ភ្នំពេញ ៖ សាលារាជធានីភ្នំពេញ បានបង្កើតអោយមានការិយាល័យប្រជាពលរដ្ឋ ដើម្បីទទួលនិងដោះស្រាយពាក្យបណ្តឹង ក្រៅប្រព័ន្ធតុលាការ លើការផ្តល់សេវាសាធារណៈនិងការគ្រប់គ្រងរដ្ឋបាលនៅថ្នាក់ក្រោមជាតិដើម្បីលើកកំពស់ អភិបាលកិច្ចល្អ និងការអភិវឌ្ឍសេដ្ឋកិច្ចមូលដ្ឋាន។
ពាក់ព័ន្ធនឹងបង្កើតការិយាល័យប្រជាពលរដ្ឋនេះ ក្រុមប្រឹក្សារាជធានីភ្នំពេញ នៅរសៀលថ្ងៃទី២៣មីនានេះ បានប្រជុំបោះឆ្នោតជ្រើសរើស ប្រធាន អនុប្រធានការិយាល័យប្រជាពលរដ្ឋនៅរាជធានីភ្នំពេញ ហើយជាលទ្ធផលលោកជាម ហេង មន្ត្រីចូលនិវត្តន៍ត្រូវបានជាប់ឆ្នោតជាប្រធានការិយា ល័យប្រជាពលរដ្ឋនៅរាជធានីភ្នំពេញ។
ពិធីនេះធ្វើឡើងក្រោមអធិបតីភាពលោកម៉ប់ សារិន ប្រធានក្រុមប្រឹក្សារាជធានីភ្នំពេញនិងជាប្រធានគណៈកម្មាធិការបោះឆ្នោត ជាសមាជិកក្រុមប្រឹក្សារាជធានីភ្នំពេញ២១រូប តំណាងសភាពាណិជ្ជកម្ម៧រូប និងអង្គកាសង្គមស៊ីវិលបម្រើការងារនៅរាជធានីភ្នំពេញចំនួន៧អង្គកាស្មើនឹង៧នាក់។
ក្នុងការបោះឆ្នោតនេះមានបេក្ខភាពជាប្រធានមានចំនួន៣នាក់ ឈរឈ្មោះអោយគេបោះឆ្នោត ក្នុងនោះរួមមាន ៖ ១ លោកជាម ហេង មន្ត្រីចូលនិវត្តរដ្ឋបាលរាជធានី ២៖ លោកសែស សុខកុសល មន្ត្រីចូលនិវត្តរដ្ឋបាលរាជធានី និង៣៖ លោកអ៊ុំ ហ៊ីម មន្ត្រីចូលនិវត្តន៍រដ្ឋបាលរាជធានី ។ ចំណែកបេក្ខភាពជាអនុប្រធានក៏មានចំនួន៣រូបផងដែរ។
លោកស្រី ដោ សម្ផស្ស ប្រធានការិយាល័យលេខាធិការក្រុមប្រឹក្សារាជធានីភ្នំពេញ បានអោយដឹងថាក្រោយការបោះឆ្នោតជ្រើសរើសនេះ លោកជាម ហេង បានជាប់ឆ្នោតជាប្រធានការិយាល័យប្រជាពលរដ្ឋនៅរាជធានីភ្នំពេញ និងលោកស្រីឈុន ដាលីន ជាប់ជាអនុប្រធានការិយាល័យប្រជាពលរដ្ឋនៅរាជធានីភ្នំពេញ។
លោកស្រី ដោ សម្ផស្ស បានបញ្ជាក់អោយដឹងបន្តថា ការបង្កើតអោយមានការិយាល័យប្រជាពលរដ្ឋនេះ ក្រុមប្រឹក្សារាជធានីភ្នំពេញធ្វើឡើង ដើម្បីទទួលសម្រុះសម្រួលដោះស្រាយពាក្យបណ្តឹង ក្រៅប្រព័ន្ធតុលាការ ដែលពាក់ព័ន្ធទៅនឹងការផ្តល់សេវា សាធារណៈនិងការគ្រប់គ្រងរដ្ឋបាលនៅថ្នាក់ក្រោមជាតិ ក្នុងគោលបំណងលើកកំពស់ អភិបាលកិច្ចល្អ ក្នុងការផ្តល់សេវានិងការអភិវឌ្ឍសេដ្ឋកិច្ចមូលដ្ឋានប្រកបដោយតម្លាភាព គណនេយ្យភាពនិងប្រសិទ្ធភាព សំដៅបង្កើនជំនឿទុកចិត្តរបស់ប្រជាពលរដ្ឋនៅមូលដ្ឋាន៕ ដោយ ៖ បញ្ញាស័ក្តិ
