ភ្នំពេញ ៖ ទោះបីជាមានការប្រែប្រួលចុះឡើងជាបន្តបន្ទាប់នៅមួយរយៈពេលចុងក្រោយនេះក្តី យើងសង្កេតឃើញថា នៅរសៀលថ្ងៃម្សិលមិញនេះ មានភាគហ៊ុនដល់ទៅ ៦ ដែលមានថ្លៃកើនឡើងពេលផ្សារបិទ។ ភាគហ៊ុនហ្ក្រេនធ្វីន (GTI) និងកំពង់ផែស្វយ័តក្រុងភ្នំពេញ (PPAP) មានកំណើនគួរឱ្យកត់សម្គាល់ចំនួន ២០០រៀល ក្នុងមួយហ៊ុនដូចគ្នា ដោយបានឡើងដល់ ៣.៦០០រៀល និង១២.៧០០រៀល។
ភាគហ៊ុន ៤ ទៀត ដែលរួមមានរដ្ឋាករទឹកស្វយ័តក្រុងភ្នំពេញ (PWSA) តំបន់សេដ្ឋកិច្ចពិសេសភ្នំពេញ (PPSP) កំពង់ផែស្វយ័តក្រុងព្រះសីហនុ (PAS) និងភាគហ៊ុនធនាគារអេស៊ីលីដា (ABC) ក៏បានកើនឡើងផងដែរ ចំនួន ៤០រៀល ៣០រៀល ១២០រៀល និង ២០រៀលរៀងគ្នា មកដល់ ៦.៣២០រៀល ១.៦៤០ រៀល ១៣.១០០រៀល និង ១៦.៧០០រៀល។
មានតែផេសថិក (PEPC) មួយគត់ដែលបានរក្សាថ្លៃថេរដដែលត្រឹម ២.៩៥០រៀល។ កំណើននៃភាគហ៊ុនទាំង៦នេះ បានបណ្តាលឱ្យសន្ទស្សន៍ផ្សារមូលបត្រកម្ពុជា (ផ.ម.ក.)កើនឡើង ០,៣៨% រហូតដល់ ៦៣៦,៤៤ ពិន្ទុ។ ទំហំជួញដូរភាគហ៊ុនសរុបមានចំនួន ១៩០,០៩ លានរៀល៕
រក្សាសិទ្ធិដោយ៖CEN
