ភ្នំពេញ ៖ សម្តេចតេជោ ហ៊ុន សែន បានប្រកាសពីជំហរ នឹងគ្មានការចរចាជាមួយលោក សម រង្ស៊ី និងក្រុមមនុស្ស១១៨នាក់នោះទេ ដែលតុលាការកាត់សិទ្ធិនយោបាយ បន្ទាប់ពីក្រុមប្រឆាំងបានដុតរូបសម្តេចតេជោ នៅអូស្ត្រាលី។
សម្តេចតេជោ ហ៊ុន សែន ប្រកាសបិទបញ្ចប់ការចរចាជាមួយលោក សម រង្ស៊ី ក្នុងពិធីប្រគល់សញ្ញាបត្រដល់និស្សិតសាកលវិទ្យាល័យអាស៊ីអឺរ៉ុបនៅវិទ្យាស្ថានជាតិអប់រំ នាព្រឹកថ្ងៃទី២៧ ខែមីនា ឆ្នាំ២០១៨នេះ។ សម្តេចតេជោ ហ៊ុន សែន បានបញ្ជាក់ថា ជប៉ុន មិនបានដាក់គំនាប ណាមួយ លើសម្តេច ឲ្យមានការចរចា ជាមួយលោក សម រង្ស៊ី ។
សម្តេចប្រមុខរាជរដ្ឋាភិបាល បានធ្វើឡើងបន្ទាប់ពីមានប្រព័ន្ធផ្សាយមួយចំនួន រួមទាំងអតីតថ្នាក់ដឹកនាំ មេដឹកនាំអតីតបក្សសង្គ្រោះជាតិ ជាពិសេស គឺលោកសម រង្ស៊ី បានបង្ហាញក្តីសង្ឃឹមខ្ពស់ ទៅលើលទ្ធភាពចរចា ជាមួយសម្តេចតេជោ ហ៊ុន សែន បន្ទាប់ពីមានជំនួបមួយ រវាងសម្តេចជាមួយលោក Kentaro Sonoura ទីប្រឹក្សានាយករដ្ឋមន្ដ្រីជប៉ុន កាលពីថ្ងៃទី២៣ ខែមីនា ឆ្នាំ២០១៨កន្លងទៅនេះ។
សម្តេចតេជោ ហ៊ុន សែន បានបញ្ជាក់ថា លទ្ធភាពនៃការចរចាជាមួយទណ្ឌិត សម រង្ស៊ី មិនអាចកើតមាននោះឡើយ។ បើតាមសម្តេចតេជោ លទ្ធភាពនៃការចរចា មិនអាចធ្វើទៅបានដោយសារតែលោក សម រង្ស៊ី តែងបានធ្វើសកម្មភាព វាយប្រហារសម្តេច ដូចជាការ ដុតរូបនៅប្រទេសអូស្ត្រាលី និងបណ្តាប្រទេសនានា និងសារឲ្យកងទ័ពបង្វែរចុងអាវុធរករាជរដ្ឋាភិបាល។
សម្តេចតេជោ បានបញ្ជាក់ថា “ថ្ងៃនេះខ្ញុំមានសារជាក់លាក់មួយ ដើម្បីឲ្យដល់ពួកជ្រួលជ្រើមទាំងឡាយដែលប៉ុន្មានថ្ងៃនេះ និយាយពីការចរចា តាមរយៈបេសកជនពិសេសរបស់នាយករដ្ឋមន្ត្រីជប៉ុន បានមកជួបជាមួយខ្ញុំ ហើយក្នុងពេលនោះ បាននិយាយពីបញ្ហាច្រើន ណាស់ ហើយទីបំផុតគាត់ស្ទាបស្ទង់មើលតើមានលទ្ធភាពនឹងការចរចាឬទេ ។ ខ្ញុំបានសួរគាត់ថា តើការចរចាជាមួយអ្នកណា ហើយគាត់ថាចរចាជាមួយក្រុមមនុស្សមួយចំនួន ។ គាត់មិនហ៊ានថា ព្រោះគាត់គោរពច្បាប់របស់កម្ពុជា គោរពសាលក្រមរបស់កម្ពុជា ។ គាត់អត់មិននិយាយថាចរចាជាមួយបក្សសង្គ្រោះជាតិ ឬចរចាជាមួយនរណា គឺចរចាជាមួយមនុស្សមួយក្រុម។ ខ្ញុំបានប្រាប់ទៅគាត់ថា