ភ្នំពេញ-ក្រោយពេលសម្រិតសម្រាំងយ៉ាងយកចិត្តទុកដាក់ អស់រយៈពេលមួយរយៈធំ ផលិតកម្ម Wonder Filmបានសម្រេចដាក់បញ្ចាំងរឿងរបស់ខ្លួនហើយ កាលពីពេលថ្មីៗនេះ នៅរោងភាពយន្ត មេជើរ ស៊ីណើផ្លិចបាយស្មាត នៅផ្សារទំនើបសូរិយា ក្រោមវត្តមានរបស់តារាស្រីប្រុសជាច្រើនដួង។
រឿង “ផ្ទះចិញ្ចឹមខ្មោច” ជាប្រភេទរឿងលងរន្ធត់ពញ្ញាក់អារម្មណ៍ ព្រឺព្រួច បូករួមទាំងមានការបង្ហាញពីឈុតឆាកកំប្លែងស្នេហាគំនុំគំគួនគ្នា បានធ្វើឲ្យផលិតករ នៅមានសង្ឃឹមនៅឡើយថា រឿងមួយនេះ នឹងទទួលបានការគាំទ្រច្រើនពីសំណាក់អ្នកទស្សនា ត្បិតរឿង “ផ្ទះចិញ្ចឹមខ្មោច”។ មានតួរសម្តែងល្បីជាច្រើនរូប រួមគ្នា ជាពិសេស ផ្ទះចិញ្ចឹមខ្មោចគឺចូលរួមពីតារាសម្តែងសិចស៊ី យេយេ កញ្ញា ដេនីក្វាន់។ ប៉ុន្តែអ្វីដែលគួរឲ្យសោកស្តាយនោះ តួឯកស្រី នាង ដេននីក្វាន់ បែជាអវត្តមានទៅវិញ។ “ផ្ទះចិញ្ចឹមខ្មោច” ឃើញមានតួអង្គសម្តែងសំខាន់ៗមាននាយគ្រឿង លោកBIG ប៉ីប៉ីឌី កញ្ញាដេនីក្វាន់ កញ្ញាផប រចនា និងតារាកិត្តិយសជាច្រើនដួងទៀត។ ភាពយន្តរឿង “ផ្ទះចិញ្ចឹមខ្មោច” ក្រោយប្រកាសសម្ពោធ ក៏មានការបើកឱកាសឲ្យសិល្បករទាំងអស់ និងភ្ញៀវកិត្តិយសចូលរួមទស្សនា ដើម្បីចង់ដឹងថា សាច់រឿងមានរសជាតិទាក់ទាញដល់ចំណុចណា។
យ៉ាងណាមិញសាច់រឿងឃើញថា អាចឆក់ចិត្តទស្សនិកជនចូលចិត្តអាចរង់ចាំអង្គុយទស្សនាបានពីដើមទីដល់ទីបញ្ចប់នៃរឿង។ “ផ្ទះចិញ្ចឹមខ្មោច” នឹងចាក់បញ្ចាំងជាផ្លូវការនៅថ្ងៃ៨ ខែមីនា ឆ្នាំ២០១៨នេះតទៅ គ្រប់រោងភាពយន្តទាំងអស់ ក្នុងរាជធានីភ្នំពេញ។ ដូចនេះមិត្តយុវវ័យដែលស្គាល់ និងចូលចិត្តស្នាដៃរឿងបែបខ្មោច និងដឹងពីទេពកោសល្យផលិតរឿងរបស់ផលិតកម្មវ៉នឌឺហ្វីម អាចចូលរួមទស្សនាដើម្បីជាការលើកទឹកចិត្តដល់តារាសម្តែង និងក្រុមការងារផលិត៕ ដោយ-គីម ស្រីរ័ត្ន
