បេសកជនអង្គការសហប្រជាជាតិ លោកស្រី Christine Schraner Burgenerដែលទទួលបន្ទុកពិសេសប្រចាំប្រទេសមីយ៉ាន់ម៉ា បានថ្លែងក្នុងកិច្ចប្រជុំរបស់ក្រុមប្រឹក្សាសន្តិសុខអង្គការសហប្រជាជាតិនៅថ្ងៃពុធកន្លងទៅនេះថា ការបង្ហូរឈាមកាន់តែកើតមានខ្លាំងឡើង ដោយសារតែការបង្គ្រាបរបស់ក្រុមយោធាមកលើក្រុមអ្នកតវ៉ាប្រឆាំងរបបយោធាកាន់តែតានតឹងខ្លាំងឡើងៗ។
បើយោងទៅតាមការផ្តល់បទសម្ភាសន៍ជាមួយអ្នកសារព័ត៍មាន មុនពេលកិច្ចប្រជុំជាមួយក្រុមប្រឹក្សាចំនួន១៥រូបត្រូវបញ្ចប់ លោកស្រី Schraner Burgener បានថ្លែងថា យោធាដែលដណ្តើមអំណាចក្នុងប្រទេសមីយ៉ាន់ម៉ាកាលពីថ្ងៃទី១ កុម្ភៈកន្លងទៅ គឺមិនអាចមានលទ្ធភាព និងសមត្ថភាពគ្រប់គ្រាន់ក្នុងការគ្រប់គ្រងប្រទេសឡើយ ហើយលោកស្រីព្រមានថាស្ថានភាពនៅប្រទេសមីយ៉ាន់ម៉ានឹងកាន់តែអាក្រក់ទៅៗ។
លោកស្រីថ្លែងថា យើងកំពុងពិចារណាលើការចាត់វិធានការជាសមូហភាព និងធ្វើយ៉ាងណាឲ្យមានភាពត្រឹមត្រូវ ដើម្បីផ្តល់ឱ្យប្រជាជនមីយ៉ាន់ម៉ាទទួលបាននូវអ្វីដែលពួកគេចង់បាន ហើយនិងការពារមហន្តរាយគ្រប់បែបយ៉ាងចំពោះប្រទេសដែលនៅចំកណ្តាលបេះដូងនៃទ្វីបអាស៊ីមួយនេះ។
លោស្រី Schraner Burgener បាននិយាយថា ក្រុមប្រឹក្សាត្រូវតែពិចារណាលើសកម្មភាព ដែលចំបាច់បំផុតដើម្បីបង្វែរការបង្ហូរឈាមនៅប្រទេសដែលនឹងកើតមានឡើង។ យ៉ាងណាមិញគេសង្កេតឃើញថា ប្រទេសអង់គ្លេសក៏បានស្នើសុំចូលរួមកិច្ចប្រជុំរបស់អង្គការសហប្រជាជាតិនៅឯទីក្រុងញូវយ៉កផងដែរ ក្នុងគោលបំណងដើម្បីឆ្លើយតបទៅនឹងអំពើហឹង្សាកាន់តែខ្លាំងនៅក្នុងប្រទេសមីយ៉ាន់ម៉ា។
យ៉ាងហោចណាស់ប្រជាជនស៊ីវិលប្រមាណ ៥២១នាក់ត្រូវបានសម្លាប់ក្នុងបាតុកម្មប្រឆាំងរដ្ឋប្រហារនេះ។ ការប្រយុទ្ធគ្នានេះត្រូវបានប៉ះទង្គិចពីសំណាក់ក្រុមយោធា និងក្រុមបះបោរជនជាតិដើមភាគតិចដែលរស់តាមតំបន់ព្រំដែន។ ក្នុងនោះជនភៀសខ្លួនកំពុងរត់ភៀសទៅរកទីទួលដែលមានសុវត្ថិភាពនៅតាមប្រទេសជិតខាងរបស់ខ្លួន។
ឯកអគ្គរដ្ឋទូតអង់គ្លេសប្រចាំអង្គការសហប្រជាជាតិក៏បាន ថ្លែងក្នុងសន្នីសិទកាសែតតាមប្រព័ន្ធអនឡាញក្រោយពេលបញ្ចប់កិច្ចប្រជុំថា សកម្មភាពហឹង្សាដែលប្រព្រឹត្តដោយយោធាមីយ៉ានម៉ាគឺពិតជាពិតអាចទទួលយកបានទេ និងត្រូវតែតម្រូវឲ្យមានសារមួយ ដែលខ្លាំងចេញពីសហគមន៍អន្តរជាតិ។
ឯកអគ្គរដ្ឋទូតចិនប្រចាំអង្គការសហប្រជាជាតិលោក Zhang Jun បានថ្លែងក្នុងកិច្ចប្រជុំថា ប្រទេសចិនកំពុងធ្វើការជាមួយគ្រប់ភាគីទាំងអស់នៅក្នុងប្រទេសមីយ៉ាន់ម៉ា ដើម្បីកាត់បន្ថយភាពតានតឹងនេះ។
បើតាមមន្ត្រីបេសកម្មចិនប្រចាំអង្គការសហប្រជាជាតិ លោក Zhang Jun បាននិយាយថា ការដាក់សម្ពាធតែម្ខាង និងការអំពាវនាវឱ្យដាក់ទណ្ឌកម្ម ឬវិធានការបង្ខំផ្សេងៗទៀត នឹងធ្វើឱ្យស្ថានភាពនៅក្នុងប្រទេសមីយ៉ាន់ម៉ាកាន់តែភាពតានតឹង និងរឹតតែប្រឈមមុខកាន់តែធ្ងន់ធ្ងរ ព្រមទាំងធ្វើឱ្យស្ថានភាពកាន់តែស្មុគស្មាញថែមទៀតដែលនេះមិនមែនជាន័យស្ថាបនា និងជួយសង្គ្រោះនោះទេ។
គិតមកទល់ពេលនេះ ក្រុមប្រឹក្សាបានបញ្ចេញសេចក្តីថ្លែងការណ៍២ បង្ហាញពីក្តីបារម្ភ និងថ្កោលទោសទៅនឹងអំពើហឹង្សាប្រឆាំងអ្នកតវ៉ា ក៏ប៉ុន្តែទម្លាក់ចោលភាសាថ្កោលទោសចំពោះយោធាដែលគ្រប់គ្រងរដ្ឋប្រហារ និងគម្រាមពីវិធានការបន្ថែម ប៉ុន្តែមានការជំទាស់ពីសំណាក់ប្រទេស ចិន រ៉ូស្ស៊ី ឥណ្ឌា និង វៀតណាម៕
ប្រភព៖ រ៉យទ័រ