ភ្នំពេញ៖ សមត្ថកិច្ចនគរបាលប៉ុស្តិ៍កាកាបទី ១ ចាប់ឃាត់ខ្លួនជនសង្ស័យម្នាក់ប្រើប្រាស់អំពើហិង្សាដោយចេតនាកាប់បងថ្លៃខ្លួនឯងរងរបួសធ្ងន់ ខណៈពេលឈ្លោះប្រកែកទាស់ទែងគ្នាជាមួយបងថ្លៃឈានដល់ប្រើអំពើហិង្សាបណ្ដាលឲ្យរងរបួសធ្ងន់ ត្រូវបានប្រជាពលរដ្ឋបញ្ជូនទៅកាន់មន្ទីរពេទ្យ។
ហេតុការណ៍ខាងលើនេះបង្កឱ្យមានការភ្ញាក់ផ្អើលឡើងនាវេលាម៉ោង ២និង ២០ នាទីរសៀលថ្ងៃទី ១៦ខែមីនា ឆ្នាំ ២០២១ ស្ថិតនៅត្រង់ចំណុចភូមិប៉ប្រក់ខាងជើងក្នុងសង្កាត់កាកាបទី ១ ខណ្ឌពោធិ៍សែនជ័យរាជធានីភ្នំពេញ។
តាមប្រភពព័ត៌មានបានឲ្យដឹងថាជនដៃដល់ត្រូវជាប្អូនថ្លៃដែលបានធ្វើសកម្មភាពកាប់ទៅលើបងថ្លៃរបស់ខ្លួនបណ្ដាលឲ្យរងរបួសធ្ងន់មានឈ្មោះឆៃ ភេទប្រុសអាយុប្រហែលជាង ២០ ឆ្នាំ។ចំណែកឯជនរងគ្រោះត្រូវជាបងថ្លៃមានឈ្មោះសុខ លាង ភេទប្រុស។
តាមប្រភពពីសមត្ថកិច្ចបានឲ្យដឹងថានៅមុនពេលកើតហេតុជនរងគ្រោះត្រូវជាបងថ្លៃជាមួយនិងជនដៃដល់ជាប្អូនថ្លៃបានឈ្លោះប្រកែកគ្នាតឹងសរសៃកដោយសារប្អូនថ្លៃខឹងបងថ្លៃរបស់ខ្លួនមិនរវីរវល់នឹងបងស្រីដើរចោលបាត់ៗ ភ្លាមនោះជនដៃដល់ដែលត្រូវជាប្អូនថ្លៃបានទាញកាំបិតកាប់ទៅលើបងថ្លៃបណ្ដាលឲ្យរបួសធ្ងន់ធ្ងរត្រូវក្បាល បន្ទាប់មកក៏បានរត់គេចខ្លួនចូលទៅក្នុងវត្តពោធិ៍ចិនតុង តែត្រូវបានកម្លាំងសមត្ថកិច្ចរួមទាំងប្រជាពលរដ្ឋដេញចាប់បានយកមកសាកសួរនៅប៉ុស្តិ៍កាកាបទី ១។ ដោយឡែកជនរងគ្រោះត្រូវបានក្រុមគ្រួសារសាច់ញាតិបញ្ជូនទៅសង្គ្រោះនៅឯមន្ទីរពេទ្យបង្អែកពោធិ៍ចិនតុងភ្លាមៗ តែដោយសារស្ថានភាពរបួសរបស់ជនរងគ្រោះធ្ងន់ធ្ងរពេក ក៏បានបញ្ជូនបន្តទៅកាន់មន្ទីរពេទ្យព្រះកុសមៈដើម្បីសង្គ្រោះជីវិត។
បច្ចុប្បន្នជនសង្ស័យត្រូវបានសមត្ថកិច្ចឃាត់ខ្លួនសាកសួរនៅក្នុងប៉ុស្តិ៍នគរបាលរដ្ឋបាលកាកាបទី ១ កសាងសំណុំរឿងចាត់ការតាមផ្លូវច្បាប់៕ រក្សាសិទ្ធិដោយ ៖ សួងសាម