ខ្ញុំអត់មានសិទ្ធិចរចាជាមួយគាត់ទេ ព្រោះខ្ញុំត្រូវគោរពតាមសាលក្រមរបស់តុលាការ បើសិនជាខ្ញុំចរចា ខ្ញុំនឹងត្រូវជាប់ទោសដោយខ្លួនឯង ។ អ្នកដែលប្រឆាំងនឹងសាលក្រមតុលាការកំពូល នឹងត្រូវជាប់គុក និងត្រូវមានទោស ជាប់គុក២ឆ្នាំកន្លះ(២ឆ្នាំ៦ខែ)ថែមទៀត។គាត់បញ្ជាក់ហើយបញ្ជាក់ថែមថាគោរពអធិបតេយ្យជាតិកម្ពុជា បន្តផ្តល់ជំនួយនិងកិច្ចសហការដោយមិនបានធ្វើការកៀបសង្កត់អ្វីទេ ហើយម្យ៉ាងទៀត មិនមែនជាកាតព្វកិច្ចរបស់ជប៉ុន ដែលមកកៀបសង្កត់ខ្មែរ “។
សម្តេចបានបន្ថែមថា “បើតាមទិដ្ឋភាពផ្លូវច្បាប់ មិនតម្រូវឲ្យខ្ញុំធ្វើការចរចា ហើយគាត់និយាយថាតើលទ្ធភាពដោះស្រាយឲ្យមនុស្ស១១៨នាក់ ដែលអាចធ្វើសកម្មភាពនយោបាយ ។ ខ្ញុំបានប្រាប់គាត់ថាច្បាប់នៅកម្ពុជា អត់ទាន់មានច្បាប់លើកលែងទោសសម្រាប់អ្នកហាមឃាត់អ្នកទោសធ្វើនយោបាយអត់ទាន់មាន គឺមានតែច្បាប់ពន្ធនាគារ ដែលអនុញ្ញាតនាយករដ្ឋមន្ត្រី ធ្វើការសុំលើកលែងទោសចំពោះអ្នកដែលជាប់គុកមានសាលក្រមស្ថាពរតែប៉ុណ្ណោះ ប៉ុន្តែគ្មានច្បាប់ ដើម្បីនឹងលើកលែងទោស ឲ្យអ្នកដែលត្រូវកាត់សិទ្ធិនយោបាយ ។ លោកឯងសុំដុតរូបខ្ញុំស្រស់ៗ ហើយមកសុំចរចាជាមួយខ្ញុំ ហើយឥឡូវអ្នកឯងថាហ៊ុនសែនត្រូវកងទ័ពប្រឆាំង អីចឹងលោកឯងមិនចាំអីមកចរចា ចាំហ៊ុនសែនរំលំទៅ វាមិនស្រួល ។ កងទ័ពក៏ប្រឆាំង នៅក្នុងគណបក្សក៏ប្រឆាំង ប្រជាជនក៏ប្រឆាំង អីចឹងសូមលោកមិនបាច់មកចរចាទេ ព្រោះខ្ញុំកំពុងខ្សោយស្រាប់ហើយ ហើយរកការចរចារកខ្មោចអី “។
សម្តេចតេជោ “បានប្រកាសដាច់ខាត អត់ចរចាប្រាប់ឲ្យហើយ”។ “ខ្ញុំបញ្ជាក់តែពីរចំណុចទេ ទី១ គ្មានការចរចាជាមួយពួកក្បត់ជាតិ ទី២ គ្មានការលើកលែងទោស ឬបន្ធូរបន្ថយទោសឲ្យពួកក្រុមក្បត់ជាតិនេះទេ។ លោកឯងចង់ថាម៉េចថាទៅ ធ្វើអីធ្វើទៅ កាលពីមុនម៉េចលោកឯងមិននៅឲ្យស្ងៀម ធ្វើឲ្យវាស្រួល លោកឯងបង្កើតនូវហឹង្សា តាមរយៈនៃការដុតរូប ហ៊ុន សែន គ្រប់ទីកន្លែង ហើយឥឡូវខាបយកព្រលឹងហ៊ុនសែនទៅ ព្រោះហ៊ុនសែនកំពុងនិយាយខ្លាំងៗណាស់ “។ សម្តេចនាយករដ្ឋមន្ត្រី បញ្ជាក់បន្ថែមយ៉ាងដូច្នេះ។
