ភ្នំពេញៈ លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក បានបញ្ជាឲ្យមេបញ្ជាការយោធភូមិភាគ មេបញ្ជាការងងពលធំ បញ្ជាការដ្ឋានចំណុះកងទ័ពជើងគោក ត្រៀមរថយន្តចំនួន ២០៤ គ្រឿង សម្រាប់ដឹកពលករខ្មែរដែលត្រឡប់មកពីប្រទេសថៃ ដើម្បីមកចូលរួមបុណ្យចូលឆ្នាំខ្មែរខាងមុខនេះ។
លោកឧត្តមសេនីយ៍ឯក ហ៊ុន ម៉ាណែត ដោយសារស្ថានភាពនៅតាមព្រំដែនប្រជាពលរដ្ឋបុកមកខ្លាំង ដើម្បីត្រៀមលក្ខណៈចូលឆ្នាំខ្មែរខាងមុខនេះ គឺសម្តេចតេជោ ហ៊ុន សែន បានដាក់បទបញ្ជាឲ្យរុញកម្លាំងកងទ័ពដើម្បីជួយដឹកជញ្ជូនប្រជាពលករដែលត្រឡប់មកពីថៃ។ ចំពោះការរៀបចំកម្លាំងដំបូង គឺប្រើប្រាស់កម្លាំង ២០៤គ្រឿង តាមផែនការដឹកជញ្ជូនដែលមានស្រាប់ របស់កងពលលេខ៩០ ចំនួន ១០៤គ្រឿង និងកងពល៩៩ ចំនួន ១០០គ្រឿង។
សូមជមក្រាបថា តាមរយៈសារសំឡេងកាលពីថ្ងៃទី០៧ ខែមីនា ឆ្នាំ២០២១ សម្ដេចតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា បានប្រកាសថា សម្រាប់អ្នកដែលចូលមកកម្ពុជា ហើយមានសុខភាពល្អធម្មតា ពិសេសនៅតាមច្រកព្រំដែន មិនចាំបាច់ធ្វើចត្ដាឡីស័កនៅព្រំដែនទៀតទេ គឺតម្រូវឲ្យពួកគាត់ទៅធ្វើចត្ដាឡីស័កនៅមូលដ្ឋានវិញ ដែលភារៈនៃការតាមដាននៅមូលដ្ឋាន គឺអាជ្ញាធរជាអ្នកទទួលខុសត្រូវ។ សម្រាប់មណ្ឌលចត្ដាឡីស័កនៅតាមព្រំដែននៅតែដំណើរដដែល ប៉ុន្ដែគឺទទូលសម្រាប់តែអ្នកដែលមានសញ្ញា នៃការជំងឺកូវីដ១៩ តែប៉ុណ្ណោះ។ ការសម្រេចដូចនេះដោយសម្ដេចតេជោ បានបញ្ជាក់ថា ដោយសារតែស្ថានភាពក្នុងប្រទេសថៃ បានថមថយនៃការរាលដាលជំងឺកូវីដ១៩ ហើយពលករដែលធ្វើដំណើរមកកម្ពុជានៅព្រំដែន អំឡុង១ខែនេះគ្មានអ្នកជំងឺកូវីដ១៩ឡើយ៕ រក្សាសិទ្ធិដោយៈ ចេស្តារ
