ភ្នំពេញ ៖ នេះជារឿងគួរឲ្យភ្ញាក់ផ្អើល និងក៏គួរឲ្យស្រណោះជាខ្លាំងផងដែរ ខណៈគេបានឃើញឪពុកម្តាយ បានបង្ខំចិត្តតែងខ្លួនស្ថិតក្នុងឈុតអាពាហ៍ពិពាហ៍ជំនួស ព្រោះតែកូនកំលោះកូនក្រមុំ ត្រូវជាប់គាំងនៅឯខេត្តព្រះសីហនុ មិនអាចចេញរួច ខណៈអាជ្ញាធរកំពុងហាមការចេញចូលខេត្ត ព្រោះតែបញ្ហាកូវីដ។
នេះបើយោងតាមគណនីហ្វេសប៊ុកឈ្មោះ Ah Jing កាលពីថ្ងៃទី០៧ ខែមីនា ឆ្នាំ២០២១ កន្លងទៅថ្មីៗនេះ បានបង្ហោះរូបថតឪពុកម្តាយតែងខ្លួនជំនួសកំលោះកូនក្រមុំ និងភ្ជាប់សារបញ្ចាក់ប្រាប់ឲ្យដឹងថា៖ «ពិធីចាប់ផ្ដើមហើយ រោងការគ្មានកូនកំលោះក្រមុំ ដោយសារកូវីដ គេមិនឲ្យចេញពីខេត្តព្រះសីហនុ មានតែម៉ែឪ តែងខ្លួនទទួលជំនួស ខំពន្យារម្ដងហើយនៅមិនផុតកូវីតទៀត ជូនពរបងទាំងពីរ ស្រឡាញ់គ្នា មើលថែគ្នា»។
ក្រោយពីបានឃើញបែបនេះ អ្នកប្រើប្រាស់បណ្តាញសង្គមមួយចំនួន បានបញ្ចេញមតិលើកឡើងថា៖ «បានតែ អាណិតពួកគាត់ជំនួស , អ្វីៗកើតបានគ្រប់រឿង សម័យកូវីដនេះ , មិនសើចមិនយំ កម្សត់ជាងសម័យសង្គ្រាមទៅទៀត , អ្នកកំពង់សោម មិនអាចចេញទៅ ក្រៅ ខេត្តបានទេ គេ បិទផ្លូវ យាមកាម តឹងរ៉ឹងណាស់»។ តែទន្ទឹមនោះ ក៏មានអ្នកស្តីបន្ទោសឲ្យថា៖ «ពិបាក១ឆ្នាំជាងហើយ ចឹងកុំទាន់អាលការ ដឹងថាពិបាកដែរ អីប្រញាប់មែស តាំងមានបញ្ហា បន្ទោសគេឯង។ ដឹងថាបញ្ហាដែរ មិនបាច់ទាន់បោះធៀបអញ្ជើញអីទេ ចាំស្ងាត់ស្រួលបួលសិន អាច2-3ឆ្នាំអីសិន ចាំការបើមិនចង់ពិបាក»។
ជាឆ្លើយតបទៅនឹងការស្តីបន្ទោសនេះ ក៏មានអ្នកខ្លះបានលើកឡើងថា៖ «ពន្យារម្តងហើយ ណាមួយគិតថា សែនដូនតា ហើយៗ ក៏សម្រេចឲ្យម៉ែឪធ្វើ ជំនួសទៅ , បងបើ មិនខំម៉េច កក់គេ អស់ហើយ ណា ១ ដើរជូនធៀបភ្ញៀវរួចទៀត មិននឹកស្មានថា វា កើតរឿងអុីចឹងទេ ព្រោះគ្មានអ្នកចង់អោយកើតឡើង ហើយណាមួយទៀត ក៏បានសង្កេតឃើញថា មង្គលការដទៃក៏គេធ្វើធម្មតាដែរ»។
យ៉ាងណាមិញ នៅពេលមានការសួរនាំថា តើពិធីមង្គលការដ៏កំសត់នេះ ធ្វើឡើងនៅស្រុកភូមិខេត្តណា ម្ចាស់គណនីហ្វេសប៊ុកខាងលើ ក៏បានឆ្លើយប្រាប់តាមរយៈខមិនថា មង្គលការនេះធ្វើឡើងនៅឃុំព្រែកចំលាក់ ស្រុកឆ្លូង ខេត្តក្រចេះ ខណៈកូនកំលោះកូនក្រមុំ កំពុងជាប់គាំងនៅកំពង់សោម៕ រក្សាសិទ្ធដោយ៖ លឹម ហុង
