ពោធិ៍សាត់៖ ករណីគ្រោះថ្នាក់ចរាចរបង្កឡើងដោយរថយន្តមួយគ្រឿងបើកបុកម៉ូតូមួយគ្រឿង បណ្តាលឲ្យបុរសម្នាក់ស្លាប់ភ្លាមៗនៅនិងកន្លែងកាលពីម៉ោង២០ថ្ងៃទី៦ ខែ មីនា ឆ្នាំ២០១៨ នៅនៅចំណុចស្រែពាំង ស្ថិតនៅភូមិស្ទឹងថ្មី ឃុំប្រម៉ោយ ស្រុកវាលវែង ខេត្តពោធិ៍សាត់។
សមត្ថកិច្ចបានឱ្យដឹងថា ជនរងគ្រោះឈ្មោះ ផល សំណាងអាយុ១៨ឆ្នាំ រស់នៅចំណុចក្រសាំងភ្នៅភូមិសំឡាញ ឃុំក្រពើរពីរ ជិះម៉ូតូម៉ាកស៊ុយស៊ុយគីស្មាស់ពណ៌ក្រហម ពាក់ស្លាកលេខបាត់ដំបង1T-4436។ ចំណែករថយន្តបង្កមិនស្គាល់អត្តសញ្ញាណបានបើកគេចបាត់ក្រោយពេលកើតហេតុ។
ប្រភពព័ត៌មានបានឱ្យដឹងថា មុនពេលកើតហេតុ គេឃើញបុរសម្នាក់ជិះម៉ូតូម៉ាកខាងលើបានធ្វើដំណើរតាមបណ្តោយផ្លូវជាតិលេខ៥៥ ខណៈពេលមកដល់ចំណុចកើតហេតុ ក៏មានរថយន្តមិនស្គាល់ម៉ាកមួយគ្រឿងបើកយ៉ាងលឿនបានបុកបុរសជិះម៉ូតូយ៉ាងពេញទំហឹងបណ្តាលឱ្យដួលស្លាប់ភ្លាមៗនៅនិងកន្លែង រួចរត់គេចខ្លួនបាត់៕ ដោយ៖បញ្ញាស័ក្តិ
