ភ្នំពេញ ៖ ដូចដែលប្រិយមិត្តមួយចំនួនធំ បានទទួលជ្រាបហើយ ទាក់ទងនឹងព័ត៌មានករណីពិធីការិនីដ៏ល្បីឈ្មោះប្រចាំស្ថានីយ៍ទូរទស្សន៍ ហង្សមាស អ្នកនាង កែវ ចាន់នីមល ត្រូវបានធ្វើតេស្តវិជ្ជមានកូវីដ-១៩។
ទាក់ទងនឹងមូលហេតុឆ្លងកូវីដ-១៩ នេះផងដែរ សាម៉ីខ្លួនផ្ទាល់អ្នកនាង នីមល ក៏បានបញ្ជាក់ប្រាប់តាមទូរស័ព្ទតាម ជាមួយលោក មាស រិទ្ធិ ឲ្យដឹងយ៉ាងច្បាស់ថា គឺដោយសារឆ្លងពីលោក អ៊ិន ទីតូ អ្នកដឹកនាំសិល្បៈករសិល្បៈការិនីថតស្ពតពាណិជ្ជកម្ម ព្រោះកាលអំឡុងថ្ងៃទី ២៧-២៨ ខែកុម្ភៈ ឆ្នាំ២០២១ អ្នកស្រីបានទៅជួយថតវីដីអូ ដើម្បីចូលរួមផ្សព្វផ្សាយអំពីការពារកូវីដ១៩ ហើយម្សិលមិញទើបគាត់ទទួលដំណឹងថា អ្នកដឹកនាំថតស្ពត ឈ្មោះទីតូ មានវិជ្ជមានកូវីដ១៩ ហើយក្រោយមក អ្នកនាងក៏មានអាការៈមិនស្រួល ទើបធ្វើតេស្តទៅក៏មានវិជ្ជមានកូវិដ១៩តែម្តង។
អ្នកនាង នីមល ក៏បានប្រាប់ឲ្យដឹងទៀតថា ពុំត្រឹមតែរូបអ្នកនាងប៉ុណ្ណោះ គឺសូម្បីតែស្វាមី និងកូនស្រីរបស់អ្នកនាង ក៏ត្រូវបានធ្វើតេស្តវិជ្ជមានកូវីដ១៩ ទាំងអស់គ្នាផងដែរ ហើយខណៈពេលនេះ អ្នកស្រី រួមទាំងប្តី និងកូនស្រី កំពុងតែសម្រាកព្យាបាល។
ដោយឡែក នៅប៉ុន្មានម៉ោងមុននេះបន្តិច ថ្ងៃទី០៩ ខែមីនា ឆ្នាំ២០២១ អ្នកនាង កែវ ចាន់នីមល ក៏បានបង្ហោះសារនៅលើបណ្តាញសង្គមហ្វេសប៊ុក ដើម្បីបញ្ចាក់ពីស្ថានភាពបច្ចុប្បន្នគ្រួសាររបស់អ្នកនាង ឲ្យបងប្អូនមហាជនបានឲ្យដឹងយ៉ាងដូច្នេះថា៖ «អរគុណបងប្អូនទាំងអស់គ្នាសម្រាប់ការព្រួយបារម្ភនិងសួរសុខទុក្ខ ស្ថានភាពគ្រួសារខ្ញ៉ំពេលនេះមិនមានជាបញ្ហាចោទធំទេគ្រប់យ៉ាងគឺត្រូវបានមើលថែរពីក្រុមគ្រូពេទ្យជំនាញ យ៉ាងណាក៏ស្នើរសុំបងប្អូនមានការប្រុងប្រយត្ន័ខ្ពស់ ហើយក៏សូមអធ្យាស្រ័យដល់មិត្តភក្កិ ក្រុមការងារទាំងអស់ផងដែរ»។
ជាមួយគ្នានេះផងដែរ គេក៏បានឃើញអ្នកលេងហ្វេសប៊ុកជាច្រើន ក្នុងនោះរួមទាំងសិល្បករ និងអ្នករួមការងារមួយចំនួន ចូលខមិនលើកទឹកចិត្ត និងជូនពរថា៖ «ជូនពរមិត្ត សុខភាពល្អ និងឆាប់ជាសះស្បើយ, ជូនពរបងប្រុស បងស្រី និងក្មួយស្រី ឆាប់ជាសះស្បើយ មានសុខភាពល្អ ប្រសើរឡើងវិញក្នុងពេលឆាប់នេះ»៕ រក្សាសិទ្ធិដោយ៖ លឹម ហុង
