ក្រុមប្រឹក្សាអភិវឌ្ឍន៍កម្ពុជា (CDC) ទើបតែអនុម័តគម្រោងវិនិយោគថ្មីចំនួន ៣ ដែលមានតំលៃជិត ១៥ លានដុល្លារដែលនឹងបង្កើតការងារបានជាង ៤.០០០ កន្លែង។
វិញ្ញាបនប័ត្រចុះបញ្ជីវិនិយោគចុងក្រោយត្រូវបានអនុម័តឲ្យ ក្រុមហ៊ុន Shining Fashion Industrial Co Ltd ដើម្បីបង្កើតរោងចក្រកាត់ដេរ នៅភូមិត្រពាំងពើក ក្នុងឃុំពើក ដែលស្ថិតនៅក្នុងស្រុកអង្គស្នួលខេត្តកណ្តាល។ ក្រុមហ៊ុនគ្រោងវិនិយោគ ៣,៤ លានដុល្លារនិងបង្កើតការងារ ៩៤៧ កន្លែង។
ក្រុមហ៊ុន MELYO PLASTIC TECHNOLOGY CO., LTD. គម្រោងបង្កើតរោងចក្រផលិតធុងទឹកកក និងធុងជ័រ ដែលមានទីតាំងវិនិយោគស្ថិតនៅភូមិស្ពានពោធិ៍ ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង មានទុនវិនិយោគប្រមាណ៤,៧លានដុល្លារអាមេរិក និងអាចបង្កើតការងារបានចំនួន ១៦៧កន្លែង និង ក្រុមហ៊ុន KICYN (CAMBODIA) CO., LTD. គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិត្រពាំងក្រសាំង ឃុំត្រពាំងក្រសាំង ស្រុកបាទី ខេត្តតាកែវ មានទុនវិនិយោគប្រមាណ៦,៧លានដុល្លារអាមេរិក និងអាចបង្កើតការងារបានចំនួន ២.៩៤៧កន្លែង។
កាលពីសប្តាហ៍មុន CDC បានអនុម័តគម្រោងថ្មីចំនួន ៧ ដែលតំណាងឱ្យការវិនិយោគសរុបចំនួន ៦៣.៥ លានដុល្លារបង្កើតការងារក្នុងស្រុកចំនួន ៨៧០ ។ CDC បានអនុម័តគម្រោងដែលត្រូវបានគេរំពឹងថានឹងបង្កើតការងារជាង ១៥.០០០ កន្លែងក្នុងរយៈពេលពីរខែចុងក្រោយនេះ៕
