ភ្នំពេញ ៖ ផ្សារដើមគ និងការជួញដូរបន្លែនាពេលយប់ មិនមានការផ្អាកនោះឡើយ ដោយគ្រាន់តែទាមទារឱ្យអនុវត្តវិធានការការពារជំងឺកូវីដ-១៩ ឱ្យបានតឹងរ៉ឹងជាមុន ដូចជា តម្រូវឱ្យក្រុមអាជីវករលក់បន្លែ និងអ្នកដែលទៅទិញបន្លែនៅផ្សារដើមគ យកទៅចែកចាយបន្ត ត្រូវធ្វើលិខិតបញ្ជាក់ពីអាជ្ញាធរ ឬប្រធានផ្សារ ដើម្បីទទួលបានការអនុញ្ញាតពីសមត្ថកិច្ចក្នុងការធ្វើដំណើរពេលយប់។
លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ បានឲ្យអ្នកសារព័ត៌មានដឹងនាយប់ ថ្ងៃទី០១ ខែមេសា ឆ្នាំ២០២១ ថា វិធានការរបស់រដ្ឋបាលរាជធានីភ្នំពេញ នាំឱ្យមានក្តីបារម្ភមួយចំនួនពាក់ព័ន្ធដល់ការចែកចាយ និងការទិញដូរបន្លែនៅផ្សារដើមគ អ៊ីចឹងទេ សូមឱ្យពួកគាត់មានលិខិតបញ្ជាក់ពីប្រធានផ្សារ ឬអាជ្ញាធរមូលដ្ឋាន ហើយគាត់កាន់លិខិតហ្នឹងទៅ គាត់ធ្វើដំណើរក្នុងម៉ោងដែលគេហាមឃាត់ គឺគាត់អាចបន្ដំណើរបានហើយ។ គាត់អាចធ្វើដំណើរបានធម្មតាហើយ ឱ្យតែគាត់មានលិខិតបញ្ជាក់ថា គាត់ជាអាជីវករអ្នកលក់នៅនឹងកន្លែង ឬជាអាជីវករចែកចាយបន្ត៕
រក្សាសិទ្ធិ ៖ ពិសិដ្ឋ CEN
