Friday, March 29, 2024

ទំនាក់ទំនង : 0716140005

Address : #16 (Borey New World) St. 6A sk . Phnom Penh Thmey kh. Sen Sok ct., Phnom Penh 120913 Office: +85523232725 Tel: 017 93 61 91

ផលប៉ះពាល់​នៃ​ការជក់បារី​ទៅលើ​សុខភាព ប្រឈម​នឹង​ការស្លាប់​មុន​អាយុ​

spot_img

​ភ្នំពេញ​៖ ការជក់បារី ផ្តល់​ផលវិបាក​យ៉ាងច្រើន​ដល់​សុខភាព អ្នក​ជក់បារី​នឹង​ក្លាយជា​ញៀន​បារី​យ៉ាង​ឆាប់រហ័ស​ដោយសារ​នីកូទីន និង​អាច​បណ្តាល​ឱ្យស្លាប់ និង​មាន​ជំងឺ​ធ្ងន់ធ្ងរ​ជាច្រើន ដែល​បណ្តាលឱ្យ​មានការ​ប្រឈម​នឹង​ការស្លាប់​មុន​អាយុ ។​

​ក្នុង​វគ្គ​បំប៉ន ស្តីពី​ការអនុវត្ត​បរិស្ថាន ទីក្រុង​គ្មាន​ផ្សែង​បារី កាលពី​ថ្ងៃទី​២៥​ខែតុលា​ឆ្នាំ​២០១៧ នៅ​សាលាខណ្ឌ​មានជ័យ លោកមា សុភាព បាន​ថ្លែងថា ផ្សែង​បារី ដែលជា​សារធាតុ​ញៀន​មួយ​ដែល​ធ្វើឱ្យ​អ្នក​ជក់បារី​កាន់តែ​ចង់​ជក់បារី​ថែមទៀត ។ មិនតែប៉ុណ្ណោះ ធ្វើឱ្យមាន​រោគសញ្ញា​ញៀន​ដែល​ពិបាក​ទ្រាំ ។ ក្រសួង​កំពុង​ស្វែងរក​កិច្ចសហការ​ពី​បណ្ដា​ក្រសួង​ស្ថាប័នរដ្ឋ​នានា ចូលរួម​បង្កើត​កន្លែងធ្វើការ​គ្មាន​ផ្សែង​បារី នៅ​គ្រា​ដែល​រដ្ឋាភិបាល​ក៏បាន​ជំរុញឱ្យមាន​ការអនុវត្ត​វិធានការ​នេះ​ឱ្យបាន​នៅ​ទូទាំងប្រទេស​។ ការចូលរួម​បង្កើត​ទីកន្លែង​ធ្វើការ​ក្នុង​ស្ថាប័ន​របស់ខ្លួន​គ្មាន​ផ្សែង​បារី ជា​ប្រយោជន៍​ចូលរួម​កាត់បន្ថយ​ភាពក្រីក្រ​របស់​ពលរដ្ឋ​។​

