ភ្នំពេញ ៖ ជាការពិតណាស់ ក្រៅពីមានទេពកោសល្យ និងសមត្ថភាពក្នុងការសម្តែងសិល្បៈល្ខោន និងចម្រៀងសម័យ បានយ៉ាងល្អឥតខ្ចោះ ផន សុផារី កូនស្រីសំណព្វចិត្តរបស់ថៅកែល្ខោនបាសាក់ដ៏ល្បីឈ្មោះ «ភី សុគន្ធធី» ក៏ចេះនិពន្ធបទចម្រៀងគួរឲ្យកោតសរសើរផងដែរ។
យ៉ាងណាមិញ បទចម្រៀងដែលអ្នកនាង ផន សុផារី ទើបនិពន្ធថ្មីនេះ គឺជាបទបែបមនោសញ្ចេតនាដ៏សែនកម្សត់ ដែលមានចំណងជើងថា «កូវីដប្រល័យម្តាយខ្ញុំ»។ ហើយបទនេះផងដែរ គឺចង់បញ្ជាក់អត្ថន័យដ៏ជ្រាលជ្រៅ ពីសេចក្តីទុក្ខសោកសង្រេងយ៉ាងខ្លាំង ពីកូនៗស្រីៗរបស់លោក ហួរ ឡាវី ដែលបានបាត់បង់អ្នកម្តាយជាទីស្រឡាញ់ ដោយសារចង្កូមមជ្ជុរាជកូវីដ១៩ ផ្តាច់យកជីវិត ឲ្យឃ្លាតចាកឆ្ងាយពីកូនៗយ៉ាងលឿន ទាំងពុំបានឃើញមុខចុងក្រោយ។
តាមរយៈបទចម្រៀងដ៏អន្លង់អន្លោចនេះផងដែរ ផន សុផារី សូមផ្ញើជូនជាពិសេសទៅដល់តារាចម្រៀង វី ឌីណែត និងភ្ជាប់សារផ្តាំផ្ញើដល់ប្រជាពលរដ្ឋគ្រប់គ្នា ត្រូវមានការប្រយ័ត្នចំពោះជំងឺដ៏កាចសាហាវនេះថា៖ «ជូនចំពោះ កញ្ញា វី ឌីណែត និង ក្រុមគ្រួសារ នាងខ្ញុំសូម ឧទ្ទិសកុសលតាមរយៈបទនេះជូនអ៊ំស្រី ដែលបានចាកឆ្ងាយលែងត្រឡប់ដោយ ជំងឺកូវីដ-១៩ និងសូមផ្ញើជូនសិល្បករសិល្បការិនី និង បងប្អូនដែលបានឆ្លងជំងឺកូវីដ-១៩ ទាំងអស់ ។ សង្ឃឹមថាចម្រៀងមួយបទនេះចូលរួមចំណែក ក្នុងការដាស់ស្មារតីដល់បងប្អូនប្រជាពលរដ្ឋទាំងអស់ ឱ្យបង្កើនការប្រុងប្រយ័ត្ន និងសូមមេត្តាអនុវត្តនូវវិធានការសុខាភិបាល ៣ កុំ និង ៣ ការពារ ផងចុះ»។
គួរបញ្ជាក់ថា ម្តាយរបស់តារាចម្រៀង វី ឌីណែត បានទទួលមរណភាព នៅក្នុងអាយុ ៦២ ឆ្នាំ ដោយជំងឺកូវីដ-១៩ ក្រោយពីអ្នកស្រីបានសម្រាកនៅមន្ទីរពេទ្យមួយរយៈខ្លីប៉ុណ្ណោះ៕ រក្សាសិទ្ធិដោយ៖ លឹមហុង
