ភ្នំពេញ ៖ ពាក់ព័ន្ធអំពើឃាតកម្មលើស្ត្រីឈ្មោះ ចេវ សុវឌ្ឍនា សមត្ថកិច្ចនគរបាលនៃក្រសួងមហាផ្ទៃបានបញ្ជូនលោក ឡាយ វណ្ណៈ ទៅដល់អយ្យការអមសាលាដំបូងរាជធានីភ្នំពេញ នៅវេលាម៉ោង២និង៣០នាទីរសៀលថ្ងៃទី២ ខែមេសា ឆ្នាំ២០១៨នេះ។
ចំណែកជនសង្ស័យ៥នាក់ទៀត ពាក់ព័ន្ធឃាតកម្មដ៏អាថ៌កំបាំងលើស្ត្រីឈ្មោះ ចេវ សុវឌ្ឍនា នៅ រសៀលថ្ងៃទី២ ខែមេសា ឆ្នាំ២០១៨នេះ ត្រូវបានបន្តការសាកសួរ នៅអយ្យការអម សាលាដំបូងរាជធានីភ្នំពេញដោយលោក សៀង សុខ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ។
មន្ត្រីតុលាការថ្លែងថា ព្រះរាជអាជ្ញារង សៀង សុខ អាចសម្រេចចោទប្រកាន់ ក្រុមជនសង្ស័យទាំងអស់ នៅថ្ងៃទី២ ខែមេសា ឆ្នាំ២០១៨នេះ។
លោក ឡាយ វណ្ណៈ ត្រូវបាននគរបាលព្រហ្មទណ្ឌក្រសួងមហាផ្ទៃ ឃាត់ខ្លួនក្នុងទឹកដីខេត្តតាកែវ ក្រោយពិធីបញ្ចប់តំណែងជាប្រធានគណបក្សប្រជាជនកម្ពុជា ខេត្តតាកែវ តាមដីកាបញ្ជាឱ្យចូលខ្លួនរបស់លោក សៀង សុខ។
ជនសង្ស័យទាំង៦នាក់នោះ រួមមាន៖ លោក ឡាយ វណ្ណៈ អតីតអភិបាលខេត្តតាកែវ, លោក ឡាយ ណារិទ្ធ ស្នងការរងនគរបាលខេត្តតាកែវ ត្រូវជាបងប្រុស លោក ឡាយ វណ្ណៈ, ឈ្មោះ ចាន់ រី ភេទស្រី និងប្តីឈ្មោះ ជឹម វុធ ជាអ្នកបំរើនៅផ្ទះនាង ចេវ សុវឌ្ឍនា, ឈ្មោះ មេន សម័យ អ្នកបើកឡានឲ្យលោក ឡាយ វណ្ណៈ និងឈ្មោះ តាក់ រតនា ជាអ្នកបើកឡានឲ្យលោក ឡាយ ណារិទ្ធ ត្រូវបានសមត្ថកិច្ចឃាត់ខ្លួនសួរនាំ និងបញ្ជូនទៅតុលាការ ពាក់ព័ន្ធករណីឃាតកម្ម សម្លាប់ស្ត្រីស្រស់សោភាម្នាក់ ឈ្មោះ ចេវ សុវឌ្ឍនា អាយុ៣៦ឆ្នាំ កាលពីថ្ងៃទី២៦ ខែមករា ឆ្នាំ២០១៨៕ ដោយ ៖ បញ្ញាស័ក្តិ