ភ្នំពេញ-រឿង “នេះឬជីវិត” កំពុងតែឈរលើតារានៅក្នុងម៉ោងមាស របស់ស្ថានីយ៍ទូរទស្សន៍ប៉ុស្តិ៍លេខ៥ នេះបើធៀបនឹងរឿងផ្សេងៗទៀត របស់ទូរទស្សន៍ ប៉ុស្តិ៍លេខ៥ ក្រោយរឿង “នេះឬជីវិត” ត្រូវបានទិញសិទ្ធិយកមកថតសារជាថ្មី តាមលំនាំ រឿង “ជីវិតនាងឡាំយ៉ង” ។
ឯកសារដែលបានបញ្ចេញដោយក្រុមស្រាវជ្រាវប្រចាំខែ ខាងផ្នែកសោតទស្សន៍យ៉ាងហោច ៣ ស្ថាប័នផ្សេងគ្នា
ដែលក្នុងនោះមានទាំងស្ថាប័នស្រាវជ្រាវអន្តរជាតិធំ ២ គឺ Kantar Media និង CMRD ផង បានបង្ហាញ សម្រាប់ម៉ោងមាស ដែលបណ្ដាទូរទស្សន៍ទាំងអស់បានចាក់រឿងខ្មែរប្រជែងគ្នា ភាពយន្តរឿង “នេះឬជីវិត” របស់ប៉ុស្ដិ៍លេខ៥ បានឈរលំដាប់ទី១។
យោងតាម Rating ដែលបានបញ្ចេញ គឺភាពយន្តនេះនាំមុខបណ្ដាភាពយន្តផ្សេងទៀតដាច់ឆ្ងាយតែម្ដង ដោយកើនដល់ជាង៣០ Rating ខណៈដែលភាពយន្តផ្សេងដែលដំណើរការដាក់បញ្ចាំងក្នុងថ្ងៃច័ន្ទ ដល់ថ្ងៃពុធ នៅវេលាម៉ោង៧ ដល់ម៉ោង៩យប់ដូចគ្នា ទទួលបាន Rating តែ១០ជាង និងក្រោមនេះឆ្ងាយ។
ស្របពេលដែលភាពយន្តនេះ ត្រូវបានសម្ដែងដោយកញ្ញា យ៉ែម ស្រីពេជ្រ ដែលជាតួអង្គនារី ប្ដីច្រើនឈានដល់ដំណាក់កាលកាន់តែជក់ចិត្ត ព្រោះតែនាងញៀនញ៉ាមនឹងប្រុសស្នេហ៍ផងនោះ ទើបកាន់តែធ្វើអោយអ្នកតាមដានជាប់ចិត្ត និងនិយាយពីរឿងនេះច្រើនខុសពីភាពយន្តខ្មែរផ្សេង។
យោងតាមការបញ្ជាក់ភាពយន្តនេះមានចំនួនជាង ៣០ភាគ ហើយទើបតែបានដំណើរការបញ្ចាំងបានភាគទី ១៣ ប៉ុណ្ណោះ ដោយភាពយន្តនេះត្រូវបានផលិតដោយក្រុមផលិតករថៃ ទើបគេឃើញភាពយន្តមួយនេះ ទទួលបានការគាំទ្រខ្លាំងក្នុងពេលទស្សនា។ កញ្ញា យ៉ែម ស្រីពេជ្រ ដែលជាតួអង្គឯកបានក្លាយជាតួអង្គដែលទទួលបានការចាប់អារម្មណ៍កាន់តែខ្លាំង ដោយសារតែនាងសម្ដែងមួយរឿងនេះបានល្អ ហើយចំភាពយន្តដែលមានការគាំទ្ររហូតដល់មានលេខរៀងនាំមុខគេក្នុងម៉ោងមាស៕ ដោយ-គីមស្រីរ័ត្ន