ភ្នំពេញ ៖ ចោរប្លន់ប្រដាប់អាវុធម្នាក់ បានធ្វើសកម្មភាពប្លន់គេនៅខេត្តព្រៃវែង រួចគេចខ្លួនមកសម្ងំលាក់ខ្លួន នៅភ្នំពេញអស់រយៈពេល៩ឆ្នាំ ទីបំផុតជាប់អន្ទាក់របស់សមត្ថកិច្ចដដែល នៅល្ងាចថ្ងៃទី១២ ខែមីនា ឆ្នាំ២០១៨ នៅបន្ទប់ផ្ទះជួល ស្នាក់នៅរបស់គេ ទីតាំងនៅភូមិស្លែងរលើង សង្កាត់អូបែកក្អម ខណ្ឌសែនសុខ។
ការចាប់ខ្លួនជនខាងលើធ្វើឡើងដោយមានកាសហការគ្នារវាងនគបាលស្នងការខេត្តព្រៃវែង ជាមួយនគរបាលខណ្ឌសែនសុខ រាជធានីភ្នំពេញបន្ទាប់ពីម្ចាស់ករណីបានទទួលព័ត៌មានសម្ងាត់ និងរកឃើញជនជាប់ចោទសម្ងំលាក់ខ្លួននៅទីនេះ។
ប៉ូលិសបានអោយដឹងថា ជនជាប់ចោទឈ្មោះ ស៊ូ ម៉ៅ ហៅ ស៊ូ ពៅ ភេទប្រុសអាយុ៣៧ឆ្នាំ ស្នាក់នៅផ្ទះជួលក្នុងភូមិស្លែងរលើង សង្កាត់អូរបែកក្អម ខណ្ឌសែនសុខ ។ ជនជាប់ចោទត្រូវបានសមត្ថកិច្ចចាប់ខ្លួនតាមបញ្ជា លោក សុខ សឿន ចៅក្រមស៊ើបសួរ របស់តុលាការខេត្តព្រៃវៃង តាមរយៈដីកាលេខ ៩៦/២០០៩ ចុះថ្ងៃទី ០៤.០៦.២០០៩ ដើម្បីយកមកផ្តន្ទាទោសតាមច្បាប់។
សមត្ថកិច្ចខេត្តព្រៃវែងបានបញ្ជាក់ថា៖ជនជាប់ចោទបានធ្វើសកម្មភាពប្លន់ប្រដាប់អាវុធប្រព្រឹត្តកាលពីថ្ងៃទី២១ ខែមេសា ឆ្នាំ២០០៩ នៅចំណុចភូមិក្រាំងលាវ ឃុំចាម ស្រុកកំពង់ត្របែក ខេត្តព្រៃវែង។ ក្រោយពេលគេធ្វើសកម្មភាព ប្លន់ទ្រព្យសម្បត្តិគេរួច ជននេះ បានរត់គេចខ្លួនពីស្រុកកំណើត មករស់នៅលាក់ខ្លួនចល័ត តាមផ្ទះជួល នៅក្នុងក្រុងភ្នំពេញ រហូតមកដល់ពេលនេះ រយៈពេល៩ឆ្នាំទើបចាប់ខ្លួនបាន៕ ដោយ៖បញ្ញាស័ក្តិ