ស្វាយរៀង៖ នៅព្រឹក១០រោច ខែផល្គុន ឆ្នាំរកា នព្វស័ក ព.ស ២៥៦១ ត្រូវនឹងថ្ងៃ១១ ខែមីនា ឆ្នាំ២០១៨ នេះ លោក ជុក មុន្នី អនុប្រធានក្រុមការងារថ្នាក់ជាតិចុះជួយក្រុងស្វាយរៀង ខេត្តស្វាយរៀង និង លោក កែរ រដ្ឋា អនុប្រធានប្រធានក្រុមការងារចុះជួយក្រុងស្វាយរៀង និងជាប្រធានក្រុមការងារចុះជួយសង្កាត់ស្វាយរៀង បានចុះជួបសំណេះសំណាលសួរសុខទុក្ខ គ្រួសារគណបក្សប្រជាជនកម្ពុជា ចំនួន២៦០គ្រួសារ នៅក្នុងភូមិចុងព្រែក សង្កាត់ស្វាយរៀង ។
ចូលរួមក្នុងឱកាសនោះរួមមាន លោក លោកស្រី ជាប្រធាន អនុប្រធាន សមាជិកក្រុមការងារខេត្ត ចុះជួយសង្កាត់ស្វាយរៀង តំណាងគណកម្មាធិការគណបក្សក្រុង គណកម្មាធិការគណបក្សសង្កាត់ និងសាខាបក្សភូមិទាំង ៧ ក្នុងសង្កាត់ស្វាយរៀង ។
លោក កែរ រដ្ឋា បានលើកឡើងពីការរីកចម្រើនរហូតដល់សព្វថ្ងៃនេះគឺបានមកពីការនាំដ៏ត្រឹមត្រូវប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា ។ ដោយឡែកនៅក្នុងខេត្តស្វាយរៀង ប៉ុន្មានឆ្នាំនេះ មានការរីកចម្រើនយ៉ាងខ្លាំង ដែល ទាំងអស់នេះក៏ដោយសារការខិតខំប្រឹងប្រែងរបស់អាជ្ញាធរខេត្ត និងក្រុមការងារទាំងអស់ ដែលមានលោកស្រីបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងរដ្ឋសភាព្រឹទ្ធសភានិងអធិការកិច្ច និងជាប្រធានក្រុមការងារគណកម្មការធិការកណ្ដាលចុះជួយខេត្តស្វាយរៀង ដែលជានិច្ចជាកាលតែងតែគិតគូពីសុខទុក្ខ និងជីវភាពរស់នៅរបស់ប្រជាពលរដ្ឋ ។ លោក កែរ រដ្ឋា ក៏បានធ្វើការសំណូមពរដល់ប្រជាពលរដ្ឋទាំងអស់ ត្រូវចូលរួមក្នុងការអភិវឌ្ឍកែលំម្អទីក្រុង អនាម័យល្អ ដើម្បីទទួលបានរំដួល ៣ទង នៅឆ្នាំខាងមុខ ហើយនិងអាចជួយកាត់បន្ថយជំងឺឆ្លងនានាផងដែរ ។
លោក ជុក មុន្នី បានជម្រាបជូនអំពី សភាពការណ៍នយោបាយបច្ចុប្បន្ន ពន្យល់ពីការធ្វើបដិវត្តពណ៌របស់អតីតគណបក្សសង្គ្រោះជាតិ ជនក្បត់ជាតិ កឹម សុខា និង សម រង្ស៊ី ការរំលាយបក្សសង្គ្រោះជាតិ និងជម្រាបជូននូវសមិទ្ធផលនានា ដែលគណបក្សប្រជាជនកម្ពុជា សម្រេចបាន នាពេលកន្លងមក ជាពិសេសស្នើសុំអោយ សមាជិកទាំងអស់បន្តគាំទ្រ និងបោះឆ្នោតជូនគណបក្សប្រជាជនកម្ពុជាបន្តទៀត ។ លោកបានបញ្ជាក់ថា ៖ ក្នុងឆ្នាំ២០១៨ នេះ ប្រាក់បៀវត្សមន្ត្រីរាជការ កងកំលាំងប្រដាប់អាវុធ កម្មករ ត្រូវបានតម្លើង ។ ការទទួលបាននូវសេវាថែទាំសុខភាពដោយមិនគិតថ្លៃ ទាំងកម្មករក្នុងប្រព័ន្ធ ក្រៅប្រព័ន្ធ កីឡាករ ក្រុមប្រឹក្សាឃុំសង្កាត់ មេភូមិ ជំនួយការភូមិ មន្ត្រីរាជការ ក្រុមដោះមីន ។ល។ ក្នុងឱកាសនោះដែរ ក្រុមការងារក៏ បានទទួលយកមកពិនិត្យ នូវសំណូមពររបស់ប្រជាពលរដ្ឋមួយចំនួន ដូចជាផ្លូវ និង លូ ជាដើម ។ ក្នុងនោះដែរ លោក កែរ រដ្ឋា បានឧបត្ថម្ភថវិកាសមាជិកចូលរួមម្នាក់ៗ ចំនួន ១.០០០០រៀល ៕ វ៉ៃកូ
