កណ្តាល៖ អាជ្ញាធរខេត្តកណ្តាល កំពុងពន្លឿនការសាងសង់អគារថ្មី ២បន្ថែមទៀត នៅក្នុងបរិវេណនៃមន្ទីរពេទ្យជ័យជំនះ ស្ថិតនៅក្រុងតាខ្មៅ ខេត្តកណ្តាល ឱ្យហើយនៅពេលឆាប់ៗខាងមុខ ខណៈទីតាំងនេះ នឹងត្រូវប្រើជាកន្លែងព្យាបាលអ្នកជំងឺ Covid 19។
ដើម្បីពន្លឿន ការសាងសង់អគារថ្មី២ខ្នងនេះ ឱ្យបានឆាប់រហស័ ឆ្លើយតបទាន់សភាពការណ៍ ឯកឧត្តម គង់ សោភ័ណ្ឌ អភិបាលខេត្តកណ្ដាល និងក្រុមការងារក្រសួងសេដ្ឋកិច្ច និងហិរញ្ញវត្ថុ បានចុះពិនិត្យអគារថ្មីទាំង ២ខ្នងនេះ ដែលស្ថិតនៅមន្ទីរពេទ្យបង្អែកជ័យជំនះ ក្រុងតាខ្មៅ ដែលកំពុងសាងសង់ ក្នុងគោលបំណង ឱ្យក្រុមបច្ចេកទេសសំណង់ ពន្លឿនការសាងសង់ ឱ្យបានឆាប់រហ័ស ប្រកបដោយគុណភាពខ្ពស់ ដើម្បីត្រៀមដាក់អ្នកដែលធ្វើតេស្តរកឃើញអ្នកមានផ្ទុកមេរោគកូវីដ-១៩ ដើម្បីដាក់ឱ្យសម្រាកព្យាបាលនៅទីនេះ។
គួរបញ្ជាក់ថា បើយោងតាមសេចក្តីជូនដំណឹងរបស់ក្រសួងសុខាភិបាល ដែលចេញនៅព្រឹកថ្ងៃទី ១៥ ខែមីនានេះ បានបង្ហាញថា ចំនួនអ្នកវិជ្ជមាន Covid19 សរុបទូទាំងប្រទេស មានចំនួន ១៣២៥ នាក់ អ្នកជាសៈស្បើយចំនួន ៧៣០នាក់ និងមានករណីស្លាប់ម្នាក់ ខណៈអ្នកនៅកំពុងសម្រាក់ព្យាបាលចំនួន ៥៩២នាក់ ។ ហើយអាគារថ្មី ចំនួន២ខ្នង នៃមន្ទីរពេទ្យបង្អែកជ័យជំនះនេះ ដែលនឹងសាងសង់ឱ្យរួចរាល់ជាស្ថាពរនៅពេលខាងមុខនេះ និងជួយរួមចំណែកក្នុងការទទួលអ្នកជំងឺកូវីដ១៩ ខណៈដែលខេត្តកណ្តាល ចេះតែកើនឡើងជាបន្តបន្ទាប់ គួរឱ្យព្រួយបារម្ភណ៍នៃអ្នកឆ្លងជំងឺកូវីដ-១៩ ក្នុងព្រឹត្តិការណ៍សហគមន៍ ២០កុម្ភៈ៕
រក្សាសិទ្ធិដោយ៖CEN
