អស់ទាស់ហ្មង ! ចោរហារយ ចូលលួចទ្រព្យសម្បត្តិ ត្រូវមន្តរណ្តំម៉ាស៊ីនត្រជាក់ ងងុយដេក ប្រាសខ្លួនលើគ្រែកូនស្រីម្ចាស់ផ្ទះលង់លក់ទល់ភ្លឺ

ចោរអាយុវ័យក្មេងម្នាក់នៅក្នុងប្រទេសថៃ ប្រហែលជាមិនដែលបានស្គាល់រសជាតិម៉ាស៊ីនត្រជាក់ ត្រូវបានចាប់ខ្លួន ក្រោយពីបានចូលលួចទ្រព្យសម្បត្តិ ប៉ុន្តែ មានអារម្មណ៍ងងុយដេកខ្លាំង ព្រោះត្រូវមន្តរណ្តំម៉ាស៊ីនត្រជាក់ ក៏ប្រាស់ខ្លួនដេកក្នុងបន្ទប់កូនស្រីម្ចាស់ផ្ទះយ៉ាងស្រួល។ ហេតុការណ៍ដ៏ហួសចិត្តនេះ បានកើតឡើងកាលពីថ្ងៃទី២២ ខែមីនា ឆ្នាំ២០២១ ស្ថិតនៅក្នុងខេត្ត Phetchabun ប្រទេសថៃ។

យោងតាមប្រភពព័ត៌មានបានឲ្យដឹងថា ចោរម្នាក់មានឈ្មោះ Arthit Kinkuntod អាយុ ២២ ឆ្នាំ ដោយពុំអាចទប់ទល់នឹងម៉ាស៊ីនត្រជាក់បាន ក៏លោតឡើងគ្រែដ៏ធំទូលាយមួយរបស់ម្ចាស់ផ្ទះ បន្ទាប់ពីចូលលួចនៅវេលាម៉ោងប្រហែល ២ យប់ រំលងអធ្រាត្រ។ ប៉ុន្តែ ដោយសារមានអារម្មណ៍ងងុយដេក រូបគេក៏បានចូលទៅក្នុងបន្ទប់មួយ ដែលជាគ្រែគេងសម្រាប់កូនស្រីម្ចាស់ផ្ទះជាមន្រ្តីប៉ូលីស។

មន្រ្តីប៉ូលីសជាម្ចាស់ផ្ទះ បានប្រាប់កាសែតជាភាសាថៃ Matichon ថា៖ «គាត់បានភ្ញាក់ផ្អើលពីដំណេកនៅពេលព្រឹក និងពិតជាមានការងឿងឆ្ងល់ជាខ្លាំង នៅពេលរកឃើញថា ម៉ាស៊ីនត្រជាក់បន្ទប់គេងកូនស្រី ត្រូវបានបើក»។

គាត់ពិតជាមានការភ្ញាក់ផ្អើលស្ទើរលោះព្រលឹង នៅពេលបើកទ្វារបន្ទប់ ក៏ស្រាប់តែឃើញលោកចោរ Arthit កំពុងដេកលង់លក់យ៉ាងរំភើយ នៅលើគ្រែកូនស្រីរបស់គាត់។ បន្ទាប់មក គាត់ក៏បានទាក់ទងទៅប៉ូលីស មកចាប់ខ្លួនចោរថ្លើមពាសមេឃរូបនេះភ្លាមៗផងដែរ។

គាត់បាននិយាយទាំងហួសចិត្តថា៖ «ខ្ញុំពិតជាចង់ដឹងមែនទែន ព្រោះថាកូនស្រីរបស់ខ្ញុំ មិននៅផ្ទះទេ គឺនាងបានចេញក្រៅប្រទេស»។ គាត់បន្តថា៖ «កូនស្រីរបស់ខ្ញុំ មិនដែលភ្លេចបិទម៉ាស៊ីនត្រជាក់ទេ នៅពេលនាងចាកចេញពីផ្ទះ»៕ រក្សាសិទ្ធិដោយ៖ លឹម ហុង