ភ្នំពេញ ៖ ថ្នាកដឹកនាំនៃធនាគារឯកទេសវីង (ខេមបូឌា) លីមីតធីត បានប្រគល់ទឹកប្រាក់វិភាគទានចំនួន៦០លានរៀល ដែលជាទឹកចិត្តរបស់អ្នកឧកញ៉ា គិត ម៉េង ប្រធានក្រុមហ៊ុនរ៉ូយ៉ាល់គ្រុប និងលោកជំទាវ ម៉ៅ ចំណានព្រមទាំងក្រុមគ្រួសារ ជូនដល់ក្រសួងការងារ និងបណ្តុះ បណ្តាលវិជ្ជាជីវៈ នៅរសៀលថ្ងៃទី៨ ខែមេសា ឆ្នាំ ២០២១នេះ ដើម្បីជាការគាំទ្រក្នុងយុទ្ធនាការចាក់វ៉ាក់សាំងការពារជំងឺកូវីដ១៩ជូនកម្មករនិយោជិត។
ពិធីប្រគល់ថវិកានេះ ត្រូវបានធ្វើឡើងនៅក្រសួងការងារ និងបណ្តុះបណ្តាលវិជ្ជាជីវៈ ក្រោមវត្តមានឯកឧត្តម ហេង សួរ រដ្ឋលេខាធិ ការ ក្រសួងការងារ និងបណ្តុះបណ្តាលវិជ្ជាជីវៈ និងតំណាងនៃធនាគារឯកទេសវីង ដោយអនុវត្តទៅតាមគោលការសុវត្ថិភាពយ៉ាងជាក់លាក់។
ថវិកាដែលទទួលបាននៅពេលនេះ ក្រសួងការងារ និងបណ្តុះបណ្តាលវិជ្ជាជីវៈ នឹងយកទៅទិញបរិក្ខារចាំបាច់មួយចំនួនសម្រាប់ជួយដល់ក្រុមគ្រូពេទ្យប្រើប្រាស់នៅពេលចាក់វ៉ាក់សាំងកូវីដ ១៩នៅតាមតំបន់គោលដៅ ដើម្បីការ ពារសហគមន៍ពីជំងឺកូវីដ១៩ ក៏ដូចជាជួយឲ្យពួកគាត់មានភាពសុវត្ថិភាព ក្នុងការប្រកបការងារប្រចាំថ្ងៃដើម្បីទ្រ ទ្រង់ ជីវភាពគ្រួសារ។ ធនាគារឯកទេសវីង ជាបុត្រសម្ព័ន្ធនៃក្រុមហ៊ុនរ៉ូយ៉ាល់គ្រុប បានចូលរួមជាមួយរាជរដ្ឋាភិបាល ប្រយុទ្ធប្រឆាំងមេរោគកូវីដ១៩ ហើយកន្លងមកវីងបានឧបត្ថម្ភដល់ក្រុមគ្រូពេទ្យស្ម័គ្រចិត្តសម្តេចតេជោចំនួន ៥ម៉ឺនដុល្លារ ម្តងរួចមកហើយ និងមានគម្រោងឧបត្ថម្ភបន្តបន្ទាប់ទៀត។
លោក ឈុន វឌ្ឍនៈភក្តី នាយកផ្នែកអាជីវកម្មវីង បានឱ្យដឹងថា វីង បាននាំយកថវិកាចំនួន៦០លានរៀល ជួយដល់ក្រសួងការងារនុងបណ្តុះបណ្តាលវិជ្ជាជីវៈនាពេលនេះ ក្នុងគោលបំណង ចូលរួមដល់សកម្មភាពចាក់វ៉ាកសាំង ជូនដល់កម្មករ កម្មការិនី បំរើការក្នុងវិស័យឧស្សាហកម្មកាត់ដេរ និងផលិតស្បែកជើងជាមួយក្រសួងការងារ។
ឯកឧត្តម ហេង សួរ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានថ្លែងអំណរគុណដល់ធនាគារឯកទេសវីង ដែលបានផ្តល់ថវិកាសម្រាប់ក្រសួង ក្នុងការធ្វើសកម្មភាពចាក់វ៉ាក់សាំងជូនកម្មករ កម្មការិនីនា ពេល នេះ ដោយឯកឧត្តម ចាត់ទុកថា នេះគឺជាការចូលរួមចំណែកជាមួយរាជរដ្ឋាភិបាលក្នុងការងារប្រយុទ្ធប្រឆាំងនិងជំងឺកូវីដ១៩ នៅកម្ពុជា ដែលកំពុងរីករាលដាលយ៉ាងខ្លាំងគួរឱ្យព្រួយបារម្មណ៍៕
រក្សាសិទ្ធិដោយ៖CEN
