជមានពាក់ព័ន្ធក្នុង«ព្រឹត្តិការណ៍សហគមន៍ ២០កុម្ភៈ»។ចំនួននេះ គឺគិតតែរាជធានីភ្នំពេញ ខេត្តព្រះសីហនុ ខេត្តព្រៃវែង និងផ្នែកខ្លះនៃខេត្តកណ្តាល។នេះបើតាមសម្តេច ហ៊ុន សែន ថ្លែងសារពិសេសជូនប្រជាពលរដ្ឋនៅយប់ថ្ងៃទី ៨ មីនា ឆ្នាំ២០២១នេះ។
ចំណែកវិស័យឯកជនវិញ សម្តេចហ៊ុន សែន បានអំពាវនាវឱ្យបង្កើនការប្រុងប្រយ័ត្ន និងកាត់បន្ថយបុគ្គលិក និងធ្វើការប្តូរគ្នា ដើម្បីកាត់បន្ថយមនុស្សច្រើននៅតាមផ្លូវ ហើយសម្តេចក៏បានស្នើឱ្យមាតាបិតាទាំងអស់ត្រូវហាមកូនៗកុំចេញក្រៅផ្ទះ ហើយបើចេញសូមគោរពតាមគោលការណ៍របស់ក្រសួងសុខាភិបាល ។
ក្នុងស្ថានភាពបែបនេះ សម្តេចតេជោ បានចេញបទបញ្ជា ឲ្យស្ថាប័ននីមួយៗរបស់រាជរដ្ឋាភិបាល និងសូមអំពាវនាវស្ថាប័ននិតិបញ្ញត្តិ សុំផ្អាកជាបណ្តោះអាសន្ននូវស្ថាប័ន ប៉ុន្តែយើងត្រូវមានមនុស្សប្រចាំការ តែយ៉ាងហោចណាស់ ត្រូវមានមនុស្សតិចតួច មនុស្សភាគច្រើនត្រូវធ្វើការនៅតាមផ្ទះ ក្នុងរយៈពេលយ៉ាងតិច ៧ថ្ងៃ ក្រោយ៧ថ្ងៃហើយនោះ រាជរដ្ឋាភិបាល នឹងជូនដំណឹងបន្ថែមទៅកាន់ស្ថាប័នទាំងនោះ។ ធ្វើយ៉ាងដូច្នេះយើងអាចបញ្ជៀសបាន ហានិភ័យដែលយើងមិនទាន់ស្គាល់ នឹងអ្នកដែលមានការពាក់ព័ន្ធ ព្រោះពិតជាច្របូកច្របល់ខ្លាំងណាស់នៅពេលនេះ ព្រោះមានការឆ្លងក្នុងក្របខណ្ឌ នគរបាលជាតិ មន្ត្រីរាជការ រហូតដល់សិល្បករ សិល្បការិនី ផងដែរ ។
ដូច្នេះការបិទស្ថាប័នជាបណ្ដោះអាសន្ននេះ មិនមែនជាការបិទទាំងស្រុងទេ ក៏ប៉ន្តែសូមឲ្យកាត់បន្ថយ ចំនួនមនុស្សយ៉ាងតិច ៩០ភាគរយ ហើយមានមនុស្ស១ចំនួនតូចប៉ុណ្ណោះ ដែលនៅប្រចាំការធ្វើការនៅតាមស្ថាប័ន ។
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានដាក់ឱ្យអនុវត្តន៍រួចហើយនូវវិធានការ ៣ការពារ (ពាក់ម៉ាស់ លាងដៃឱ្យបានញឹកញាប់ និងរក្សាគម្លាតសុវត្ថិភាពបុគ្គលមួយម៉ែត្រកន្លះឡើង) និង ៣កុំ (កុំទៅកន្លែងដែលមានមនុស្សកុះករកកកុញច្រើន កុំទៅកន្លែងដែលបិទជិត គ្មានខ្យល់ចេញចូល ប្រើម៉ាស៊ីនត្រជាក់ច្រើនពេក និងកុំចាប់ដៃគ្នា កុំកៀកស្មាគ្នា កុំឱបគ្នា នៅពេលជួបគ្នាធ្វើគាវរកិច្ច គ្នា ជាដើម) ដែលចាំបាច់នៅពេលនេះ ត្រូវតែអនុវត្តន៍ឱ្យបានគ្រប់គ្នាៗ ដោយមិនមានការធ្វេសប្រហែសឡើយ។
