បុរសជនជាតិវៀតណាមម្នាក់ បានបើករថយន្តធ្លាក់ចូលវាលស្រែ ក្រឡាប់ច្រើនត្រឡប់ឡើងខ្ទេច តែសំណាងនៅមានជីវិត អាចគ្រប់គ្រងលូនចេញពីក្នុងរថយន្តរត់គេចខ្លួនបាត់ស្រមោល បន្ទាប់ពីបានឃើញស្រមោលប៉ូលីសនៅខាងមុខ។ ហេតុការណ៍នេះ បានកើតឡើងកាលពីថ្ងៃទី២៦ ខែមីនា ឆ្នាំ២០២១ ស្ថិតនៅផ្លូវ Phimai ទៅកាន់ Jakkarach ក្នុងស្រុក Phimai ប្រទេសថៃ។
ប៉ូលីសនៅកន្លែងកើតហេតុ បាននិយាយថា ពួកគាត់ពិតជាមានការងឿងឆ្ងល់ជាខ្លាំង ព្រោះថាមិនដឹងជាមានមូលហេតុអ្វី បានជាបុរសនោះភ័យខ្លាចដល់ថ្នាក់នេះ។ នៅមុនពេលកើតហេតុ ប៉ូលីសបានឃើញរថយន្ត១គ្រឿងនេះ បើកបរក្នុងល្បឿនយ៉ាងលឿន និងបើកគេចពីពួកគេ រួចបង្កើនល្បឿនកាន់តែលឿន រហូតបាត់បង់ម្ចាស់ការក្រឡាប់ចូលក្នុងស្រែតែម្តង។
នៅពេលមន្ត្រីប៉ូលីសមកដល់កន្លែងកើតហេតុ ពួកគេបានរកឃើញរថយន្តម៉ាក Toyota ១គ្រឿង ពាក់ស្លាកលេខ Bangkok កំពុងស្ថិតនៅក្នុងវាលស្រែ។ នៅក្បែររថយន្តនោះ មានតង់កៅស៊ូចំនួន ៥០ ដុំ រាយប៉ាយនៅជុំវិញនោះ ។ ដោយសារតែអ្នកបើកបរបានរត់គេចខ្លួនបាត់ ដូច្នេះ ប៉ូលីសបានធ្វើការឆែកឆេរក្នុងរថយន្ត និងបានរកឃើញថង់មួយផ្ទុកដោយប័ណ្ណបើកបរមួយ, ទូរស័ព្ទ១គ្រឿង និងលិខិតឆ្លងដែន១។
អ្នកបើកបរមានឈ្មោះ Knian Jintiad អាយុ ៣៥ ឆ្នាំ មកពីប្រទេសវៀតណាម។ ចំណែកតង់កៅស៊ូ និងរថយន្ត ត្រូវបាននាំយកទៅរក្សាទុកនៅប៉ុស្តិ៍ប៉ូលីស Phimai ៕
រក្សាសិទ្ធិដោយ៖ លឹម ហុង
