កំពង់ចាម ៖ សម្តេចតេជោ ហ៊ុន សែន បាននាំយកនូវសៀវភៅភិរម្យ អ៊ូ (ក្រមង៉ុយ) និង បណ្ឌិត អ៊ូចុង ចែកជូនលោកគ្រូអ្នកគ្រូចំនួន ១.៥៥២នាក់។ សម្តេចតេជោ បានត្រៀម ១១ម៉ឺនក្បាល សម្រាប់ចែកជូនដល់គ្រូបង្រៀនទូទាំងប្រទេស។
សម្តេចតេជោនឹងនាំយកសៀវភៅនេះទៅចែកជូនសិស្សនិស្សិត ដែលកំពុងសិក្សានៅប្រទេសអូស្ត្រាលី ចំនួន ២.៥០០ ក្បាលផងដែរ នៅក្នុងពេលអញ្ជើញទៅចូលរួមកិច្ចប្រជុំកំពូលអូស្ត្រាលីអាស៊ានខាងមុខនេះ។
ប្រមុខរាជរដ្ឋាភិបាលកម្ពុជា បានថ្លែងបែបនេះនៅក្នុងពិធីសម្ពោធដាក់ឲ្យប្រើប្រាស់ជាផ្លូវការស្ពានឆ្លងកាត់ទន្លេពីក្រុងកំពង់ចាម ទៅកាន់កោះប៉ែន នៅថ្ងៃពុធ ទី១៤ ខែមីនា ឆ្នាំ២០១៨នេះ។
សម្តេចតេជោ ហ៊ុន សែន បានមានប្រសាសន៍ថា “ឥឡូវខ្ញុំនឹងដឹកសៀវភៅនេះជូនពលរដ្ឋខ្មែរ ដែលរស់នៅឯប្រទេសអូស្ត្រាលី និងញូហ្សេឡែន ចំនួន២៥០០ច្បាប់ ដឹកចេញទៅថ្ងៃស្អែកនេះ”។ សម្តេចថា សៀវភៅដែលចែកជូនលោកគ្រូអ្នកគ្រូនៅកម្ពុជា ខុសក្របខាងក្រៅដោយប្រើពាក្យ អរគុណលោកគ្រូ អ្នកគ្រូ រីឯក្របសៀវភៅដែលយកទៅចែកជូនពលរដ្ឋខ្មែរ នៅប្រទេសអូស្ត្រាលី និងញូហ្សេឡែន គឺនិយាយចំពោះបងប្អូនខ្មែរនៅទីនោះ អីចឹងទេសូមទទួលសៀវនេះ ដើម្បីប្រើប្រាស់ផ្ទាល់ខ្លួនមើលលេង មិនមែនគ្រាន់តែខ្លួននោះទេ គឺព្រមទាំងក្រុមគ្រួសារក៏ត្រូវអនុញ្ញាតឲ្យមើលផងដែរ។
លោកគ្រូ អ្នកគ្រូ នៅក្នុងស្រុកកំពង់សៀម ចំនួន១.០៥២នាក់ ក្នុងម្នាក់ៗទទួលបានសៀវភៅអប់រំរបស់ ក្រមង៉ុយ និងបណ្ឌិត អ៊ូ ចុង ចំនួនពីរក្បាល ការផ្តល់សៀវភៅនេះ គឺចង់ឲ្យលោកគ្រូ អ្នគ្រូទាំងអស់នៅក្នុងប្រទេសកម្ពុជា ចេះនូវច្បាប់របស់ក្រមង៉ុយ ចេះនូវច្បាប់ការអប់រំទូន្មានរបស់បណ្ឌិត អ៊ូ ចុង ដូច្នេះហើយបានជាខ្ញុំបោះសៀវភៅទាំងពីរក្បាលនេះចំនួន១១ម៉ឺនច្បាប់៕ ដោយ ៖ បញ្ញាស័ក្តិ