​លោក​បាន​បន្តថា ផលិតផល​ថ្នាំជក់​បង្ក​គ្រោះថ្នាក់​ធ្ងន់ធ្ងរ​ដល់​ទាំង​អ្នក​ជក់ និង​អ្នក​ស្រូប​ផ្សេង​បារី​ពី​គេ​។ ហើយ​នៅ​កម្ពុជា​ជាម​នុស្ស​ប្រមាណ​៣០​នាក់ បាន​ស្លាប់​ជា​រៀងរាល់ថ្ងៃ​ដោយសារ​ជំងឺ​ដែល​បង្ក​ពី​ការប្រើប្រាស់​ថ្នាំជក់​។ ថ្នាំជក់​ជា​ឃាតករ​លាក់​មុខ ហើយ​វា​ជា​ឧបសគ្គ​នៃ​ការអភិវឌ្ឍ​ប្រទេស​។ យើង​សង្ឃឹមថា វគ្គ​បណ្តុះបណ្តាល​នេះ នឹងចូលរួម​ចំណែក​ក្នុង​ការកសាង​សមត្ថភាព អាជ្ញា​ធរមាន​សមត្ថកិច្ច​បាន​មួយកម្រិត​ទៀត ដើម្បី​ចូលរួម​អនុវត្ត​ច្បាប់​ស្តីពី​ការត្រួតពិនិត្យ​ផលិតផល​ថ្នាំជក់ និង​ដើម្បី​ចូលរួម​កែប្រែ​រាជធានី​ភ្នំពេញ​ជាទី​ក្រុង​គ្មាន​ផ្សែង​បារី​។ ទីក្រុង​គ្មាន​ផ្សែង​បារី​គឺ​សំដៅ​ដល់​ការហាម​មិន​ឲ្យ​ជក់បារី​នៅ​កន្លែង​ដែលមាន​ដំបូល ក្រៅពី​កន្លែង​ដែលមាន​ដំបូល អ្នក​ជក់​មាន​សិទ្ធិ​ជក់​។ ដោយឡែក​កន្លែង​មួយចំនួន​ដូចជា សាលារៀន វត្ត​អារាម រមណីយដ្ឋាន​ប្រវត្តិសាស្ត្រ គ្រឹះស្ថាន​សុខាភិបាល សួន​កុមារ កន្លែង​ងាយ​ឆាបឆេះ ជាដើម ត្រូវបាន​ហាមឃាត់​មិន​ឲ្យ​ជក់​ក្នុង​បរិវេណ​ទាំងស្រុង​។​

​សូមបញ្ជាក់ថា ក្នុង​បណ្តា​ប្រទេស​អាស៊ាន មាន​ទីក្រុង​ជាច្រើន​ដែល​បានប្រកាសថា​ទីក្រុង​គ្មាន​ផ្សែង​បារី រួចហើយ ដូចជា ទីក្រុង​ម៉ា​ឡា​កា ទីក្រុង​ប៉េ​ណាំង ប្រទេស​ម៉ាឡេស៊ី វៀងចន្ទន៍ ហ្លួង​ប្រា​បាង ខេត្ត​ចំប៉ា​សាក់ ប្រទេស​ឡាវ ទីក្រុង​ហាយ​ឡុង ហ៊័​យ​អាន ប្រទេស​វៀតណាម ខេត្ត​ក្រា​បី ប្រទេស​ថៃ ទីក្រុង​ម៉ា​កា​ទី ក្រុង​អី​ឡូ​អី​ឡូ ប្រទេស​ហ្វីលីពីន ជាដើម​។

​លោក​វេជ្ជបណ្ឌិត មុំ គង់ នាយក​ប្រតិបត្តិ​អង្គការ​ចលនា​ដើម្បី​សុខភាព​កម្ពុជា បាន​សាទរ​ចំពោះ​ចំណាត់ការ​របស់​ក្រសួងសុខាភិបាល ដែល​ជំរុញ​ឲ្យ​ស្ថាប័នរដ្ឋ​បង្កើត​ទីកន្លែង​គ្មាន​ផ្សែង​បារី​នេះ​ឡើង​។ ក្រៅពីនេះ​លោក​បានស្នើ​ទៅ​រដ្ឋាភិបាល ក៏ដូចជា​ក្រសួងសុខាភិបាល ត្រូវ​បង្កើតជា​គោលនយោបាយ​ច្បាស់លាស់ ដើម្បី​គ្រប់​ដណ្ដប់​ការហាម​ជក់បារី​ឲ្យ​បាន​ទូលំទូលាយ​។​

