ភ្នំពេញ÷រថយន្តកុងតឺន័រមួយគ្រឿងបើកបរក្នុងល្បឿនលឿនមិនប្រយ័ត្នជ្រុលទៅបុករថយន្តម៉ាករ៉េហ្វ័រកំពុងឆ្លងស្តុបចំពីចំហៀងផ្នែកខាងមុខពេញទំហឹងបណ្តាលឲ្យរថយន្តរងគ្រោះខ្ទាតឡើងលើសួនរងការខូចខាតខ្ទេចផ្នែកខាងមុខទាំងស្រុងចំណែកឯរថយន្តបង្កព្យាយាមបើករត់តែត្រូវសមត្ថកិច្ចឃាត់បានវិញ ចំណុចមុខវត្តឃ្មួញ។សំណាងល្អមិនគ្រោះថ្នាក់ដល់មនុស្ស។
ហេតុការណ៍គ្រោះថ្នាក់ចរាចរណ៍នេះដែរកើតឡើងនៅវេលាម៉ោង១១ និង ៣០ នាទីយប់ថ្ងៃទី១៦ ខែមីនាឆ្នាំ ២០២១ ត្រង់ចំណុចស្តុប២៤ម៉ោង ស្ថិតនៅតាមបណ្តោយផ្លូវភ្នំពេញហាណូយកែងនឹងផ្លូវសម្តេចជាសុីម ក្នុងសង្កាត់ភ្នំពេញថ្មី ណ្ឌសែនសុខ រាជធានីភ្នំពេញ។
ប្រភពព័ត៌មានពីសមត្តកិច្ចនៅប្រចាំការជាប់កន្លែងកើតហេតុបានឲ្យដឹងថា មុនពេលកើតហេតុគាត់បានឃើញរថយន្តម៉ាករ៉េហ្វ័រមួយគ្រឿងពណ៌សំបកឪឡឹក ពាក់ផ្លាកលេខ ស្វាយរៀង 2-A 1030 បើកបរដោយបុរសម្នាក់ធ្វើដំណើរតាមបណ្តោយផ្លូវសម្តេចជាសុីមក្នុងទិសដៅពីលិចមកកើតក្នុងល្បឿនមធ្យមខណៈមកដល់ចំណុចកើតហេតុប្រុងនិងឆ្លងស្តុប២៤ម៉ោងស្រាប់តែមានរថយន្តកុងតឺន័រមួយគ្រឿងទៀតក្បាលពណ៌សលាយខៀវ ពាក់ផ្លាកលេខ ភ្នំពេញ 3C 5797 បើកបរដោយបុរសម្នាក់ធ្វើដំណើរតាមបណ្តោយផ្លូវភ្នំពេញហាណូយក្នុងទិសដៅពីត្បូងមកជើងក្នុងល្បឿនលឿនមកបុករថយន្តម៉ាករ៉េហ្វ័រចំពីចំហៀងខាងមុខពេញទំហឹងបណ្តាលឲ្យខ្ទាតឡើងលើសួនរងការខូចខាត រួចរថយន្តបង្កព្យាយាមបើករត់ដល់ជិតវត្តឃ្មួញត្រូវបានសមត្ថកិច្ចឃាត់បានវិញ។
ក្រោយពេលកើតហេតុសមត្ថកិច្ចមូលដ្ឋានសហការជាមួយនឹងខាងជំនាញចរាចរខណ្ឌែនសុខចុះមកដល់រួចក៏បានទំនាក់ទំនងទៅខាងជំនាញចរាចរក្រុងឲ្យចុះមកវាស់វែងនិងធ្វើកំណត់ហេតុយករថយន្ដទាំងពីរគ្រឿងទៅរក្សាទុកនៅខាងការិយាល័យចរាចរណ៍ផ្លូវគោកនៃស្នងការរាជធានីភ្នំពេញរង់ចាំដោះស្រាយនៅពេលក្រោយ៕ រក្សាសិទ្ធិដោយ៖ សាមេត
