Friday, September 22, 2023

ជនល្មើស​ញៀន​ថ្នាំ​ម្នាក់ កាប់​នាយ​នគរបាល​ប៉ុស្តិ៍​ព្រែក​ព្នៅ​ស្តីទី របួស​រយះ​កដៃ​

spot_img

ភ្នំពេញ ​៖​ នាយ​នគរបាល​ប៉ុស្តិ៍​ព្រែក​ព្នៅ​ស្តីទី ត្រូវ​បាន​ជនល្មើស​ម្នាក់​ដែល​ជា​មុខសញ្ញា​ប្រើប្រាស់​គ្រឿងញៀន យក​កាំបិតផ្គាក់​កាប់​រយះ​ដាច់​កដៃ​ខាងឆ្វេង ខណៈពេល​ដែល​នាយ​នគរបាល​ប៉ុស្តិ៍​និង​ក្រុមការងារ ចុះ​ទៅ​អន្តរា គមន៍​ហាមឃាត់​ជនសង្ស័យ​ដែល​កំពុង​អុកឡុក​ប្រើ​ហិង្សា​ទៅលើ​ម្តាយបង្កើត​របស់​ខ្លួន​។

​ហេតុការណ៍​នេះ​កើតឡើង​នៅ​ត្រង់​ចំណុច​មុខ​ផ្ទះ​គ្មាន​លេខ ផ្លូវជាតិ​លេខ​៥ ភូមិ​ផ្សារ​លិច សង្កាត់​ព្រែក​ព្នៅ ខណ្ឌ​ព្រែក​ព្នៅ រាជធានី​ភ្នំពេញ នៅ​យប់​ថ្ងៃទី​៧ ខែ​មីនា ឆ្នាំ​២០១៨​នេះ​។

​យោងតាម​របាយការណ៍​របស់​អធិការ​ខណ្ឌ​ព្រែក​ព្នៅ នៅ​ថ្ងៃ​ទី​៨ ខែ​មីនា ឆ្នាំ​២០១៨​នេះ បានឲ្យដឹងថា ជនសង្ស័យ​ឈ្មោះ អំ ដាលីន អាយុ​៣០​ឆ្នាំ មុខរបរ​មិន​ពិតប្រាកដ មាន​ទីលំនៅ ផ្ទះ​គ្មាន​លេខ ភូមិ​ផ្សារ​លិច សង្កាត់​ព្រែក​ព្នៅ ខណ្ឌ​ព្រែក​ព្នៅ​។ ដោយឡែក​ជនរងគ្រោះ​ឈ្មោះ អ៊ឹម រិទ្ធី អាយុ​៣៦​ឆ្នាំ ជា​នាយ​ប៉ុស្តិ៍​ព្រែក​ព្នៅ​ស្តីទី មាន​ទីលំនៅ​ផ្ទះ​គ្មាន​លេខ ផ្លូវ​បេតុង ភូមិ​កណ្តាល សង្កាត់​ព្រែក​ព្នៅ ខណ្ឌ​ព្រែក​ព្នៅ រាជធានី​ភ្នំពេញ​។​

​សមត្ថកិច្ច​នគរបាល បានឲ្យដឹងថា មុនពេល​កើតហេតុ មាន​ករណី​ហិង្សា​ក្នុង​គ្រួសារ​កើតឡើង​ត្រង់ចំណុច​ផ្ទះ​កើតហេតុ​ខាងលើ ភ្លាម​នោះ​នាយ​នគរបាល​ប៉ុស្តិ៍​បាន​ដឹកនាំ​កម្លាំង​ចុះ​ដល់​ត្រង់​កន្លែង​កើតហេតុ ពេល​ទៅ​ដល់​ស្រាប់តែ​ជនសង្ស័យ​ស្ទុះ​យក​កាំបិតផ្គាក់​មក​កាប់​ទៅលើ​នាយ​នគរបាល​ប៉ុស្តិ៍ បណ្តាលឲ្យ​រយះ​ដាច់​កដៃ​ខាងឆ្វេង​។ ភ្លាម​នោះ​ប្រជាពលរដ្ឋ ដែល​ឈរ​មើល​នៅ​ក្បែរ​នោះ ក៏​បាន​នាំគ្នា​មក​ជួយ​ឃាត់​ជនសង្ស័យ និង​បាន​វាយ​ជនសង្ស័យ បណ្តាល​ឲ្យ​បែកក្បាល​ហូរឈាម រួច​ប្រគល់ឲ្យ​កម្លាំងល្បាត​របស់​អធិ​ការដ្ឋាន ចំណែក​ឯ​ជនរងគ្រោះ​ត្រូវបាន​កម្លាំង​សមត្ថកិច្ច និង​ក្រុមគ្រួសារ​បញ្ជូន​ទៅ​មន្ទីរពេទ្យ​កាល់ម៉ែត ដើម្បី​ព្យាបាល​។​

​ជនសង្ស័យ គឺជា​មនុស្ស​ញៀន​ថ្នាំ ហើយ​ត្រូវ​ក្រុមគ្រួសារ​បញ្ជូន​ទៅ​មណ្ឌល​កែប្រែ​ហើយ​ក្រោយមក ជនសង្ស័យ​រូបនេះ​បាន​ប្រើល្បិច​ធ្វើ​ជា​ឈឺ ឱ្យ​គេ​បញ្ជូន​ទៅ​មន្ទីរពេទ្យ ស្រាប់តែ​បាន​រត់គេចខ្លួន​បាត់ ។ លុះ​នៅ​ថ្ងៃកើតហេតុ ជននេះ​បាន​មក​រករឿង​ក្រុមគ្រួសារ​យ៉ាងខ្លាំង ហើយក៏​មាន​អ្នកជិតខាង​ជួយ​រាយការណ៍​ទៅ​កម្លាំង​សមត្ថកិច្ច ទើប​ត្រូវ​លោក​មេ​ប៉ុស្តិ៍​ដែល​ជា​ជនរងគ្រោះ ដឹកនាំ​កម្លាំង​ចុះ​ទៅ​អន្តរាគមន៍​នៅ​ផ្ទះ​កើតហេតុ ហើយ​គ្រាន់តែ​ក្រឡេកឃើញ កម្លាំង​សមត្ថកិច្ច​ភ្លាម ជន​ដៃដល់​នោះ​ក៏​ទាញ​កាំបិត​ដេញ​កាប់​រហូត​ត្រូវ​ជនរងគ្រោះ​រងរបួស​តែម្តង​។​
​បច្ចុប្បន្ន​ជនសង្ស័យ​ត្រូវបាន​ឃាត់ខ្លួន​នៅ​អធិការដ្ឋាន​នគរបាល​ខណ្ឌ​ព្រែក​ព្នៅ ដើម្បី​កសាង​សំណុំរឿង​បញ្ជូន​ទៅ​តុលាការ​៕ ដោយ​៖​បញ្ញា​ស័ក្តិ​

   

+85571 614 000 5
Contact Us Telephone

spot_img