​លោក មុំ គង់ មានប្រសាសន៍​បន្ថែមថា ចាប់ពី​កន្លែងធ្វើការ​ទៅដល់​ភោជនីយដ្ឋាន មធ្យោបាយ​ធ្វើដំណើរ​សាធារណៈ សួន​កុមារ និង​កន្លែង​សាធារណជន​ដទៃទៀត​ប្រមូល​ផ្ដុំគ្នា ។​ល​។ ត្រូវបាន​ហាមឃាត់​ក្នុងការ​ជក់បារី ហើយ​បើ​អ្នក​ចង់​ជក់បារី ត្រូវ​ប្រើប្រាស់​ទីសាធារណៈ ដែល​គ្មាន​មនុស្ស ចៀសវាង​ប៉ះពាល់​ដល់​អ្នកដទៃ​។ ការអនុវត្ត​ការហាមឃាត់​ការជក់បារី​នៅតាម​កន្លែងធ្វើការ​រដ្ឋ និង​ទីសាធារណៈ គឺជា​កាតព្វកិច្ច​ដែល​កម្ពុជា ត្រូវតែ​អនុវត្ត​ទៅតាម​មាត្រា​៨ នៃ​អនុសញ្ញា​ស្ដីពី​ការត្រួតពិនិត្យ​ថ្នាំជក់ ដែល​កម្ពុជា​បានផ្តល់​សច្ចាប័ន​ចូល​ជា​សមាជិក​តាំងពី​ឆ្នាំ​២០០៥​។​

​មាត្រា​៨ នៃ​អនុសញ្ញា​ស្ដីពី​ការត្រួតពិនិត្យ​ថ្នាំជក់ បាន​ចែងថា រាល់​ភាគី​នីមួយៗ​ជា​សមាជិក គឺ​ត្រូវមាន​វិធានការ​ច្បាស់លាស់​ពី​ការការពារ​ប្រជាពលរដ្ឋ​របស់ខ្លួន​ពី​ការ​ស្រូប​ផ្សែង​បារី និង​ត្រូវអនុវត្ត​ឲ្យ​មាន​ប្រសិទ្ធភាព​។​

​កញ្ញា ម៉ក់ ទេ​វិ​ន ប្រធាន​គម្រោង​នៃ​អង្គការ​ចលនា​ដើម្បី​សុខភាព​កម្ពុជា បាន​ឲ្យ​ដឹងថា ស្ថិតិ​នៃ​ការខាតបង់​ដោយសារ​ការប្រើប្រាស់​ថ្នាំជក់​នៅ​កម្ពុជា ដោយ​ក្នុងនោះ​នៅ​ឆ្នាំ​២០១៣ កម្ពុ​ជាមាន​អ្នក​ជក់បារី​សរុប​ប្រមាណ​១៤៧៨១១៣​ឬ​ជិត​១,៥​លាន​នាក់ ក្នុងនោះ​ប្រុស​៣៩​ភាគរយ និង​ស្រី​៣,៤​ភាគរយ​។ កញ្ញា បាន​បន្ថែមថា ការជក់បារី​បណ្តាល​ឲ្យ​ប្រជាពលរដ្ឋ​កម្ពុជា ប្រមាណ​១​ម៉ឺន​នាក់​បាន​ស្លាប់ ជា​រៀងរាល់ថ្ងៃ​ដោយសារ​ជំងឺ​ដែល​បង្កដោយ​ការប្រើប្រាស់​ថ្នាំជក់ ហើយ​ចំណាយ​ទៅលើ​ការទិញ​បារី​ស្នើ​នឹង​២០០​លាន​ដុល្លារ​។ នៅ​ឆ្នាំ​២០១៣ គ្រាន់តែ​ចំណាយ​ទៅលើ​ការព្យាបាល​ជំងឺ​៥​មុខ​ស្នើ​នឹង​១៦២​លាន​ដុល្លារ​។​

