ភ្នំពេញ ៖ គណៈកម្មាធិការជាតិរៀបចំការបោះឆ្នោត (គ.ជ.ប) បានចេញសេចក្តីប្រកាសព័ត៌មានជុំវិញលទ្ធផលនៃជំនួបរវាងលោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត ជាមួយនឹងលោកស្រី រ៉ូណា ស្មីត (Rhona Smith) អ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្សនៅកម្ពុជា នៅទីស្នាក់ការរបស់គ.ជ.ប នាព្រឹកថ្ងៃទី១៣ ខែមីនា ឆ្នាំ២០១៨ បានពិភាក្សាការងារស្តីពីការបោះឆ្នោតប្រកបដោយសេរី ត្រឹមត្រូវ និងយុត្តិធម៌។
ថ្លែងប្រាប់អ្នកសារព័ត៌មានបន្ទាប់ពីជំនួបពិភាក្សាជាមួយលោកស្រីរ៉ូណា ស្មីត លោកហង្ស ពុទ្ធា សមាជិកនិងជាអ្នកនាំពាក្យគ.ជ.ប មានប្រសាសន៍ថា ជំនួបរយៈពេលកន្លងមកនេះ អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្ស មានជំហរគាំទ្រ និងមានទំនុកចិត្តមកលើគ.ជ.ប ដែលបានរៀបចំការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៤ ឆ្នាំ២០១៧ បានបង្ហាញពីការគោរសិទ្ធិមនុស្ស សិទ្ធិបោះឆ្នោត និងបានទទួលស្គាល់ការងាររបស់គ.ជ.ប កន្លងមក។
លោកស្រីរ៉ូណាស្មីត បានលើកឡើងពីក្តីព្រួយបារម្ភថា ក្នុងស្ថាប័នព្រឹទ្ធសភាមានបក្សតែមួយ ប៉ុន្តែករណីនេះលោកហង្ស ពុទ្ធា បានពន្យល់ថា ការដែលមានបក្សតែមួយ គឺដោយសារតែនេះជាលទ្ធផលដែលបានពីការបោះឆ្នោត គ្មាននរណាម្នាក់អាចកែប្រែលទ្ធផលនេះបានទេ។ លោកបានបន្ថែមថា ការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ ខាងមុខនេះ អ្នករាយការណ៍ពិសេស មានការជឿជាក់ថា គ.ជ.ប នឹងគោរពបាននូវសិទ្ធិនយោបាយរបស់ប្រជាពលរដ្ឋ មានន័យថា ប្រជាពលរដ្ឋដែលមានឈ្មោះក្នុងបញ្ជីបោះឆ្នោត ផ្លូវការមានសិទ្ធិពេញលេញក្នុងការចូលរួមបោះឆ្នោតនាពេលខាងមុខ ហើយសន្លឹកឆ្នោតរបស់ពួកគាត់នឹងត្រូវបានរាប់យ៉ាងត្រឹមត្រូវ។ ចំពោះការចុះបញ្ជីបេក្ខជនគណបក្សនយោបាយ និងការចុះបញ្ជីគណបក្សនយោបាយ ដែលនឹងប្រព្រឹត្តទៅចាប់ពីថ្ងៃទី៣០ខែមេសាឆ្នាំ២០១៨ គ.ជ.ប ស្វាគមន៍គ្រប់គណបក្សនយោបាយ ឲ្យតែបំពេញបានត្រឹមត្រូវតាមទម្រប់ច្បាប់។ លោកបានសង្កត់ធ្ងន់ថា គ.ជ.ប បានអះអាងចំពោះមុខលោកស្រីរ៉ូណាស្មីតថា នឹងរៀបចំការបោះឆ្នោតមួយអាចទទួលយកបាន ដែលគណបក្សនយោបាយទាំងអស់មានភាពស្មើគ្នា ចំពោះមុខច្បាប់ ស្មើភាពគ្នាក្នុងការធ្វើសកម្មភាពផ្សេងៗស្របតាមច្បាប់។