សម្តេចតេជោ បានថ្លែងថា រឿងនៅអូស្ត្រាលី បានបញ្ចប់ហើយ បែរជាមកប្រឌិតរឿងជប៉ុនវិញ ហើយជប៉ុន មិនមែនមកធ្វើរឿងឆ្កូតៗនោះទេ ជប៉ុនស្គាល់អធិបតេយ្យ និងឯករាជ្យភាពរបស់កម្ពុជា ក្នុងពេលក្នុងពេលបើកការដ្ឋានស្ថានផ្លូវក្រោមជំនួយរបស់ជប៉ុនកាលពីថ្ងៃទី២៦ខែមីនានៅខេត្តបាត់ដំបង គឺជប៉ុនបានពិភាក្សាក្នុងវេទិកាមួយផ្សេងទៀត ប៉ុន្តែមិនមែនពិភាក្សាប្រធានបទរបស់លោកឯងទេ។
សម្តេចតេជោ ហ៊ុន សែន ក៏បានប្រកាសដាក់ចេញនូវគោលការណ៍៣ចំណុចថែមទៀត សម្រាប់ការអនុវត្តជាមួយក្រុមបក្សដែលត្រូវរំលាយ។ គោលការណ៍៣ចំណុចនោះ គឺពីរអត់ និងមួយមាន អត់ចរចា អត់ដោះលែង និងមានការបោះឆ្នោត។ សម្តេចតេជោ ហ៊ុន សែន បានថ្លែងថា ឱកាសនៃការចរចាជាមួយទណ្ឌិត សម រង្ស៊ី មិនមានទៀតនោះទេ ហើយថែមទាំងប្រកាសអនុវត្តន៍នយោបាយដែលដាក់ចេញដោយលោក សម រង្ស៊ី មានសែន អត់ស៊ី មានស៊ី អត់សែន។ សម្តេចប្រមុខរាជរដ្ឋាភិបាលកម្ពុជា បញ្ជាក់បច្ចុប្បន្ន មានតែសែន អត់មានស៊ីនោះឡើយ។
សម្តេចតេជោ បានសង្កត់ថា សម្តេចនឹងកម្ចាត់លោក សម រង្ស៊ី ឲ្យដូចដែលសម្តេចកម្ចាត់ ប៉ុល ពត ។ ខ្ញុំដាក់ចេញនយោបាយដូចកម្ចាត់ហ្អែងដូចកម្ចាត់ ប៉ុល ពត អ៊ីចឹង។ ប៉ុល ពត ប៉ុណ្ណឹងគង់អស់រលីងហ្អែងខ្លាំងអី។
សម្តេចនាយករដ្ឋមន្ត្រីអះអាងថា ជប៉ុនមិនលូកចូលជ្រៀតជ្រែកកិច្ចការផ្ទៃក្នុងអធិបតីរបស់កម្ពុជា ហើយជប៉ុនធ្វើកិច្ចការដើម្បីប្រជាពលរដ្ឋជាង ១៥លាននាក់ មិនមែនធ្វើដើម្បីតែក្រុមថ្នាក់ដឹកនាំអតីតបក្សសង្គ្រោះជាតិប៉ុន្មាននាក់ដែលបានកាត់សិទ្ធិនយោបាយនោះឡើយ។
សម្តេចតេជោ ៖ គ្មានបរទេសណាមកត្រួតក្បាល ហ៊ុន សែន បានទេ សូមនិយាយឲ្យច្បាស់។ គេថាជប៉ុនកំពុងមកកៀប ជប៉ុន គឺជាប្រទេសមួយ ដែលខ្ញុំបានធ្វើការជាមួយប្រទេសគេ គេមិនដែលធ្វើតាមរបៀបដូចដែលលោកឯងនិយាយនោះទេ។ សូម្បីតែភាសានិយាយក៏ប្រយ័ត្នប្រយែងដែរ។
សម្តេចតេជោ ហ៊ុន សែន បានបញ្ជាក់ថា នៅសប្តាហ៍ក្រោយនេះ រដ្ឋមន្ត្រីការបរទេសជប៉ុន នឹងមកបំពេញទស្សនកិច្ចផ្លូវការនៅកម្ពុជា ហើយនឹងមានជំនួបពិភាក្សាការងារសម្តេចតេជោ ជាមួយនឹងរដ្ឋមន្ត្រីការបរទេសជប៉ុន ហើយក្រោយជំនួបនោះ នឹងមានការចុះហត្ថលេខា ផ្តល់ជំនួយរបស់ជប៉ុន សម្រាប់ការអភិវឌ្ឍនៅកម្ពុជា តែគ្មានប្រធានបទនិយាយពីអតីតបក្សសង្គ្រោះជាតិ៕ ដោយ ៖ បញ្ញាស័ក្តិ