​គួរ​ឲ្យ​ដឹងផង​ដែរ​ថា ក្រសួងសុខាភិបាល​ព្រមាន​ផាកពិន័យ​ក្រុមហ៊ុន​ផលិតផល​ថ្នាំជក់ ដែល​មិន​អនុវត្តតាម​ច្បាប់​ស្តីពី​ការត្រួតពិនិត្យ​ផលិតផល​ថ្នាំជក់ ​អនុក្រឹត្យ​ស្តីពី​ការបោះពុម្ព​សារ​ព្រមាន​សុខភាព​ជា​ភាសា​ខ្មែរ និង​ជា​រូបភាព​លើ​កញ្ចប់​ផលិតផល​ថ្នាំជក់ ទំហំ​៥៥% បាន​ចូល​ជា​ធរមាន តាំងពី​ថ្ងៃទី ២២ ខែ កក្កដា ឆ្នាំ ២០១៦ ។ ប៉ុន្តែ​រហូតដល់​បច្ចុប្បន្ន​នេះ ក្រុមហ៊ុន​ផលិតផល​ថ្នាំជក់​មួយចំនួន​ពុំទាន់​អនុវត្តបាន​ពេញលេញ​នៅឡើយ​។ បន្ថែម​លើសពីនេះ​ទៀត គ្រប់​ក្រុមហ៊ុន​ផលិតផល​ថ្នាំជក់​នៅ​មិនទាន់​គោរព​បាន​លើ​វិធានការ​ចំពោះ​ការផ្សព្វផ្សាយ​ពាណិជ្ជក​ម្ម ការផ្សព្វផ្សាយ​លក់ និង​ការឧបត្ថម្ភ​កម្មវិធី​ដោយ​ឧស្សាហកម្ម​ថ្នាំជក់ ដូចដែល​មានចែង​ក្នុង​ច្បាប់​ស្តីពី​ការត្រួតពិនិត្យ​ផលិតផល​ថ្នាំជក់​នៅឡើយ​ទេ ដោយ​បន្ត​ការផ្សព្វផ្សាយ​ពាណិជ្ជកម្ម​ផលិតផល​ថ្នាំជក់​ក្រោមរូបភាព​ជាច្រើន​ដូចជា​តាម​រថយន្ត និង​ក្រុម​ស្ត្រី​ចល័ត​ជាដើម ដោយឡែក​ចំពោះ​ការដាក់​តាំង​ផលិតផល​ថ្នាំជក់​តាម​កន្លែង​លក់​វិញ ក្រុមហ៊ុន​ផលិតផល​ថ្នាំជក់ នៅតែ​បន្ត​ដាក់តាំង​ទូល​ក់​ផលិតផល​មិន​ត្រឹមត្រូវ​តាម​ប្រកាស​របស់​ក្រសួងសុខាភិបាល​ទេ ដូចជា​ដាក់តាំង​ធុង​បារី​លើសពី​មួយ ហើយ​ធុង​បារី និង​ផ្ទៃ​តាំង​ផលិតផល​ថ្នាំជក់​មាន​ចំនួន​លើស​ការកំណត់ ដោយ​វា​មាន​ទំហំ​ធំ និង​ពណ៌​ខុសពី​ការកំណត់​របស់​ក្រសួង​ដោយសារ​ធុង​ទាំងនោះ​មាន​រូបភាព​ផ្សាយពាណិជ្ជកម្ម​បារី​ជា​ពណ៌ ជា​មិត្ត​សញ្ញា​ក្រុមហ៊ុន​ជាដើម​។​


ក្រសួងសុខាភិបាល ក៏បាន​ព្រមាន​ដល់​ក្រុមហ៊ុន​ផលិតផល​ថ្នាំជក់​ទាំងអស់ កុំ​ឲ្យ​បន្ត​រំលោភច្បាប់​ទៀត​។ ក្នុងករណី​មិន​គោរព​លិខិត​ព្រមាន​នេះ ក្រសួងសុខាភិបាល​នឹងធ្វើ​ការផាកពិន័យ​ក្រុមហ៊ុន​ផលិតផល​ថ្នាំជក់​ដែល​ល្មើស​ទាំងនេះ ដូច​មានចែង​ក្នុង​ច្បាប់​ស្តីពី​ការត្រួតពិនិត្យ​ផលិតផល​ថ្នាំជក់​ជា​ធរមាន​នាពេលខាងមុខ​ឆាប់ៗ​នេះ​។​

