ភ្នំពេញ ៖ គណៈកម្មាធិការអចិន្ត្រៃយ៍រដ្ឋសភា បានសម្រេចប្រកាសជ្រើសរើសសមាជិកព្រឹទ្ធសភាចំនួនពីររូប សម្រាប់ព្រឹទ្ធសភានីតិកាលទី៤។ ក្នុងកិច្ចប្រជុំគណៈកម្មាធិការអចិន្ត្រៃយ៍រដ្ឋសភា នាព្រឹកថ្ងៃទី១៥ ខែមីនា ឆ្នាំ២០១៨ ដែលដឹកនាំដោយ សម្តេចអគ្គមហាពញាចក្រី ហេង សំរិន ប្រធានរដ្ឋសភា រដ្ឋសភាបានប្រគល់ភារកិច្ចដល់អគ្គលេខាធិការដ្ឋានរដ្ឋសភា ធ្វើសេចក្តីជូនដំណឹងប្រកាសជ្រើសរើសឥស្សរជនបេក្ខជនចាប់ពីថ្ងៃនេះទៅ ហើយធ្វើរបាយការណ៍ជូនគណៈកម្មាធិការអចិន្ត្រៃយ៍រដ្ឋសភាវិញនៅក្នុងរយៈពេល១៥ថ្ងៃ។
សូមជម្រាបថា កម្ពុជាទើបតែរៀបចំការបោះឆ្នោតជ្រើសរើសសមាជិកព្រឹទ្ធសភានីតិកាលទី៤ កាលពីថ្ងៃអាទិត្យ ទី២៥ ខែកុម្ភៈ ឆ្នាំ២០១៨ កន្លងមកនេះ។ ការបោះឆ្នោតជ្រើសរើសសមាជិកព្រឹទ្ធសភានីតិកាលទី៤នេះ មានគណបក្សនយោបាយចំនួន៤ចូលរួមប្រកួតប្រជែងរួមមាន គណបក្ស ប្រជាជនកម្ពុជា គណបក្សយុវជនកម្ពុជា គណបក្សខ្មែររួបរួមជាតិ និងគណបក្សរាជានិយមហ្វ៊ុនស៊ិនប៉ិច។ ជាលទ្ធផលបណ្តោះអាសន្ន គណបក្សប្រជាជនកម្ពុជាបានឈ្នះអាសនៈចំនួន៥៨។
អាសនៈព្រឹទ្ធសភាមានចំនួន៦២។ ៥៨បានមកពីការបោះឆ្នោតអសកល។ ២អាសនៈតែងតាំងដោយព្រះមហាក្សត្រ និង២អាសនៈទៀតជ្រើសតាំងដោយរដ្ឋសភា។ ការប្រកាសជ្រើសរើសសមាជិកព្រឹទ្ធសភាចំនួនពីររូបនាពេលនេះ គឺជាការបំពេញតាមច្បាប់ដែលបានកំណត់។
នៅក្នុងកិច្ចប្រជុំគណៈកម្មាធិការអិចន្ត្រៃយ៍រដ្ឋសភា នាព្រឹកថ្ងៃទី១៥មីនានេះ រដ្ឋសភាក៏បានអនុម័តយល់ព្រមបញ្ចូលក្នុងរបៀបវារៈនៃសម័យប្រជុំរដ្ឋសភាលើកទី១០ នីតិកាលទី៥ នូវសេចក្តីព្រាងច្បាប់ស្តីពី អាជ្ញាបណ្ណបញ្ជាសម្រាប់សុខភាពសាធារណៈ និងបានអនុម័តលើរបាយការណ៍ស្តីពី សកម្មភាពរបស់រដ្ឋសភាចន្លោះសម័យប្រជុំរដ្ឋសភាលើកទី៩ និងលើកទី១០ នីតិកាលទី៥ ដោយបានប្រគល់ភារកិច្ចជូនអគ្គលេខាធិការដ្ឋានរដ្ឋសភា ពិនិត្យបញ្ចូលបន្ថែមទៀតនូវសកម្មភាពរបស់រដ្ឋសភា រហូតដល់ថ្ងៃបើកសម័យប្រជុំរដ្ឋសភាលើកទី១០ នីតិកាលទី៥ នាពេលខាងមុខ៕ ដោយ ៖ បញ្ញាស័ក្តិ
