ភ្នំពេញ÷បុរសម្នាក់បើករថយន្តម៉ាកវីស្តូមួយគ្រឿងក្នុងស្ថានភាពស្រវឹងបានរេចង្កូតជ្រុលទៅបុករថយន្តសុីនទ្រីកំពុងតែប្រមូលសំរាមចំពីខាងមុខពេញទំហឹងបណ្តាលឲ្យរថយន្តបង្កខ្ទេចផ្នែកខាងមុខស្ទើរទាំងស្រុង។ ចំណែករថយន្តសុីនទ្រីដឹកសំរាមរងការខូចខាតផ្នែកខាងមុខតិចតួច។ហើយមិនមានរងរបួសទៅលើតៃកុងនិងកម្មករកំពុងតែប្រមូលសំរាមនោះទេ។
ហេតុការណ៍គ្រោះថ្នាក់ចរាចរណ៍នេះដែរបានកើតឡើងកាលពីវេលាម៉ោង ០០និង២០ នាទីយប់ឈានចូលថ្ងៃអាទិត្យទី២៨ ខែមីនា ឆ្នាំ២០២១ ស្ថិ តនៅតាមបណ្តោយផ្លូវជាតិលេខ៤ ក្នុងសង្កាត់ច្រាំងចំរេះ២ ខណ្ឌឬស្សីកែវ រាជធានីភ្នំពេញ។
ប្រភពព័ត៌មានពីប្រជាពលរដ្ឋនៅកន្លែងកើតហេតុបានឲ្យដឹងថា មុនពេលកើតហេតុគាត់បានឃើញរថយន្តសុីនទ្រីដឹកសំរាមមួយគ្រឿងពណ៌ទឹកក្រូចមិនមានផ្លាកលេខបានឈប់រថយន្តនៅលើចិញ្ចើមផ្លូវជាតិលេខ៤កំពុងតែប្រមូលសំរាមដាក់លើរថយន្ត ស្រាប់តែភ្លាមនោះដែរគាត់ក៏បានឃើញរថយន្តមួយគ្រឿងទៀតម៉ាកវីស្តូពណ៌ទឹកដោះគោពាក់ផ្លាកលេខ ភ្នំពេញ 2-X 5098 បើកបរដោយបុរសម្នាក់ក្នុងល្បឿនលឿនបានរេចង្កូតឆ្លងគន្លងផ្លូវទៅបុកចំពីខាងមុខរថយន្តសុីនទ្រីកំពុងតែឈប់ប្រមូលសំរាមចំពីខាងមុខពេញទំហឹងបណ្តាលឲ្យរថយន្តបង្កខ្ទេចផ្នែកខាងមុខស្ទើរទាំងស្រុង ចំណែកតៃកុងរថយន្តវិញបានរងរបួសធ្ងន់បញ្ជូនយកទៅសង្គ្រោះបន្ទាន់នៅឯមន្ទីរពេទ្យភ្លាមៗផងដែរ។
ក្រោយពេលកើតហេតុសមត្ថកិច្ចមូលដ្ឋានសហការជាមួយនឹងខាងជំនាញចរាចរណ៍ខណ្ឌឬស្សីកែវចុះមកដល់ដោយភាគីតំណាងរថយន្តបង្កមិនចង់វែងឆ្ងាយក៏ព្រមសងជាសំណងទៅលើរថយន្តស៊ិនទ្រីប្រមូលសំរាមបញ្ចប់រឿងនៅកន្លែងកើតហេតុ៕
រក្សាសិទ្ធិដោយ៖ សាមេត