​បើតាម​ការស្រាវជ្រាវ​បាន​ឲ្យ​ដឹងថា ការជក់បារី​អាច​បណ្ដាល​ឲ្យ​ស្ទះផ្លូវ​ដង្ហើម រលាក​ទងសួត កើតរោគ​មហារីក និង​ការចុះ​ខ្សោយ​ផ្លូវភេទ​ជាដើម​។ ក្រៅពីនេះ ការជក់បារី​អាចធ្វើ​ឲ្យ​អ្នក​គេង​មិន​លក់ បាយ​មិនបាន ឆាប់​ហេវ​ហត់​អស់កម្លាំង និង​កាត់បន្ថយ​អាយុ​ផងដែរ​។​
​ចំពោះ​ស្ត្រី​មាន​ផ្ទៃពោះ​វិញ ការជក់បារី​អាច​បណ្ដាល​ឲ្យ​ទារក​កើត​មិន​គ្រប់​ខែ ឬ​ស្លាប់ និង​បង្ក​គ្រោះថ្នាក់​ចំពោះ​ម្ដាយ​។ ជាតិ​នីកូទីន​នៅក្នុង​ថ្នាំជក់ អាច​បណ្ដាល​ឲ្យ​ត្បៀត​សរសៃឈាម​ក្នុង​ទងសុក ដែល​ធ្វើ​ឲ្យ​បរិមាណ​អុកស៊ីហ្សែន​ផ្គត់ផ្គង់​ទៅ​គភ៌​មានការ​ថយចុះ ជាហេតុ​បង្ក​ហានិភ័យ​យ៉ាងខ្លាំង​ក្នុងពេល​ទារក​ប្រសូត​។ បារី​គ្មាន​ប្រយោជន៍​ចំពោះ​សុខភាព​នោះទេ គឺ​មានតែ​ផលប៉ះពាល់​ម្យ៉ាង​ប៉ុណ្ណោះ​។​

​បើតាម​ការស្រាវជ្រាវ​មួយ​ផ្សេងទៀត​បាន​ឲ្យ​ដឹងថា មនុស្ស​ដែល​ឈប់​ជក់បារី​នៅ​អាយុ ៤០​ឆ្នាំ អាច​បង្កើន​អាយុ​បាន ១០​ឆ្នាំ​ទៀត​។ ការឈប់​ជក់បារី​នៅ​ពាក់កណ្ដាល​វ័យ អាច​បញ្ចៀស​ការស្លាប់​មុន​អាយុ​ជាង​អ្នក​ជក់​ដល់​ទៅ ៩០​ភាគរយ​។

​កញ្ញា ម៉ក់ ទេ​វិ​ន បានឱ្យដឹង​ផងដែរ​ថា កន្លងមក​ក៏​ធ្លាប់​ផ្សព្វផ្សាយ​ទៅកាន់​ម្ចាស់​អា​ជីក​ម្ម សេវាកម្ម​ទេសចរណ៍​មួយចំនួន​ក្នុង​នៅ​រាជធានី​ភ្នំពេញ​។ កញ្ញា បាន​បន្តថា បន្ទាប់ពី​ធ្វើការ​ផ្សព្វផ្សាយ​រួច ឃើញថា​ម្ចាស់​អាជីវកម្ម មានការ​យកចិត្តទុកដាក់​ចំពោះ​បរិស្ថាន​គ្មាន​ផ្សែង​បារី​នេះ ប៉ុន្តែ​នៅមាន​តំបន់​មួយចំនួន​ដែល​នៅតែមាន​អ្នក​ជក់​នៅក្នុង​ភោជនីយដ្ឋាន និង​សណ្ឋាគារ​នៅឡើយ​៕​​ ដោយ​៖​កូ​ឡាប​

 

spot_img
×