នាព្រឹកថ្ងៃទី១២ ខែមីនា ឆ្នាំ២០១៨នេះ ប្រជាពលរដ្ឋជាច្រើនសហគមន៍បាននាំគ្នាមកដាក់ញត្តិនៅក្រសួងរៀបចំដែនដី នគររូបនីយកម្ម និងសំណង់ ក្នុងវិវាទដីធ្លី។ បើតាមខ្លឹមសារនៃញត្តិ ពលរដ្ឋដែលអះអាងថាមានផលប៉ះពាល់នោះគឺចំនួន៦៨២២គ្រួសារ លើផ្ទៃដីចំនួន១៩២៤៥,០២ហិចតា។ ក្នុងខ្លឹមសារនៃញត្តិនេះ បានសរសេរថា ទំនាស់នេះបានអូសបណ្ដាយអស់រយៈកាលជាង១០ឆ្នាំ មិនត្រឹមតែប៉ុណ្ណោះការទាមទាររបស់ពួកគេតែងតែទទួលបាននូវការគំរាមកំហែងពីសំណាក់ក្រុមហ៊ុន ដែលសហការជាមួយអាជ្ញាធរមានសមត្ថកិច្ច។
ប្រជាពលរដ្ឋដែលមានជម្លោះដីធ្លីជិត២០០នាក់មកពីខេត្តចំនួន៤ ប្រមូលផ្តុំគ្នានៅរាជធានីភ្នំពេញនៅព្រឹកនេះ ហើយបានយកញ្ញត្តិទៅដាក់នៅតាមក្រសួងស្ថាប័នរដ្ឋមួយចំនួន ដើម្បីសុំឲ្យពន្លឿនស្វែងរកដំណោះស្រាយឲ្យពួកគេឲ្យបានឆាប់រហ័ស។
ពលរដ្ឋទាំងនោះមកពីខេត្តចំនួន៤រួមមានខេត្តស្វាយរៀង កណ្តាល ត្បូងឃ្មុំ និងខេត្តព្រះសីហនុ។
ប្រធានខទ្ទុការល័យនាយករដ្ឋមន្ត្រីលោកប៉ាល់ ច័ន្ទតារា ដែលចេញមកទទួលញាត្តិពីពលរដ្ឋថាលោកនឹងពិនិត្យទៅលើពាក្យបណ្តឹងទាំងនោះ នឹងរៀបចំជូនប្រធានអាជ្ញាធរជាតិដោះស្រាយវិវាទដីធ្លីលោក ប៊ិន ឈិន ដើម្បីពិនិត្យដោះស្រាយជួនពលរដ្ឋទាំងនោះ៕ ដោយ៖បញ្ញាស័ក្តិ