លោក ស៊ិក ប៊ុនហុក ប្រធានគ.ជ.ប បានស្នើទៅកាន់លោស្រីរ៉ូណាស្មីត តំណាងអង្គការសហប្រជាជាតិ ឱ្យដាក់អ្នកសង្កេតការណ៍ ឬរៀបចំឲ្យមានការិយាល័យអង្គការសហប្រជាជាតិនៅទីស្នាក់ការ គ.ជ.ប ដើម្បីឃ្លាំមើលសុចរិតភាពរបស់គ.ជ.ប ដែលតាំងពីមុនមក គ.ជ.ប តែងគោរពការបោះឆ្នោតរបស់ប្រជាពលរដ្ឋ។
លោកបានបញ្ជាក់ថា តាមបទពិសោធន៍សម្រាប់ការបោះឆ្នោតសកលក្នុងឆ្នាំ២០១៧ និងសម្រាប់ការបោះឆ្នោតអសកលឆ្នាំ២០១៨ គ.ជ.ប ទទួលបានជោគជ័យយ៉ាងខ្លាំង ហើយបទពិសោធន៍ដ៏ល្អនេះ គ.ជ.ប សង្ឃឹមថា ការឃោសនាបោះឆ្នោត នឹងគ្មានបញ្ហាអ្វីធំដុំនោះទេ ព្រោះ គ.ជ.ប មានកម្មវិធីច្បាស់លាស់ សម្រាប់គណបក្សនយោបាយនីមួយៗ ជាពិសេស គ.ជ.ប អនុវត្តការងារទៅតាមបទបញ្ជា នីតិវិធី និងច្បាប់ ដែលមានជាធរមាន។
លោកបានថ្លែងដូច្នេះថា “គ.ជ.ប ក៏ស្នើសុំឲ្យលោកស្រី រ៉ូណា ស្មីត ដាក់តំណាងសង្កេតការណ៍របស់ខ្លួន ឬ Office របស់ខ្លួននៅទីស្នាក់ការ គ.ជ.ប នេះឯងតែម្ដង។ ជុំវិញការស្នើសុំនេះ មិនទាន់មានការបញ្ជាក់ពីលោកស្រី រ៉ូណា ស្មីត អ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្សនៅកម្ពុជានៅឡើយទេ”។
ចុងបញ្ចប់នៃកិច្ចជំនួប លោកស្រី រ៉ូណា ស្មីត លើកឡើងថា លោកស្រីបានយកចិត្តទុកដាក់យ៉ាងខ្លាំងលើសកម្មភាពការងាររៀបចំដំណើរការបោះឆ្នោតរបស់គ.ជ.ប។ លោកស្រីសង្ឃឹមថា ការបោះឆ្នោតជ្រើសតាំងតំណាងរាស្ត្រឆ្នាំ២០១៨ នឹងទទួលបានជោគជ័យដូចការបោះឆ្នោតជ្រើសរើសក្រុមប្រឹក្សាឃុំសង្កាត់ផងដែរ ប៉ុន្តែលោកស្រីនៅតែបានបង្ហាញការព្រួយបារម្ភចំពោះការបោះឆ្នោតជ្រើសតាំងតំណាងរាស្ត្រ នីតិកាលទី៦ខាងមុខ ដោយលោកស្រីបានជំរុញឲ្យ គ.ជ.ប ត្រូវធានាឲ្យប្រជាពលរដ្ឋមានសិទ្ធិស្មើៗគ្នា ក្នុងការជ្រើសរើសតំណាងរបស់ខ្លួនប្រកបដោយក្តីពេញចិត្ត និងបានជំរុញឲ្យ គ.ជ.ប អនុវត្តនូវបទប្បញ្ញត្តិនានាដែលមានចែងស្រាប់ ដើម្បីធានាឲ្យមានការប្រកួតប្រជែងដោយស្មើៗភាពគ្នា។
សូមជម្រាបថា ការបោះឆ្នោតជ្រើសតាំងតំណាងរាស្ត្រ នីតិកាលទី៦ ដែលនឹងត្រូវដំណើការឡើងនាថ្ងៃទី២៩ ខែកក្កដា ឆ្នាំ២០១៨ ៕ ដោយ៖បញ្ញាស័ក្តិ