ត្រូវអនុវត្តន៍ការធ្វើចត្តាឡីស័កចំនួន ១៤ថ្ងៃ ឱ្យបានត្រឹមត្រូវសម្រាប់អ្នកដែលតម្រូវឱ្យធ្វើចត្តាឡីស័ក នៅតាមទី កន្លែងចត្តាឡីស័កក្តី ឬនៅតាមផ្ទះសម្បែងរបស់ខ្លួន។
ត្រូវចូលរួមធ្វើតេស្តវិភាគរកវីរុសកូរីដ-១៩ ប្រសិនបើសង្ស័យថាមានការប៉ះពាល់អ្នកជំងឺកូវីដ-១៩ ឬមានរោគសញ្ញាសង្ស័យជំងឺកូវីដ-១៩ ឬមានជំងឺផ្តាសាយដែលសង្ស័យ និងដាក់ខ្លួនឱ្យនៅដាច់ដោយឡែកពីគេភ្លាមៗ។
ត្រូវគ្រប់គ្រងកូនចៅនៅតាមគ្រួសារនីមួយៗឱ្យបានហ្មត់ចត់ជាទីបំផុត ដោយឱ្យនៅផ្ទះ។ សម្រាប់មនុស្សពេញវ័យ ប្រសិនបើមិនមានការចាំបាច់ ត្រូវនៅផ្ទះ ត្រូវផ្អាក ឬពន្យារពេល នូវរាល់ការជួបជុំ ឬការប្រមូលផ្ដុំស៊ីផឹកដែលមានការ ជួបជុំគ្នាច្រើន ដូចជាពិធីរៀបអាពាពិពារហ៍ ពិធីឡើងផ្ទះ ឬពិធីជួបជុំគ្នាច្រើន និងចាំបាច់ត្រូវតែអនុវត្តន៍នូវវិធានការ ការពារតាមការណែនាំរបស់ក្រសួងសុខាភិបាល ដែលអាចកាត់បន្ថយបាន ពីមនុស្សម្នាក់ ទៅមនុស្សម្នាក់ទៀតដោយមិនដឹងខ្លួន។ជាអតិប្បរិមានូវហានិភ័យនៃការចម្លងបន្តគ្នា។
ក្រសួង/ស្ថាប័ននិតិប្រតិបត្តិ និងនិតិបញ្ញត្តិ ត្រូវកាត់បន្ថយចំនួនបុគ្គលិក-មន្ត្រីរាជការមកធ្វើការនៅតាមក្រសួង/ស្ថាប័ន របស់ខ្លួន ដោយតម្រូវឱ្យធ្វើការតាមផ្ទះ ឬតាមអនឡាញវិញ ក្នុងរយៈពេលយ៉ាងតិច ៧ថ្ងៃ។ សូមរក្សាទុកបុគ្គលិក មន្ត្រីរាជការ មួយចំនួនក្នុងកម្រិតតិច សម្រាប់ធ្វើការនៅក្នុងក្រសួង-ស្ថាប័ន ដោយមានការផ្លាស់វេនគ្នា។
ត្រូវតែមានការប្រុងប្រយ័ត្នខ្ពស់បំផុត នៅក្នុងដំណាក់កាលនៃការរុករកករណីឆ្លងវីរុសវីរុសកូវីដ-១៩ ដោយគ្រប់ទី កន្លែង រួមទាំងរោងចក្រ សហគ្រាស ហាងលក់ឥវ៉ាន់ ឬសម្ភារៈ ភោជនីយដ្ឋាន -អាហារដ្ឋាន សណ្ឋាគារ ឬកន្លែង កម្សាន្តនានាជាដើម ចាំបាច់ ត្រូវតែមានការត្រួតពិនិត្យបុគ្គលិក ឬអតិថិជន របស់ខ្លួនឱ្យបានហ្មត់ចត់ជាទីបំផុត មុន អនុញ្ញាតឱ្យចូលទៅកាន់ទីកន្លែងរបស់ខ្លួន ចាំបាច់ត្រូវមានស្កេន QR Code (តាមការណែនាំរួចហើយ)។ ប្រសិនបើ បុគ្គល-អតិថិជនណាមិនមានពាក់ម៉ាស់ មិនមានវាស់កំដៅ មិនមានលាងដៃជាមួយអាល់កុល និងមិនរក្សាគម្លាត សុវត្ថិភាពបុគ្គលបានត្រឹមត្រូវទេនោះ សូមកុំអនុញ្ញាតឱ្យចូលទៅទីកន្លែងរបស់ខ្លួន ដើម្បីចូលរួមបញ្ចៀសហានិភ័យនៃការចម្លងវីរុសកូវីដ-១៩ នៅតាមទីកន្លែងនោះជាយថាហេតុ៕ រក្សាសិទ្ធិដោយ៖បញ្ញាស័ក្តិ
