ភ្នំពេញ ៖ រថយន្ត ២ គ្រឿងបើកបរមិនចេះអធ្យាស្រ័យ បណ្ដាលឲ្យបុកគ្នាត្រង់ចំណុចផ្លូវបែកជាបួនរងការខូចខាតទាំងសង្ខាង សំណាងល្អ ដែលមិនមានគ្រោះថ្នាក់ដល់អ្នកបើកបរទាំងសងខាងក៏ដូចជាអ្នកធ្វើដំណើរតាមដងផ្លូវឡើយ។
ហេតុការណ៍នេះ បានកើតឡើងនៅវេលាម៉ោង១២ និង០០ នាទីថ្ងៃទី ៩ ខែមីនាឆ្នាំ២០២១ ដែលស្ថិតនៅតាមបណ្ដោយផ្លូវលេខ ៤៧ កែងនឹងផ្លូវ ៨៤ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។
យោងតាមប្រភព ព័ត៌មាននៅកន្លែងកើតហេតុ បានឲ្យដឹងថាមុនពេលកើតហេតុ គេឃើញរថយន្តម៉ាកកូរ៉ូឡាពណ៌ស្ករពាក់ស្លាកលេខភ្នំពេញ2H-4022 ជិះគ្នា ២ នាក់ទិសដៅពីជើងមកត្បូងតាមបណ្តោយផ្លូវលេខ ៤៧ លំមកដល់ត្រង់ចំណុចកើតហេតុក៏មានរថយន្តម៉ាកហាយឡិនឌ័រពណ៌សពាក់ផ្លាកលេខភ្នំពេញ2BH-2409 បើកបរដោយស្ត្រីម្នាក់ទិសដៅពីកើតមកលិចតាមបណ្ដោយផ្លូវលេខ ៨៤ បានបុកជាមួយនឹងរថយន្តកូរ៉ូឡាចំទ្វារខាងក្រោយបណ្ដាលឲ្យរថយន្តកូរ៉ូឡាជ្រុលទៅមុខបុកចំកាងដែករថយន្តដឹកទំនិញធុនធំមួយទៀតបណ្ដាលឲ្យរងការខូចខាតផ្នែកខាងមុខនៃចង្កៀងឆ្វេងនៃរថយន្តកូរ៉ូឡាយ៉ាងដំណំ ។
ចំណែករថយន្តធុនធំដឹកទំនិញដោយរថយន្តគេបុកគាត់ហើយរថយន្តគាត់មិនមានខូចខាតអ្វីនោះក៏សុំតែមួយរួចខ្លួនរួចបើកពីកន្លែងកើតហេតុទៅបាត់ បន្សល់ទុកនៅតែរថយន្តហាយឡិនឌ័រនិងកូឡានៅដោះស្រាយសម្របសម្រួលគ្នា។
ក្រោយពេលកើតហេតុសមត្ថកិច្ចមូលដ្ឋានបានមកដល់និងធ្វើការទំនាក់ទំនងទៅជំនាញចរាចរណ៍ខណ្ឌចុះមកដល់ទីតាំងកន្លែងកើតហេតុបានឲ្យភាគីទាំងពីរធ្វើការចរចាគ្នាដោយភាគីខាងរថយន្តហាយឡិនឌ័រ ព្រមចេញជាសំណងសងទៅខាងរថយន្តកូរ៉ូឡាចំនួន ១៥០ដុល្លារបញ្ចប់រឿងនៅនឹងកន្លែងកើតហេតុ៕ រក្សាសិទ្ធិដោយ៖សារឿន
